Galue lava le tinā matua ia Taliilagi

Tusia Fetalai Tuilulu’u ma Aruna Lolani ,

70 Hits

TINA GALUE: Taliilagi Gaepu o Leusoali’i

TINA GALUE: Taliilagi Gaepu o Leusoali’i

O le tinā matua ia Taliilagi Gaepu o Leusoali’i na maua le fa’atalatalanoaga ma le Fofoga o Samoa ma o lo’o galue pea.  O le tina e 72 tausaga le matua le soifua. 

“E pei e tele na ou fa’alogo i tagata ua faitio i le alu i luga o le soifuaga."

“I lo’u a ia manatu e mo’i a e faigata uma i tagata ae pei a e faigata tele atu i tagata ia e to’atele aiga ae le tele se latou tupe maua."

“O le mafua’aga fo’i lena e pei ona tagataga’i mai o le a lava le matutua le soifua e galue lava mo le aiga." 

“E lelei a le galuega ae sa faimai lo’u to’alua o le taimi nei, e feololo a totogi aua tele a o vaiaso na o le ta’itolu aso faigaluega, e fuafua a i le lelei o le tau."

“Ia o maua e lei leva na ma omai mai Niu Sila, ia ma te fo’i mai ma le to’alua ua fai e tagata le ma maumaga."

“O lo’o iai le ma fanau i Niu Sila ae o maua lava ia e galulue e maua ai le malosi ma aua nei maua ni ma’i le tino." 

“O le fa’amoemoe o fa’i nei ia aua le aso sa taeao mea fai le loto ae le gata foi i lea o le fanau iti le vaiaso fou le aoga." 

“O lo’o lelei le eletise ma le vai i gauta i si o matou fale o lo’o lelei mea uma." 

“Ia o maua e i fafo foi le fanau, o lo’o fesoasoani mai foi e fai mea na ma o ma le tama o le aiga ma te tafafao i fafo ma asi le fanau." 

 “A lelei a se tupe maua, ua fa’atau fo’i se vaemoa aua le faiga o se mea’ai e tau sui ai se mea e ai i le fale ae o le tele a o le taimi, e lava a matou i le ipu ti ma le fa’alifu talo e ola ai."

 “Ua taugata tele le soifuaga ma o se tulaga lea ua mafatia tele ai tagata Samoa ma o lo’u a ia maitau ua to’atele tagata e mana’omia se fesoasoani i mea’ai ma meainu talu ai lea tulaga.”

© Samoa Observer 2016

Developed by Samoa Observer in Apia