LAUGA - “O le tino galue oe o Keriso”

Tusia Rev. Petaia Setu ,

130 Hits

Rev. Petaia Setu

Rev. Petaia Setu

(Efeso. 1 : 22 – 23)

O le upu a se tasi tusitala iloga o mafaufauga e suafa ia Jonathan Swift, “Ua lava ma totoe le tele o lotu, na te faaosofia le ita; ae le taitai ona lava e faatupuina se fealofani.” O le fesili, E faapefea ona fofō? O le tali, Ia tasi tagata uma. Ia tasi ia Keriso.

E leai se vaipanoa poo se vaega o i le lalolagi nei e sao mai le fevaevaea’i (disunity). O le vā tagata, o le va siomaga, o le va soifuaga, e oo lava i le va o le tagata ma le Atua, ua tala va mea uma lava. I le, o le mea lea na oo mai ai Iesu i le lalolagi, ma maliu, ia faaumatia le fevaevaea’i ma le fefulituaa’i.

Ia soloia pa vaeloto o le faailoga tagata ma le manatu faapito. Ia fausia le leleiga i maseiga. Ia fai Keriso ma sootaga (bridge) o lanu ma gagana uma. O lona uiga, ia toe faafoisia tagata uma i le mafutaga e tasi.

Ua uma ona maliu Keriso i le silia ma le lua afe tausaga ua mavae, ae le o iloga ona atoatoa mai sea faamoemoe! O le tusi nei i Efeso, ua mafai ai ona tatou faalogo i se faalagiga poo se faalupega silisili ma le talafeagai lelei o le ekalesia, O le tino o Keriso.


Ua tatou iloa, e le mafai ona iai se ulu e aunoa ma sona tino, poo le tino foi e aunoa ma se ulu. A o le ulu, na te polokalameina fuafuaga uma. Ua iai i le ulu le ata ma metotia o mea uma lava. A o le tino, o ia na te faagaoioi ma faatino polokalame uma ua aumai e le ulu. O le ata tonu lava lea o loo tautala ai Paulo i le ekalesia i Efeso. Ua uma ona aoao mai Iesu i mea uma lava i lona au soo.

O ana fetalaiga, o lauga, o vavega ma faamalologa, o tala faa-faataoto ma faailoga eseese na ia faia. O mea tetele ma faailoga ofoofogia; o le faasinomaga o ō tatou olaga ma vaaiga faamomoiloto i lona soifuaga. O lona tulaga faatagata soifua ma lona tulaga Atua.

O lona maliu ma lona toe tu manumalo; o lona afio a’e i le lagi ma lona auina mai o le Fesoasoani; o lona sē’ei i le itū taumatau o le Tamā, ma Fautua mo tatou. O lona tumu lea. Fai mai Paulo, na te faatumuina mea uma lava. O le tumu lea e manaomia ona soo ai le lalolagi uma i lona sootaga tagata. Ia tumu ai lou tagata ma lou siomaga. Ia malamalama ai ou mata ma faaolaina ai lou agaga, ona maua lea o sootaga ma mafutaga mafanafana. Ona tasi lea o lanu ma gagana, tasi tagata uma i le faaolataga.

Samoa, o le plan lea a le Atua mo lou olaga ma tagata uma lava. E manaomia e le ulu le tino e faatinoina le galuega o le leleiga i nuu uma ma tagata uma, ina ia i’u i le mafuta ma le tuufaatasia o tagata uma. ’Aua ne’i ta’ufaatauvaaina e ’oe ’oe lava. O oe o le tino tofia o Keriso. O lima gălue o lana galuega; o vae e femo’ei i ana feau; o le gutu e tautala i le ola, ma faailoa atu i tagata uma le Faaola. O oe o le tino ola, na te avatua le galuega faaola ma molimauina lona alofa. O le tino galue oe, e malu ma ola iai le lafu mamoe. E te faailoa i lou aiga foliga o le Iesu na maliu, mo le fealofani ma so outou nofo filemu.

Le ekalesia e, ua le o tuua oe o mātua oti. Fai mai le aposetolo, ou te le o mapu i le faafetai ona o outou; o ta’uta’ua outou i a’u tatalo; ina ia foa’i atu e le Atua ia te outou, le Agaga e ona le poto ma le faaaliga e ala ai ona outou iloa lelei o ia. (f.16.18) Le Agaga e malamalama ai o outou loto i le faamoemoe o le Atua ua ia i tatou i lo tatou valaauina, ina ia o tatou iloa, o le tino i tatou o Keriso; e le o le ulu oe.

Ua le vasa’i le mau faalavelave. Ua masofa le fa i le va tapuia o mātua ma fanau; ua soli feagaiga le tuagane ma le tuafafine; ua fetaua’i tau usoga ma aiga (Mat.10:35). Ua le fealofani le tagata ma lona siomaga; ua fesopoa’i le sami ma le eleele matutū. Ua vaivai le molimau a le tino (ekalesia). Aisea? Ua e fāoa le tulaga o Keriso. Uso, o le vae oe; o le lima, o le gutu. O le tino galue oe mo le fealofaniga o uso. O le tino oe ua faamanuiaina. Fai mai le sa’afi a se tasi tagata pese, You see my body, it is the temple of God. . .my hands, they’re the hands of God –

My hands are blessed, 

My legs are blessed,

My head is blessed, 

Everything is blessed. .

Praise God!!

Poo e iloa ea, o faamanuiaga ia o lou tino galue, ua faaalia ai le mana o le faauuga a le Atua i lou olaga, e ola iai lau fanau; e maopoopo ai lou aiga; e ta’uleleia ai lau auaunaga; e fealofani ai mafutaga; e mafai ai ona e tuufaatasia tagata; ma pepese ai tatou uma i le faaolataga? Fai mai Paulo, ua tuu e le Atua mea uma i lalo o vae o Iesu….O oe ma a’u , o vae ua faamanuiaina; ua iai le faauuga mana; ua iai le tumu atoatoa ole Ulu, e faalelei ai le felotoa’i; e fealoa’i ai le fefulituaa’i; e liliuina ai le fevaevaea’i i le fesilafa’i, ma toe faatasia ai le fanau a le Atua ia Keriso Iesu.

Samoa e, tatalo ia le o le tele o lotu e feeseesea’i ai ma faaletonu; a ia maopoopo ai ma tupu tele ai le ola talitonu, i le Atua ma lana amiotonu.

 

Amene

7737063

© Samoa Observer 2016

Developed by Samoa Observer in Apia