Selesele le Aufaifa’atoaga i le taui e $2.5miliona

Tusia Sarafina Sanerivi ma Faaliliu e Seagaitumua Tupuola ,

178 Hits

E sili atu I le limasefulu le ‘aufaifaatoaga mai le salafa o le atunuu-sa ta’ito’atasi ona maua se ponesi e $1,000 e tusa ai ma le polokalame o le ‘Stimulua Package’lea na faatino a le Matagaluega o Faatoaga ma Faigafaiva.

O le Aso Lulua na potopoto faatasi ai le ‘aufaifaatoaga i le Maota o Pulenuu i Matagialalua, e tali a latou ponesi..O le Polokalame o le ‘Stimulus Package’ na amata i le 2010. Sa fuafua e toe faaolaola ai le toe totoina o le niu, kofe ma le alamanuia tau le koko i totonu o Samoa.

O le Minisita o Faatoga ma Faiga-faive o Laaulialemalietoa Leuatea Schmidt, na saunoa mo lea potopotoga, ma na ta’ua ai le taua o lea polokalame, ma lona sao i le tamaoaiga. “O le Matagaluega o Faatoaga ma Faigafaiva o se matagaluega lea o le foafoaga a le Atua,” o lana faaaliga lea.

“O i tatou o tausi-mea o le foafoaga a le Atua ma e tatau ona tatou tausi i ai ma ia faaaoga ma le tatau.” Na ia faatauaina le taua o faatoaga e tusa ai ma atiina a’e tau le tamaoaiga.I le taimi muamua na tuto’atasi ai lo tatou atunuu, o faatoaga ma faigafaiva o punavai autu ia o tupe maua i totonu o Samoa.

E sili atu i lo le 50 pasene o a tatou tupe maua e maua mai faatoaga ma faigafaiva. “Ae ui o lea, ua sui lena tulaga i le tele o tausaga. Ma ua o’o i le taimi tatou te faia ai se mea e toe aumai ai na taimi,” o lana faaaliga lea.

“Sa masani ona tatou faalagolago i le tele o a tatou faatoaga ma faigafaiva e maua ai tupe. Ma ua tilotilo le Matagaluega i le taimi nei i le toe faaleleia o le tatou galuega –ina ia mafai ai e la tatou Matagaluega ona toe fo’i i tua i le tulaga malosi sa i ai muamua.”

I soo se mea lava o le olaga nei, fai mai Laauli e anoano suiga ua i ai. “Matou te le tusitusi lima talu ai-o na mea na tutupu I le taimi ua te’a,” o lana faaaliga lea.” “Ae peitai-e mafai ona aoaoina tatou mai na mea sese ma faaletonu ma ua o’o i le taimi tatou te o mai faatasi ai ma matua galulue malosi, limalima ina ia mafai ai ona manuia lenei polokalame.”

E tusa ai ma Laauli, e $2.5 miliona ua tufafuta atu i le aufaifaatoaga. “Fai mai le Tusi Pa’ia e te selesele i le mea na e luluina, ma e faaaoga foi lena upu ia i latou e matua galulue ma le tiga.” Sa folafola mai e Laauli i le ‘aufaifaatoaga e faapea o le a galulue faatasi o ia ma le Matagaluega ina ia talai ai faitoto’a mo le maketi e la’u atu i ai oloa i atunuu mamao.

“O le mea lea-pau lava le mea e ao ina outou faia o le totō ma tausi i nei oloa ma o le a matou fesoasoani atu ia te outou mo le auina atu i maketi i fafo. Fai mai le Ofisa Sili Lagolago o Pulega mo le Vaega o Laau Totō a le Matagaluega o Faatoaga ma Faigafaiva o Mr. Misa Konelio-o lea polokalame ua leva ona faagasolo i se tulaga lelei talu mai le taimi na ulua’i faatino ai.

“O lo matou faamoemoe ia maua se 500 o le aufaifaatoaga e galulue i lenei polokalame,” o le faaaliga lea a Misa. “Ae o le itu e faanoanoa ai-ua le mafai ona matou maua se 500 o le aufaifaatoaga i totonu o le lua tausaga muamua o le polokalame.

Ae ui o lea, i le taimi nei, o lea ua maua le sili atu i le 500 o le aufaifaatoaga-ia o loo galulue i le taimi nei Matagaluega i lenei polokalame. Talu mai le 2010, o le aufaifaatoaga muamua na amataina lenei polokalame o lea ua selesele i fua o a latou faatoaga ma ua fiafia foi i le vaai atu o loo lelei pea ona faagasolo la tatou polokalame.”

Ae ui o lea, sa ta’utino e Misa e anoano lu’itau ma faafitauli i le faagasologa o lenei polokalame. “E toatele le aufaifaatoaga sa faaseā mai e faapea o le lua eka na tuuina atu ia i latou ua matua tele lea mo i latou, ma o nisi sa le tumau ia latou galuega ma le mea sa manaomia ina ia latou faia.

Ae peitai o lea ua tilotilo le Matagaluega i le taimi i ni ala e mafai ona ‘alofia ai nei mataupu.”

E tusa ai ma le ‘Stimulus package, e maua fua e le aufaifaatoaga fatu e totŏ. E faatino foi e le Matagaluega asiasiaga pupuu ma talanoaga sa’oloto e fesoasoani ai ia i latou.

Ma a mae’a le tausaga e tasi, ona avanoa loa lea o le aufaifaatoaga i se ponesi tau tinoitupe e $500 i le eka o le fanua e toe totoina i le niu, koko poo le kofe, ma o lea lava aofaiga o tupe o le a tuuina atu i le aufaifaatoaga i le tausaga lona tolu o le polokalame.

Ae ui o lea, o le tausaga lona fa o le a maua ai e faifaatoaga ta’ito’atasi le $2000. O le ponesi e tusa ai ma le faaaliga a Misa e faatoa totogi atu pe afai e faamalieina e le faifaatoaga mana’oga uma o le ‘stimulus package.’

Ina ia mafai ona agavaa mo lea polokalame, e tatau ona totogi e le aufaifaatoaga se totogi mo le resitalaina e $100. E tatau foi ona ia i latou ni eka se lua o eleele e le’i faato’aina mo ia laau toto. O le taui mo lea itu, o le a tuuina atu e le Malo laau totŏ.

O le ‘stimulus package’ e mo le fa tausaga ma se aofaiga e WST4,000 e tatau ona maua e le faifaatoaga i le faaiuga o lea vaitaimi.

© Samoa Observer 2016

Developed by Samoa Observer in Apia