O le mea e iai le loto, e iai le auala e fai ai

Tusia Vatapuia Maiava ma Sarafina Sanerivi ,

136 Hits

Merita Vainiu mai le afioaga o Nono’a Saleimoa.

Merita Vainiu mai le afioaga o Nono’a Saleimoa.

E leai lava se mea e maua gofie i le olaga nei. 

Ae a iai le loto atoa, e iai lava le auala e fai ai so’o se mea e fa’anaunau iai le loto. 

O lea le finagalo o le tinā ia Merita Vainiu, 36 tausaga mai le afioaga o Nono’a i Saleimoa. 

“E le’o toe tutusa lava le olaga i le vaitau lenei,” o lana fa’aaliga lea i le Fofoga o Samoa. 

“Ua faigata lava nei aso i le tausiga o aiga ma le sa’iliga o manuia mo aiga ma fanau.”

Ae peita’i o le finagalo o le tinā ia Merita, a nofoa’i ai le tagata ma lē gaioi, e le mafai ona maua se manuia mo aiga.

“O le olaga lenei, a le galue ma tinoū le tagata e le maua foi se manuia o le aiga.

“O si o matou aiga, o lo’o sologa lelei lava mea uma. E taumafai lava i auala ese’ese ina ia maua ai se fofo o fa’afitauli e tula’i mai ma feagai ai ma aiga.

“Mo le silafia lava, e le fua tasi lava i se aiga le fa’afegai ai ma fa’afitauli. Ae o mea lava e mafai ona fo’ia.”

Na ta’ua e Merita, o si o latou aiga, o le ma’umaga lava ma le laufanua o lo’o fa’alagolago iai e maua mai ai seleni e tausi ai le aiga ma tautua ai le nu’u ma le ekalesia. 

“O aso a a’o laititi foi ma le’i faia se aiga, sa fa’alogo lava i a i latou e matutua e fa’apea mai lava e le faigofie le ola faito’alua. 

“Ma ua fa’asa’o lava lenei tala ina ua fai aiga ma fanau. E faigata le tau mafaufau ai ini auala e maua ai se mea e tausi ai le aiga.

“Ae peita’i a loto gatasi lava le aiga ma galulue fa’atasi, e mafai lava ona fa’atinoina o so’o se mea e manana’o iai.

“O si o matou aiga, o le ma’umaga lava ma fua o fuala’au aina o lo’o maua ai a matou seleni.

“Ia te a’u foi ia, e sili atu lea nai lo’o le faigaluega i se ofisa.

“Ua taugata lava le soifuaga ma le tau o oloa i lenei vaitau. Ua taugata oloa ae le’o lava le fa’asoa a nai o tatou tagata.

“O lo’u a’u lava manatu, e sili lava si seleni o lo’o matou maua mai le fa’atauina o fua o fa’ato’aga nai lo’o se isi lava galuega.

“E mo’i foi lava e faigata le ola faima’umaga i nisi o taimi, ia ae fa’apena lava le olaga o lo’o tatou nonofo ai. 

“E pei ona fai atu, o le olaga lenei ele’o toe faigofie. Ae a na’o le nonofo ma faitio ae leai se galue, ona atili ai lea ona tigaina ma ola falolo aiga. 

“O le ala foi lea e galulue ai, auā a tatou nofoa’i, na’o le mativa le mea e maua ai.

“O lo’o iai o tatou fanua e galulue ai ma maua ai mea e tausi ai o tatou aiga.”

© Samoa Observer 2016

Developed by Samoa Observer in Apia