LAUGA - “E PA’Ū SE TOA, AE TULA’I SE TOA”

Tusia Rev. Petaia Setu ,

446 Hits

Rev. Petaia Setu

Rev. Petaia Setu

O le talitonuga o le agaiotupu poo le matuaofaiva ma le aiga Sā Lemalama, ia soo le ‘afa ma le ‘afa, o le fau foi ma le fau; ona le siligia lea o le mamau, e mautinoa foi le malosi e tumau. E iai le “Ad” o lo’o o’u vaai iai i TV a Niu Sila e faapea, “When soldiers fall, heros rise.”

E agaga faapena le saili malo o aiga ma nu’u, ekalesia ma le atunuu, mo le faaauauina pea ma le faatumauina o le nofo fealofani, manuia ma le ola saoloto o ona tagata o nei, ma aso uma. O le upu a le tusitala, ua oti Mose. Ua  tofia e le Atua lona sui o Iosua. O upu a toeaiina i aso faapea, “Ua pa’ū se toa, ae tulai se toa.” O lea ua uma le fitā i tūgā sa tauasa mai ai Isaraelu i le toafa i tausaga e tele. O le mea lilo lea o loo taoto mai luma, o le nuu e leai sō latou e iloa, ma le ituaiga olaga e le malamalama iai pe faapefea. 

O le Amataga o le Esoto (Walk Out)! o le vaeluaina o le sami ‘ula’ula. Sa ta’iala le Ao faaniutū ma le Afi faaniutū, a o Mose sa tu i le foe. ‘O nei i le faai’ui’uga o le Esoto, o le vaeluaina o le vai o Ioritana. Ua taiala le Atolaau o le Feagaiga, a o Iosua lea ua tula’i mai.

 O Iosua o le toa e telē lona fatu. Ua masani. Ua leva ona tautua ma taumulimuli ia Mose. Sa fai ma lima taumatau o Mose. Ua fetaui iai se isi upu a le atunuu, ‘O le ala i le pule o le tautua.’ E talitonu i le Atua o ona tamā; na te iloa foi vaivaiga o le nuu. Ua faailoa iai e le Atua mea uma e manuia ma soifua fiafia ai le nuu i le laueleele uma ua i le isi itū o le Ioritana. Pau moomooga o le agaga, ia soo-‘afa faiva o tama. O fausaga sa fafau ai Mose e le Atua, o le malosi foi lea e ao ina fausia ai Iosua.

Soo se toa lava, e ā’oga i mea uma. E le puupuu se taimi e koleni ai. E tofo i tiga uma o le tautua. E le faapea e fanau mai loa, toa loa – Leai. O le pule (matai) faa-Samoa anamua e le faatauina i tupe poo le maualuga faale aoaoga (secular education). O le filifiliga foi o taitai a le Atua e le o le mătua poo le malualii – Leai. O le loto (I Samuelu. 16:7; Galuega. 9:15,16). E toa i le amio, toa i le loto. E le o le amio fia viia ma le loto faaalialia. Leai, o le amio paia ma le loto paia. O le olaga ua pulea ma taitai’ina e le Atua. E le tuulafoaiina e le Atua. E leai foi la sē e tu ma faasaga tau iai (f.5).

O toa filifilia a le Atua, e fili mai le faamaoni ma le alofa. Pau lava na o ituaiga e silafia e le Atua e mafai ona ola ai lona nuu, ma saoloto ai ona tagata (Ioane 21:15:13).Amuia oe pe afai o faapena se taitai o lou aiga ma lou nuu. O faapena lou pule, lau faifeau, ma ou taitai faale lotu ma le malō ? Manatua foi tatou a seki mai luga ua ‘ok’ foi lalo e pei o la Solomona (Faataoto. 29:2). E le taumuimui se toa. E le sailia e ia sona lava lelei. E le lama i masei pe taui ma sui. E le vaai atu loa i faigata tulei loa iai le vaivai ae lafi. Na te le faaoso i tauvesiga. E lē lima vale ma ‘ai fano. Na te lē pule malosi foi i mea faitele a aiga, nuu ma aulotu, ekalesia ma le atunuu. E le taufaifai ma taufaaleaga, ae alofa i soo se tagata. E fai ma siliaga o mea lelei. O lana tofā ma lana faautaga e mapu iai aiga ma le nuu. O lona ola ma lona alofa e laveaiina ma faaolaina ai le tagata lima vaivai. E tu mai i le aso vale.

O le nuu lea ua poloka i le isi itu o le vai o Ioritana. E leai se isi e sao i le isi itu. A o le faamoemoe o le nuu e ō i le isi itū. O le vaitau tonu o le sua tutu’i o le  vai i tausaga uma. O le vaitau o le seleselega. E lofia uma augutu o le vai i le tai o’oo’o o le loloto o le suavai. O lea ua tulimata’i e le nuu le taitai fou. A o Iosua, ua le i popole lava ia, auā ua fausia lona loto i le Atua. Ua talitonu i le auai o le Atua e ala i le Atolaau o le Feagaiga. Ua tumau lava ia i tulafono ma poloaiga uma a le Atua e pei ona taiala ai Mose. Ua le ‘alo ai Iosua i le itu taumatau poo le itu tauagavale, a ua fai ma ana meaai i le ao atoa ma le po. Ua ia faatonu toeaiina ma faitaulaga, o ē malolosi ma le nuu atoa uma lava. Ua ia tautino ia te i latou le taimi a le Atua ma le faamoemoe mo le laasia o le ‘Ala Fou’ e saunia e le Atua e savavali ai (f.4).

O le telē ia o le lu’i o loo ua amata ai le tula’i mai o lenei toa talavou. Amata i le faafesāga’i ma le Ioritana i ona tai o’oo’o. E lē taumate ua toe mānatu le nuu ia Mose ma vavega a le Atua nai le sami ulaula. Peita’i, o upu amata a le Atua, ia Iosua, “Tulai ia, ia sopoia atu Ioritana lena…” E le i masalosalo Iosua i le faatonuga a le Atua. Poo a lava foliga tau faamata’u o le Ioritana, o le faatonuga, kolosi le vai!  Faigofie pe faigata, kolosi. Mamafa pe ā, savali! Oti pe ola, ō i luma! Mata’utia faiga a le Atua i le nuu lenei! Faatonuga a Iosua i le nuu, Sauni! Tāpena toe tolu aso, ona latou sopoia atu loa lea o Ioritana….. O loo tuufesili loto o tagata pe iai ni vaa poo se ā se mea e ono momoli ai latou i le isi itu! A o le loto o le taitai o loo i le Atolaau a le Atua. E talitonu ma faatuatua i le Atua. E faalogo ma usitai i le Atua. E faia lava e le Atua vavega ma faailoga tetele ma le mata’utia, faapei ona ia mafuta ma taitaiina ai Mose.

O lona uiga, o loo fetaui lava la le ‘afa ma le ‘afa; o le fau foi ma le fau. O mea ia e lua, e foliga mai e faatauvaa, ae malolosi.

Samoa e, o le malosi lea sa fau faapitoa e le Atua i lana foafoaga mamana. O oe tamā.  O lou faiva, e te tausi, e te leoleo, e te fafaga, e te faatupu atili le ola manuia ma le fesanisania’i o mea uma o le foafoaga. O oe o le “Tausi Oloa” a le Atua. O le lalolagi ma mea ua tumu ai, o le oloa a le Atua. O oe e malu ai. E le māmā ou faiva tamā. O loo tulimata’i oe a le Atua e tusa ma le faamoemoe na Ia faia ai oe. E te lua soo tau’au ma tinā ina ia faigofie ma māmā. O ‘e fai lotu i afiafi i le aiga, poo e faavalevalea pea lava i fale kalapu ma fale siva?  O ‘e mafuta iā tinā ma tamaiti, po’o ‘e ‘ai sau pea ma faataugā lou tofi “o le tamā” e le alii o le lalolagi? Uso e, tamā, e soo le ‘afa ma le ‘afa; a o oe, e maua ai e le aiga sootaga mafanafana. E soo le fau ma le fau; ae na o oe lava tamā o loo momoo mai iai le fia mafuta o tinā ma le fanau. O oe e avea le aīga i le isi itu o le Ioritana. O oe o loo tulimata’i e le Atua mo faamanuiaga o i tala atu o le vai. Manaomia oe tamā ia telē sou loto. E te loto atu i le Atua. Ia pule le Atua i lou loto, ona e manumalo lea i le pouliuli ma le loloto o le Ioritana. Tamā e, o Samoa, ua uma ona folafola e le Atua manuia i o tatou tuaā ua mavae faapei ona folafolaina ia Aperaamo. Taitai le nuu i le laufanua o folafolaga. Faaoo le nuu i le isi itu o le vai. Eleele o faamanuiaga. O iai le susu ma le meli. O iai le ola mălie. Fausia lou loto i le Atua. Faavae ou faiva i le alofa. Ona le siligia lea o lou toa i ou tiute faatamā, e momoli ai lou aiga i manuia o le Atua o loo i tala atu o ou faafitauli. A ‘e vaivai, faasaga i mauga (Salamo. 121). A ‘e faalētonu, faalogo i le Atua. Fai mai le Atua, “Sopoia atu Ioritana lenā…ou te le tuua lava oe……aua e te fefe, ‘aua e te mata’u; auā o Ieova lou Atua o loo ia te oe i mea uma e te alu iai.” (f. 2, 5, 6, 9).

Tamā e, o Sāmoa, tula’i mai o oe o se Toa Faaola.

Manuia le Aso Sa o Tamā.

 

Amene

 

7737063/7783782

© Samoa Observer 2016

Developed by Samoa Observer in Apia