“Matou te le o ‘ese”

Tusia Ilia L. Likou ,

147 Hits

Aiga Tokuma ma nisi o sui o lona aiga

Aiga Tokuma ma nisi o sui o lona aiga

O le fuafuaga a le malo e fa’ase’e atu ai i latou o lo’o nofoia Sogi o lea le tulaga ua toe lagā ai lagona ma finagalo o le to’atele o lo’o i ai pea i lea vaega ele’ele lea na feola ma soifua ane ai.

Na fa’ailoa mai e le tinā i a Aiga Tokuma ma Fa’ali’i le lagona faigata ai lea o lea fa’aiuga e pei ona ua tu’uina atu e le malo.

 “O lo’u mafaufau o lo’o i ai o lea ua taumafai le malo e aveese matou ina ia mafai ona fa’aaogaina ele’ele nei na liligi ai le afu o matou matua i le tau fa’ato’aina mo a latou atina’e” o le tala mai lea o le tinā i a Aiga Tokuma.

O le tinā i a Aiga o lona tua’a o le Tokuma Torurae mai le atunu’u o Solomona.

 “E o’o mai i le taimi lenei o lo’o ua amata ona o maitauina le to’atele o tagata e pei oni Faipisinisi mai Saina ua omai ma fesilisili ma va’ava’ai mai i ele’ele nei, ma e foliga mai o lo’o o latou fuafua e fau se fale i le mea nei,

 “Na omai i se tasi o aso ma fai mai e omai se’i matamata…

Fai mai Aiga o atugaluga o le malo mo i latou ona o uiga ogaoga o ‘a’afiaga o le tau e matua pepelo lava ma e le sa’o le mafua’aga o lo’o ua i tua atu nei.

 “O le a le mea e le ave ai le tele o le mau nu’u i le talafatai ae na o matou lava,” o lana tala mai lea.

“O le a le ituaiga tala o lo’o ua latou fai mai nei, o pepelo uma e leai ma se mea o mo’i  i nei mau tala, aua e foliga mai ua manino le mata o le vai, o nei suiga e mo le malo ma ona atina’e.

 “E le o se alofa lea mea ae o pepelo , o fanua nei na tigaina ai o matou tua’a i le tanuina aua i matou ina ia ola manuia.

Na ta’ua e Aiga o le taimi lona lua lenei ua o’o atu ai le malo e taumafai e ave’ese i latou mai nei nofoaga.

 “O le taimi muamua lava, a’o i ai le Tofilau Eti Alesana a’o soifua si o matou tinā,

 “O lea ou te manatuaina na omai ai fo’i nisi o le malo i lena taeao ma a latou masini ma taumafai e kilia le ele’ele lenei,

 “E le galo loimata o le fa’anoanoa i lea taeao ae fa’afetai i le Atua na malosi le loto o si o matou tuagane i a Leiataua, e matou te le le o ese ae eli se lua e togi i ai i matou,

“O le taimi lea na fai mai ai le malo matou te o i Fagali’i.

I nisi o fa’atalatalanoga ma le Palemia, Tuilaepa Sa’ilele Malielegaoi, na ia matua fa’ailoa mai o lea suiga e mo le lelei o e o lo’o nofoia Sogi.

Saunoa Aiga, e le moni nei atugaluga mai le Palemia.

 “O iinei o matou ele’ele, ua mavae atu tua’a na o latou tanuina le pala i taimi o Siamani, aua lava le fa’amoemoe mo i  matou ma o matou fanau.

Na ia fa’ailoa fo’i lona le fiafia i se pa ma le pakaga ta’avale o lo’o i totonu o le afio’aga.

 “E pei ua tu’uese mai i matou ma ua le amanaiaina o ni tagata nu’u Samoa nei….e ui ina fa’anoanoa ona o nei tulaga, ae o lea lava e olo le fua,

 “E pei e foliga mai e sili atu i le malo ta’avale e leai ni ola nai lo ona tagata, ua mafua ai ona fai mai lava i luma o matou  mata nei faiga…pei ua eueu atu i matou i tua i fa’ataufusi.

O lea le tulaga e tasi na fa’ailoa mai e Fa’ali’i.

 “E leai nisi ele’ele matou te toe o ai, o nei lo matou fa’asinomaga mai le Atua,

 “O aso uma, ua matou le fefe ma ua tau le mafai se moe lelei ma mafaufau po o afea a o matou va’ai atu ai ua omai le malo e ave’ese i matou,

 “O lo’o tatalo pea i le Atua ina ia fesoasoani mai i o matou mafatiaga aemaise o lenofo popole i aso uma.

E silia ma le 10 eka na tu’uina atu e le malo mo aiga e 33 i Sogi ina ia aga’i i ai, e tofu le tagata ma le Kuata eka.

E le’i mafai ona maua se fa’atalatalanoaga ma le Ofisa Sili o Ele’ele a Samoa i le aso ananafi.

© Samoa Observer 2016

Developed by Samoa Observer in Apia