Fau ‘Oe ia Manuia (Vaega 1)

Tusia Fa’aliliu e Maiava ,

186 Hits

Toe mafaufau tasi lava… “E mafai lava ona manuia so’o se tagata, tusa po’o le ā le mativa sa i ai lona olaga i le amataga.” O le fa’aaliga manino lea a Clement Stone, o se ali’i faiPisinisi manuia na amata lona soifua galue, fa’atoa 16 tausaga, ma e ulu-ulu fale solo e fa’atau inisiua.

E uma ane le fa o tausaga, ua fai lana lava lala-tauInisiua, ae mulimuli ai, pulea e ia lana lava kamupani inisiua, e silia i le $150 miliona le tau aofa’i. 

Fai mai lea ali’i, e tatau ona polokalame lelei o tatou tagata ina ia manuia, e pei lava o le polokalameina o se masini komepiuta. E moni o le komepiuta fa’anei-ona-po, e na o se masini faigofie, ae le fa’atusalia ai lava le ma’ati’ati, le atamai ma le malosi o le komepiuta o le mafaufau o le tagata soifua. 

O le asō ma taeao, o le a tatou talanoa ai i vaega mo’omia e tolu, e ao ona polokalame i totonu o lou tagata ia e manuia ai. Muamua, o le vaega aupito tāua fo’i lea, o ou manatu fa’atupu-lagona e faia ai le filifiliga aupito sili, e una’ia ai

‘Oe i le fa’atinoga aupito lelei mo se suiga fou manaia. O se ali’i mauoloa e fai sana Kamupani mo teuga a tama’ita’i, na fa’amatalaina ana metotia lililo na mafua ai ona manuia lana pisinisi. Fai mai a ia:

“Ou te le’i folafolā lava i se tama’ita’i, amea o a’u oloa, e ‘aulelei ai, ae ou te fa’amalosi’au pea iai i le tele o taimi, ina ia to’a’aga pea e fa’a’Aulelei atili latou.  

A leai se fa’amoemoe e fa’aleleia ma faia ai ni suiga fou, e le mafai ona fa’aosofia lou tagata. O lou fa’amoemoe, o lou talitonuga malosi lea e fa’ataunu’u ai miti ma mo’omo’oga o lou olaga.

E tatau ona e talitonu i aso uma, ua e tu-lalata i lou fa’amoemoe; aua o lena ua e iloa, o lo’o e faia le mea tonu e fa’ataunu’uina ai. E le na o le talitonu i ai, ae amata nei ona galue aga’i i ai - i itula uma ma aso uma - se’ia ta-mau i lou mafaufau, lou olaga atoa ma galue ai  pea i aso uma. 

O le tasi ‘auala malosi e fa’aosofia ai, o le tago e fa’ata’ita’i. O Clement Stone, sa iai lana fa’atau-oloa talavou e le-talitonu, e mafai ona ia fa’ataua ni inisiua i ituaiga tagata e nonofo i lona taulaga.

Ona alu lea o Stone ma ‘ave le ali’i talavou lea, la te galulue i le tasi aso, na ona fa’asino lava iai. Na tu’u fesili iai Stone, e uiga i tagata o lona pitonu’u. Na tatalo Stone ma talosaga i le Atua, ia fesoasoani atu ina ia na faia le mea silisili.

Mulimuli ane, ua talitonu Stone, ua aga’i atu i lea fale ma lea fale e fa’atau le inisiua, i tagata uma e talanoa i ai i lea aso! O tagata tonu lava nei, na fai mai le ali’i talavou lea, e le manana’o e fa’atau ni inisiua.

Ae ā pe ā amata i le asō? Tatalo ma le agaga fa’amaulalo i Le Atua, ia avatu Lona fa’amoemoe moni, Lona malosi e amata ai ona sui nei o lou olaga. Na o Ia e atoatoa ai mea uma, e suia ai ou ala ma lou olaga, manuia moni ai ou ala e pei ona mana’o ai o Ia i taimi uma.

Toe mafaufau tasi lava…

© Samoa Observer 2016

Developed by Samoa Observer in Apia