O le malupuipuia o lo ta siosiomaga o loo i o ta tagata

By Theresa Meaole 11 September 2016, 12:00AM

Ua nanamu faa-fagusausau tu ma aga faaonaponei,

Faatosina ai i taua ma le manatu i se lelei.

Fetuleni mai faiga faatekonolosi,

Lea ua vaaia le saoasaoa ma le malosi.

Le tele o suiga ua pei o le emo o le mata,

Oi se talofa i o ta tagata.

Manatu i lo ta siosiomaga poo a mai,

Poo i fea ea le matagofie sa iai.

Le vaomatua ma laau ua le fua mai,

O le fesili poo lea le faapogai??

Fesuisuiai mai le tau i le ao ma le po,

Le afuaga lea o faamai eseese e le malolo.

Le osone ua aafia i le mau kasa eseese,

O tafunai,taavale afi ma fale-gaosimea tetele.

O lapisi lafoai i le sami ma le taina o le vaomatua,

Ua aafia ai ia ma le okesene mo i taua.

O ia foi ma figota ua ova fagotaina,

I meatotia sese ma ala e le faatagaina.

O nofoaga faitele tatou te le amanaiaina,

Ma le manatu e le afaina.

Suiga ia ma faiga ua aafia ai lo ta siosiomaga,

O le fesili poo ai ea e faatamala.?

O se tali malamalama,

O i tatou lava.

Ua o ta le vaai mamafa i lo ta siosiomaga,

A ua faatalale ma soona fai lava.

Ua galo ia te i taua o le siosiomaga o le aseta,

Ua faamatagofieina e le Atua mea uma ma faavasega.

Ua tuuina mai tatou te ola ma saoloto ai,

E aunoa ma se fiainu poo se fiaai.

O lo ta tiute la o le teuteu ma faamama,

E puaina mai ai foi se ola fou ma aoga.

Tatou galulue faatasi e mama ai se avega,

Faamatagofieina o le siosiomaga o la tatou galuega.

Ia tumau le matagofie o o tatou laufanua ma lanulauava,

Aua o le malupuipuia o lo ta siosiomaga o loo i o ta tagata..

By Theresa Meaole 11 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>