Tinā lelei!

By Ilia L Likou 11 July 2016, 12:00AM

O Tumama Leugamata Fuafuaina Auvaa o ia o se tinā na soifua mai i le Aso 21, Me 1936.

O le tina ia Tumama o se tina na soifua mai i lona nuu i Patamea Savaii, na faaipoipo atu ia Leugamata Fuafuaina Auvaa o Tiavea.

O le vaiaso na se’i mavae atu nei i le Fono a le ‘Auuso Fealofani o le Metotisi na fa’apineina ai o se tinā ua aulia le 80 o tausaga o lona soifua a’ o ‘au’auna pea i le Ekalesia

O lona olaga sa soifua mai i lona aiga na tautua i le Ekalesia Fa’apotopotoga Kerisano i Samoa, ae ina ua faaipoipo na tautua ai loa i le lotu Metotisi i Tiavea tai.

O se tina e malosi i le tautuaina o le Ekalesia e ala i le Au Uso Fealofani i Tiavea Tai, sa tele foi tausaga sa auauna ai e ala i le tofi Failautusi o le Au Uso Fealofani i Tiavea Tai lava.

Aepeita’i ina  ua matua lona soifua ma ua faigata ona fealuai, o lea na tuua ai le mafutaga ma lana Au Uso i Tiavea Tai, ae ua nofo mau i Sekema Fou i Papauta ma tautua ai foi i le Au Uso Fealofani i Sekema Fou Papauta.

“Ou te faafetai tele i le Atua Silisili Ese, ona o lona alofa ma lona agalelei ua mafai ona ou maua nei tausaga e tele o lo’u ola, a o loo mafai ona galue pea e ala i le galuega faa le Au Uso i totonu o lana Ekalesia, Ekalesia Metotisi.

“Ou te faafetai foi ma le agaga maulalo i le Paia o le Ekalesia, ile Afioga le Peresetene o le Ekalesia  Aoao, le Peresetene o le Au Uso Fealofani i Samoa ma atunuu i fafo, Susuga i le Failautusi, Susuga i le Teutupe, faapea le Aufaigaluega Paia a le Atua, ona o le faaaloalo maualuga sa tauaao i ai i le taimi o le Sauniga e ala i le Pine o le 80 tausaga, faapea le seleni paia.

“Ou te momoli foi le faafetai i le Tina o le Sinoti Apia, faletua Sulu Asi, ae maise o le faletua, si o’u tina o Fiti Vaatofu ma le Au Uso Fealofani i Sekema Fou i lo outou agalelei ma le faaloalo.

“O la’u tatalo, ia to mai Lagi manuia o le Ekalesia, i ta’ita’i, faapea le aufaigaluega pa’ia a le Atua. Ia tupu ma ola le feau, ia tumau i le galulue ma le loto faatuatua moni i le Atua. Faafetai tele, faafetai tele lava.”

O lona talitonuga, poo fea lava e nofo ai, poo fea foi e alu i ai, e taua ia te ia lona ola auauna i le Atua e ala i lana Ekaleisa Metotisi.

O se tina loto maulalo, faaaloalo ma tausaafia, e maualuga lana vaai i le Ekalesia, e tautua ma lona loto talitonu i le Atua ma ana faamanuiaga i lona aiga ma lana fanau, o nisi o le fanau o loo galulue i le galuega a le Atua, o loo nonofo nisi i atunuu i fafo, a o isi o loo aumau lava i Samoa nei. 

O le tumutumuga o lona faamoemoe, ia maua pea le malosi  mai le Atua, e faaauau ai lana tautua ele gata i le Ekalesia, o lona nuu ma lona aiga. 

O lana aupega mo aso uma, o le tatalo.

By Ilia L Likou 11 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>