Su’esu’e e Leoleo le toso faamalosi o se teine a’oga

Tusia Lanuola Tusani Tupufia ma Faaliliu e Seagaitumua Tupuola ,

241 Hits

O loo suesueina e Leoleo se faalavelave lea o loo tuua’ia ai le tosoina faamalosi o se teine a’oga o le Iunivesite Aoao o Samoa ina ua mae’a sauniga faamanatu o le Aso o Tuto’atasi i le vaiaso ua mavae atu. Na faamaonia e le Fofoga o le Ofisa o Leoleo o Maotaoalii Kaioneta Kitiona lea faalavelavae, fai mai o lea tamaitai a’oga e 20 tausaga-na lipoti lea faalavelave i lo latou nofoaga autu i Malifa. 

O le tagata o loo masalomia o se avetaavale o taavale la’upasese, e 39 tausaga le matua,” o le faaaliga lea a Maota.  “O lea faalavelave na tupu ina ua mae’a le savali ma o le taimi lea na alu ai lea tamaitai i se taavale la’upasese ma se avetaavale lea na ia ave o ia i se isi nofoaga ma faatino ai lea solitulafono.

Na maua e Leoleo lea alii i lea lava aso.”Fai mai Maota o lē o loo masalomia o le a tula’i i luma o le Faamasinoga i le aso 27 o Iuni 2016. 

I se isi mataupu e ese ai, o le isi mataupu tau toso teine na lipoti atu i Tuasivi, Savaii, e aofia ai se teine e i lalo ifo o le 16 tausaga le matua. Sa faamatala e Maota e faapea o lea soligatulafono na tupu ia Me ae faatoa lipoti atu i le aso 3 o Iuni. O lē na aafia ai o se teine lea e 14 tausaga le matua mai se nuu o Savaii ma o le isi tagata solitulafono o se alii lea e 18 tausaga le matua.

O le ua tuua’ia o le a tulai i luma o le faamasinoga mo le fofogaina o lana mataupu i le aso 27 o Iuni, 2016.

© Samoa Observer 2016

Developed by Samoa Observer in Apia