TALATUU O SUA MA LE VAIFANUA

674 Hits

O nei itumalo e lua ia e taape solo o latou nuu e pei ona vaaia i le faafanua- e aofia ai le itu atoa i sasa’e o le motu se’ia vagana ai le Motu o Aunuu ma ni nuu se lua e pei o Amouli ma Alofau-ia e tusa ai ma itu tau faiga-malo e faasino i Aunuu, ae peitai, e taoto o le motu autu.

A tuufaatasi la itumalo i sisifo o lenei itumalo-e pei o Fofo ma Itulagi-ma Sua ma le Vaifanua- ona faapea lea o le malo lena o Tutuila. O Sua ma le Vaifanua e pulea e le aiga malosi o Le’iato, o se tasi o ona lala e faamautu i Fagaitua poo le nofoaga sa’o lea o Sua, ae o le isi nuu o Sa’ilele e latalata i A’oa, poo le nofoaga autu lea o le Vaifanua.

O Le’iato la ma ni tulafale e to’alua e faafoeina mataupu o le malo o ia itumalo e lua; latou te faaigoaina o le fono tele i taimi uma lava e fai ai i Tutuila. O le pogai lea ua tuufaatasi ai Sua ma le Vaifanua ma ua i ai lava lo la faalupega faapitoa.

O le Ao Tetele la o Sua ma Vaifanua e faapea:-“Tulouna Sua ma le Vaifanua; Tulouna Lau Susuga Le’iato ma le Alataua; Tulouna Pele ma ‘Aulava; Tulouna Masaniai ma Tuiasosopo; Tulouna Mana ma Talo’ Tulouna Lea’anā o le Ma’ava a Sua ma le Vaifanua. 

SUA: O le Falelima foi lea i Sasa’e- e mafua ona e to’alima tulafale o loo i Fagaitua e pei o Vi, Peai, Leota, Talauega ma Utofili. 

FAGAITUA: E taoto i sauté i le va o Laulii ma Alofau i luga o se faga papa’u. O iinei e i ai le ‘Maota o Alii’ a Le’iato e igoa u Luafagā, faatasi ai ma se Malae Tele e igoa o “Laloifiileone”.  O ona Upu Taoto ia:- Tulouna 

Sua ma le Vaifanua; Tulouna Oe le Alataua; Tulouna Lau Susuga Le’iato; Tulouna ou tafatafa; Tulouna Tamatane a Mana-o Ti’a ma Ana; Tulouna oulua Leoleo o le Maota; Tulouna lau Fetalaiga Vi ma Peai; Mamalu mai lau Fetalaiga Leota o le Taunuu; Tulouna le Aiga o Le’iato o Fiaseu ma Igafo; Tulouna Lau Susuga Togiola-o Le’iatotuafanua; Tulouna Lau Tofa Talauega; Tulouna Lau Susuga Lauatua’a; Tulouna Lau Tofa Utoafili-o le Manu o le Tuasivi e Fagota i le tailua; Tulouna Oulua Ma’upu- o Savea ma Tialavea; Mamalu mai la’ia Oulua o Leoleo o le Maota.

© Samoa Observer 2016

Developed by Samoa Observer in Apia