Popolega o le Minisita ona o le Mu i le Uafu.

Tusia Lanuola Tusani Tupufia ma Fa’aliliu e Maiava ,

317 Hits

Papalii Niko Lee Hang

Papalii Niko Lee Hang

O le malu-puipuia o soifua i luga o le uafu, o le tausisia o le saogalemu lautele ma le fa’aaoga tatau o le meaalofa-foa’i-fua a Le Atua i le tagata-ola, o vaega tonu ia o lo’o taula’i iai le silasila a le Minisita fou o Galuega, Fela’ua’iga ma Galuega Tetele a le Malo. 

So’o se galuega lava e a’afia ai mea-tau-afi, e faia latalata i tane-suau’u tetele i luga o le Uafu i Matautu, o se pomu ua fa’atalitali e pa. O le finagalo lea o le Minisita o le Matagaluega o Galuega, Fela’ua’iga ma Galuega Tetele, le Susuga a Papali’i Niko Lee Hang, ma fa’aopopo mai ona popolega tele sa iai, ona o le tane lea na mu i le vaiaso talu ai. 

O le tulaga lava lea na fa’aalia e le Ali’i Palemia, Tuila’epa Sa’ilele Malielegaoi, na fesiligia ai le agava’a o le ‘aufaigaluega a le kamupani suau’u – le PPS sa fa’atinoina le galuega.

Le galuega lea na mafua ai ona ma’umau le soifua o se ali’i-faigaluega e 31 tausaga a le kamupani, ina ua pa le tane.  

I se talanoaga a le Samoa Observer ma le Afioga a le Ali’i Minisita e i lana va’aiga le uafu i Mataupu, na saunoa ai, e le-malamalama lava i le faia o lea galuega e a’afia ai mea tau-afi, i tane-suau’u nei.

“O le mea moni lava, ‘ou te matua le-malamalama lava, i le mafuaga na faia ai ia galuega-uela i tane nei ae o lo’o tumu i suau’u,” o lana fa’aaliga lea.

“O le uiga o se fa’amatalaga, i so’o se pamu-penisini lava i Samoa nei po’o atunu’u mamao, e le mafai ona fa’aaogaina lau telefoni-fe’avea’i pe ulaula ai fo’i i nofoaga nei, ui o nai tama’i-mea ia mea.

A’o le fai o ueloga i le tane a’o tumu i suau’u…e matua mata’utia lava le leai o se mafaufau. O lea sa faia le uelo i luga o le tane…   o se pomu ua fa’atalitali e pa i se taimi.” 

Ui fo’i i le le-malamalama o Lana Afioga i nei galuega-fa’aleleia, ae na ta’ua lava, e iai lava le fa’atamala o le Vaega o le Pulega o Uafu a Samoa, lea e va’aia tagata e ulufale atu ma ulufafo ‘ese mai le uafu. 

 “E iai lo’u manatu e leai se isi (leoleo mo le puipuiga) sa iai i le taimi lea, ae se’i fesiligia po’o ai tagata nei ma le latou galuega e faia i luga o le uafu,” o le saunoaga lea a Papali’i. 

“Tatau lava ona latou iloa lelei, e le tatau ona faia o se galuega, ona o lo’o iai le suau’u i le tane. Na ‘ou matua te’i lava ina ua fa’alogoina se pa-leotele pei o se mafui’e. Ae ‘ou va’aia loa se mea o lelea atu i le ‘ea a ua mu le tane, ua sau le asu i fafo.”  

I le polokalame a le Palemia ma le ‘Au-fa’asalalau i le Aso Tofi, na fesiligia ai e Tuila’epa, pe agava’a tagata-faigaluega a le PPS sa faia le galuega lea i le tane.

“Sa tatau lava ona iai se tagata fa’apitoa ua mae’a ona a’oa’oina lelei i lea ituaiga galuega,” o lana saunoaga lea. 

 “O le mea lena tatou te le-iloa. Pe iloa e le tagata-faigaluega lea, uelo se mea, pe na a’oa’oina i lea galuega, aua o galuega nei, e mo’omia ai tagata ua a’oa’oina fa’apitoa, e malalamalama lelei i le faiga o le galuega. Ioe, tatou te le-iloa i tagata-faigaluega nei pe ilafia fai le mea lea.” 

Ae na ta’ua e le Fa’atonu o le kamupani-suau’u, Fanene Samau Etuale Sefo, e fa’atagaina lava i le tulafono ona fa’atino galuega fa’apea, ma ua mae’a fo’i ona fai o le pemita o le galuega lea sa taumafau e fa’atino i le Aso Gafua. 

O lo’o feagai nei le Matagaluega o Leoleo ma ali’i-su’esu’e fa’apitoa mai Ausetalia, ma le su’esu’eina o le mafuaga o le mu o le tane lea i le Aso Gafua talu ai. 

© Samoa Observer 2016

Developed by Samoa Observer in Apia