E leai se mativa i Samoa?

Tusia Vatapuia Maiava ma Ilia L Likou ,

123 Hits

O le aiga o le tinā i a So’o Apa’aulila ma lona to’alua ma la la’ua fanau teine e to’afa na maua le avanoa e fa’atalatalanoa ai e le Fofoga o Samoa i le aso ananafi.

Na fa’ailoa e So’o, ua savali nei i le 5 i le 6 tausaga o nonofo i luga o se fa’ataufusi i totonu o le afio’aga, ma e ui ina lē saogalemu mo ia ma le aiga, ae ua na’o le pau lea o le mafai ua o’o i ai le malosi.

“O si o’u aiga, e leai se isi e faigaluega ae na o le sami lava lea e ola mai ai.” So’o Apa’aulila.

“E leai se mea e maua mai ai se fesoasoani mai fafo, e moni e i ai ae leai se isi e feso’ota’i ai mo sina fesoasoani.

 “O lo’u to’alua o lana galuega o le alu lea e fagota, ma maua ai le mea’ai mo a’u ma le fanau, a ma’i le to’alua, matagi ma afā…ia o lena , e pei o le tulaga tonu lea ua mafaufau ai lava e fai le pisinisi la’ititi lenei e fesoasoani mai i taimi leaga.

“Na aumai ‘apa o le fale, ae lea ua aumai e fai ai le pisinisi, ou te iloa a mautu, ua maua sina seleni feololo o le a fesoasoani mo le fausiaina o se fale. 

“Ia masalo ana fa’apea na o le atina’ega o  le aiga ai ua tau mautu mai nisi o tulaga, ia ae e leai.

“E le lava se tupe i le tele o taimi, o lea e a’o’oga si a’u fanau, e leai se taimi e le o ai i le aiga e ui ina lē tagolima i le tele o taimi.

Le tina i a So’o ma le fanau i luma o lo latou fale i Lepuia’i, Manono.
Le tina i a So’o ma le fanau i luma o lo latou fale i Lepuia’i, Manono.

“ E ui i le matitiva , o lo ma’ua mana’oga ia  fa’ailoa i le ma fanau, ia ola se olaga pu mo’omo’o , ou te mana’o e ta’u atu i la’u fanau  le faigata o le soifuaga ina ia iloa ona ola filigā ai.

“O le taimi lenei e le’o fesoasoani mai se isi po o le malo, e leai se mea fa’apena , o lea  e atia’e to’atasi lava.

“O lea e tatau ai lava i le malo ona vaai i nai aiga vaivai, aua o le mea lea e i ai o lea e vaivai taumafai lava.

O se fa’anoanoaga o So’o, ua to’atele i latou ua tusitusilima i lo latou aiga ona o le tulaga e pei ona i ai.

“Aua e to’atele tagata e fa’atauemu mai, ae pei lava o tagata mauoa, ua va’ai maualalo mai i si o matou aiga.

“Ia o lena ua outou silasila ai i le mea o lo’o nonofo ai ,e taufusi atoa lava.

 “Ua taugatā le soifuaga, ma o lo’o i ai le mativa i Samoa, o lo’o i ai e o lo’o mauoa pea, ae o le mea lea e i ai ua leai se alofa i le tele o tagata , o aiga ia ua leai alofa i se uso i le uso, ua alofa lava le tagata ia i a te ia, lana fanau ma lona to’alua.

O lo’o auai le tinā i a So’o ma le aiga i le Ekalesia o le ‘Au Pa’ia o Aso e Gata Ai.

© Samoa Observer 2016

Developed by Samoa Observer in Apia