E le fa’ailogaina lava le faigata o galuega fai

Tusia Fetalai Tuilulu’u ma Aruna Lolani ,

71 Hits

Le tama galue malosi ia Mautofiga Lupematasila, 66 o Levi Saleimoa

Le tama galue malosi ia Mautofiga Lupematasila, 66 o Levi Saleimoa

O le olaga nei e leai lava se nofo ma fa’alagolago i se tagata. 

O le manatu lea o Mautofiga Lupematasila o Levi Saleimoa. 

“O la’u galuega lava lea o lo’o fai i aso uma e o lava le au faigaluega latou ia ae oute usu e fai feau masani ma toto ma sasa sina vao mo le faamamaina o le faatoaga” o lana tala mai lea i le Fofofga o Samoa

“O nei aso e pei ua faamoemoe lava le tele o tagata i tupe o lo’o maua ma i totogi ae ia te au lava ia e sili lava le faatoaga nai lo le faalagolago iai.”

“O nei vaitau o tupe lava ua talanoa ai le toatele ma atonu o le ala foi lea ua le toe fia gaulue ai nisi o tagata i le faatoaga ona ua faamoemoe tele i le tupe mai le galuega.”

“A fua atu i lenei vaitau ma aso ua alu sa faamoemoe lava tagata i le faatoaga ma le maumaga ma o le isi lea seleni pito i tele a nisi o aiga i aso ua mavae ao nei aso o le galuega lava ma ua faagalo ai le faatoaga.”

Ua maitauina e Mautofiga le tele o faigata ma luitau o lenei olaga ua feagai nei ma tagata. 

“O aso la sa taugofie lava le tau o le soifuaga aua sa galulue lava tagata i la aso ao nei aso ua faapalapala ma faavaivai.”

“Atonu o le ala lea ua maualuga ai le tau o le soifuaga ma e avea foi ma luitau i nisi o tagata i le toe foi lea e galulue i le faatoaga aua o lo’o nana lava i le eleele le tele o le mau seleni.”

“O nei aso o seleni uma mea uma fai o mea fai a aiga, ao le nuu foi ma le ekalesia ua talanoa lava i tupe mea uma.”

“Ae le taulia ai pili o le suavai ma le moli ua fai lava sina taugata ma ua le gafatia ai lava e nisi o aiga le totogiina o pili.”

Na ia ta’ua foi, e tu’uaia lava le tagata ma lana le galue malosi mo lona aiga ae aua le ola faalagolago.

“A galue lava le tagata ia mo lona aiga ae aua le ola faalagolago e leai se mea o le a sue gata ai fua ni meaai mo le tausiga o aiga ma fanau.”

© Samoa Observer 2016

Developed by Samoa Observer in Apia