Ia iloa e le talavou lona taua

Tusia Vatapuia Maiava ma Ilia L Likou ,

162 Hits

“A iloa e le talavou lona tiute i totonu o aiga, nu’u, ekalesia ma le atunu’u, o le a faigofie mea uma.” Samoauatasi Tolu o le afioaga o Toāmua.

I le fa’atalatalanoaga ai ma Samoa i le aso ananafi a’o ‘auai atu ai i le ta’amilosaga Lakapi Pa’i a le E.F.K.S. a Nofoali’i, na ia fa’ailoa le sao tele o tu’ufa’atasiga nei mo tupulaga talavou.

“Aepeita’i e pei o totonu lava o fa’atasiga fai a Ekalesia , o se itu lelei tele lea e fa’amasani ai le isi talavou i le isi talavou.

“E  pei fo’i la o lenei aso ua atofa e le E.F.K.S. i Nofoali’i ma maua mai ai lo matou avanoa, ia na muamua lava fa’aosofia le fia sau ina ua alu atu le vala’au o lo’o i lalo le fa’amalumaluga a le Ekalesia aemaise o matua fa’aleagaga i Nofoali’i nei.

“O lona lua, ia e le taumateina e leai se pisa e maua ai pe o ni fusuaga fo’i, aua e pei ona maitauina i nisi o fa’agatama fa’apea, ia e fe’ese’esea’i ai le tele o talavou.

“Ae ua fiafia lava e omai fo’i mai e lagolago lenei fa’amoemoe, ia e maua ai le fiafia, o le ata, ia aemaise o le tausiga o le soifua maloloina.

O le a se sao a tupulaga talavou e ao ona ave i ai le fa’amuamua i nei aso?

“Ia e leai lava se isi sao nai lo le avea o tupulaga talavou ma fa’ata’ita’iga lelei i so’o se fa’alapotopotoga o lo’o galulue ma tautua ai i Samoa nei.

“E le gata i lena, ia tausolomua talavou i so’o se taumafaiga o lo’o taumafai ai aiga, afio’aga ma ekalesia aua le sologa lelei o so’o se atina’e mo le lelei lautele o le atunu’u.

“E pei fo’i la ona i ai i lenei aso, ia e pei o lo’o taumafai lava e titilo i le fealofaniga i ta’aloga o lo’o mafai ona auai ai.

“Ia fa’apea ona avea fa’agatama e fefa’amasania’i ai le tasi i le tasi, ma ia finafinau ai e fai mea lelei mo le lautele o tatou tagata.

“Aua e le taumateina le tele o fa’afitauli o lo’o ua lolofi mai ma fa’alavelave i le tele o ola o talavou, ia e leai lava se isi mea e sili nai lo le fesoasoani muamua o le talavou i a te ia lava, ia ona lelei lea o le aga’i atu i le lumana’i.

“O le a se taumafai a matua, faife’au, ali’i ma faipule ma le malo, ae a le gaua’i lava le ola galulue o tupulaga talavou ia e ma’imau le taimi. 

O le a se miti o i a te oe?

“Ia e pei o lea le miti tele ia fa’aauau le ta’alo i Lakapi Pa’i nei, ia avea a’u ma se tasi e fili e Samoa mo nio ta’amilosaga i le lumana’i.

“O lo’u ia lea mana’o, ia ae o lo’o to’aga lava e toleni, ma tu’u i le taimi o le Atua.

© Samoa Observer 2016

Developed by Samoa Observer in Apia