Suga! Soso mai ma nofo i lalo

Vaai faalelei ou mata

Faalogo ou taliga

Ia mataala lou mafaufau 

Aua nei iai se masalosalo

Le lalagaina o le ietoga

Le measina a Samoa mai anamua

Ua galo nimo i tupulaga i nei ona po

Le telefoni ma tifiga ua faamuamua

Se a e savali mai nei i ou seevae muli uumi,

Ae e te leiloa palu le ava

O ou laugutu ua mumu faasoloatoa

Talofae! Le sulatoga e te leiloa faamatala

Ae faapefea le Siva Samoa

Pe ua sili ia oe le Siva a le teine palagi?

O lavalava, ma ofu vae pupuu

Ua e musu e laei le puletasi

E! Ta fia toe vaai atu i se Tamaitai Samoa moni

O lona tu, savali ma lona tautala

Faaaloalo toe tausaafia

Na te iloa lona va fealoai ma tagata

Aua laia e te fia teine mamafa

Ae alu e tausi faalelei ou matua

Tautua ma punou ma le faamaoni

Le aiga, nuu ma le galuega a Le Atua

AUA LE FIA PALAGI