Faataua le ola galue, ae aua le faalagolago

Tusia Seia Soloi ,

78 Hits

Siutā Komiti.

Siutā Komiti.

O le mau lea a le tama ia Siutā Komiti,51-tausaga mai le afioaga o Nuu-Fou ma Fusi,Safotullafai, ia galue lava le tagata ia mo lona aiga ae aua le ola faalagolago.

O le alaga tupe o lo’o faamoemoe iai lona aiga i le lumanai, o le faatoaga, aua o lona talitonuga e sili atua i le tele o tupe e maua e tagata pe a galue malosi ae aua le ola faalagolago.

“Pau lea o le tulaga o lo’o faamoemoe iai lo’u aiga, e faigaluega lo’u atalii, ae o lo’o tausi foi si ona ia aiga, o tupe e maua mai i tautalo o lo’o faatau, e mo mea fai a le aiga” o lana tala lea i le Fofoga o Samoa.

O lo’o faatauina lana maumaga talo mo le $20tala, ma na ia faailoa o le tupe vave toe lelei lea e mai I le maumaga.

Sa fealuai taxi muamua, ae ua ala ona nofo ona ua le maua se mafutaga fiafia o ia ma le fanau, ma o le maumaga le alaga tupe mo ia ma lona aiga.

“O lo’u ia a manatu, e tele le tupe e maua mai i le faatoaga, ae e maua ai foi ma meaai aua le tausiga o aiga sefe mai ai ma le tupe faaaoga, aua o aso nei o faalavelave a mea uma.

Pau le tulaga o lo’o faaalu ai tupe a le tama, ua na’o pili o le paipa ma le moli ma faalavelave fai a totonu o le aiga, aua e faalavelave lava aso uma.

Ua ia faailoa foi, o le tau o le soifuaga e le’o se mea fou nei lava.

“Ua tele faitioga faapea ua taugata le tau o le soifuaga, ae e ala ona taugata ona o le tagata lava ia ma le le galue malosi, ua tele i le faavaivai ma le faapalapala.

O le faamuamua a le tama ia Siuta o lona aiga lava ma le tausiga mo aso uma.

“O le mea sili mo a’u ia aai la’u fanau ma ia lelei le tausiga o fanau, aua o galuega lava na a matua, e faamuamua lava manaoga o fanau mo le lumanai manuia.

© Samoa Observer 2016

Developed by Samoa Observer in Apia