Fesiligia e se Tina le Ofisa o Sulufa’iga

Tusia Lanuola Tusani Tupufia ma Fa’aliliu e Maiava ,

144 Hits

Maiava Iulai Toma ma Silafaga Tupito.

Maiava Iulai Toma ma Silafaga Tupito.

O lo’o fia maua lava se fa’amatalaga tonu, ma fia malamalama le tina e 45 tausaga mai Si’umu, lea na osofa’ia e Leoleo fa’a’Aupegaina lo latou fale, i le tausaga talu ai. 

O lo’o fia iloa e Silafa’i Tupito, pe aisea lava ua tuai ai ona su’esu’e e le Ofisa o le Komesina o Sulufa’iga, lana mata’upu na o’o atu ai.

“Pei o gaioiga ma faiga a Saddam Hussein le taimi na latou osofa’ia ai le matou fale – o faiga ma fa’atinoga e na o le TV e masani ona va’aia ai,” o le fa’aaliga lea a Silafa’i i le Samoa Observer. 

“Sa fa’a’aupegaina uma leoleo, ae leai fo’i se pemita e soli ai le fanua ma lo’u fale.

“Matua ‘ou le-fiafia tele i ia faiga le-migao ae maise, na matua fefefe si a’u fanau ona o leoleo ma fana na fa’ata solo i tagata. E o’o mai lava i le taimi nei, ua pei a’u ma lo’u aiga uma o ni tagata leaga i le va’ai a le matou nu’u atoa, e o’o lava fo’i i isi tagata o le matou aiga.

“O le mafuaga lea o lo’u fa’ananau ai lava ina ia silasila toto’a iai le Ofisa mo Sulufa’iga, se’i fa’amama atu ai ma fa’auma lenei mea, se’i tau mapu a’e ai le mafaufau. 

Na feso’ota’i atu i le Ofisa mo Sulufa’iga i le Aso Faraile, ae fa’ailoa maiu e se tasi o le ‘aufaigaluega e le mana’o e fa’ailoa lona suafa e fa’apea, o lo’o i se fonotaga Maiava Iulai Toma, le Komesina o Sulufa’iga.

Na fa’aopoopo mai fo’i lea tama’ita’i, o le tele o mata’upu e su’esu’eina e le latou Ofisa, e afaina lava ma tuai ona o le leai o ni tali mai Matagaluega po’o tagata ta’ito’atasi fo’i e mo’omia.

O Setema i le tausaga talu ai, na osofa’ia ai e Leoleo fa’a’aupegaina le fale o Silafa’i ma taofia atu ai ma lona to’alua e Leoleo.

Sa tu’ua’ia ona o le umia o mariuana.

Na mavae nai aso, ae toe osofa’ia fo’i lea aiga e Leoleo – ua fa’ato’ateleina atu, ae na o Silafa’i ma lana fanau laiti e to’alua sa i le fale. E leai se mariuana na maua i lea aiga.

Sa fa’ailoa fo’i e Silafa’i, e le’i fa’aali atua fo’i e leoleo, se pemita e su’e ai lo latou fale ma le fanua.   

O lona popole tele ma le fefe ona o le tulaga mata’utia na fa’atinoina ai le galuega a Leoleo, ua naunau ai lava e fia iloa po ua silasila ane le Ofisa mo Sulufa’iga i lana mata’upu.

“Pau lava lea o lo’u mana’o, ia fai le mea tonu ma amiotonu,” o lana fa’aaliga lea.

E o’o mai i le taimi nei, e le’i o’o atu lava se tala mai le Ofisa mo Sulufa’iga.

Ua silia i le tausaga talu ona ripotia lea fa’alavelave, ae na ta’ua e Silafa’i, o lo’o popole pea iai lona mafaufau i aso ta’itasi. 

 “’O se fa’anoanoa tele lava lea ia te a’u, talu ai, o le isi a’u tama e lua-tausaga, e le atoatoa le malosi a’o le isi e lima tausaga, e laiti tele a ua fai lava si matuia o mea na va’ai iai i Leoleo fa’a’aupegaina,” o lana fa’aaliga lea.  “Na ‘ou matua popole lava ina ua o’o mai Leoleo ma fana, e ta’i solo i si a’u fanau, ae la te le-iloa po’o le a le mea ua tupu. Mai lava i lena aso, e tagi lo’u fatu ona ua fa’alumaina, a’o le fa’anoanoaga, e o’o lava i o matou aiga, ua fa’apena ona fa’asinosinomia ai.” 

Na ta’ua fo’i e lea tina, e o’o mai nei lava, e le’i o’o atu se tala mai le Komesina o Leoleo ma le Matagaluega, ona o le latou galuega le-alofa na fai.

Peita’i, ina ua ulua’i ripotia lea fa’alavelave ia Setema talu ai, na fa’ailoa ai e le Komesina o Leoleo i tusitala ma le vaega fa’asalalau le osofa’iga lea a Leoleo na fa’aa’upegaina ai, ae le’i ta’ua ai, le fa’alala ma fa’ata o ia fana i nai fanau laiti.

 

 

  

© Samoa Observer 2016

Developed by Samoa Observer in Apia