O la’u tala fo’i

11 March 2016, 12:00AM

1`. Matauina ma le ofo i Tala Fou le fasiotia o tasi o tina matua ua penisione.

O le tulaga mata’utia la o lea tala fou-poo ai lava na fasiotia lenei tina-ailoga e i ai sona tina? A le o lena foi-ailoga o se tagata soifua vae atu lava le atunuu! O lenei la faalavelave-ua taunuu ai le upu-ua matua le iloa lava pe o fea o i ai le aganuu a Samoa?

A le o lena foi-o fea o i ai aga masani a nuu ma alalafaga ta’itasi o Samoa?

Afai o se tina lea ua afaina –e ofo le loto –masalo o ai lava na faia lenei solotulafono-masalo e faaletonu lona mafaufau i le tele o fualaau faasaina ma le marijuana! Masalo ana tulai mai lenei faalavelave ae lei taunuu mai le Tala Lelei-o lona uiga tatou te toe foi lava i aso pogisa o le taui o le toto i le toto-leaga o se tina matua o le isi aiga lea ua afaina!

Ae o le fesili lava-ua malaia ‘ea Samoa ona o le tulai soo mai o nei amioga mataga ma le faatautala! Afai na taunuu mai le Tala Lelei i Samoa i le 1830- ae o loo pogaisa pea Samoa talu ai nei faiga-pule ‘oe ae o le taofi vaivai-e le taumate ua agai atu Samoa i Seoli pe a fua i le malosi o le fasioti tagata-gaoi ma le faomea, toso tine, faaaoga sese o tamaitai ma o le atunuu ma sauaga i aiga-o le fesili- o le a le pogai ua faaapea ai? O le a sou taofi?

2. Matauina i taimi uma laufofoga fiafia o tamaitai o le atunuu ina ua mae’a le Faiga-Palota Lautele a le atunuu talu ai nei. Ia afai la ua matua fiafia tamaitai o le atunuu i lenei vaitaimi- o ai a tio pe afai o le 1962 na tuto’atasi ai Samoa ae o lenei faatoa saofagā tamaitai i totonu o le Palemene? Afai la ua tele tausaga ae o lea faato’ā pale mai nisi o tina- ia atonu o se mea lea ua sili ona lelei ma ia tatou viia ai le Atua!

A tatou tilotilo la i le tulaga pagatia ma le mativa ua i ai nei le atunuu-o lona uiga la- atonu e na o tamaitai e mafai ona tatou faamoemoe i ai- latou te faia se suiga-aua o le upu moni-ua savali i le 40 tausaga o faafoe e le faigamalo le HRPP le atunuu-ae o lea lava e leai se mea o faia mo le manuia o le atunuu -lea e tatau ona ave i ai le faamuamua.

O le mea lea ua matua aliali mai-o le faamamafa a le faiga-malo e na o galuega tetele lava aua o lea e maua mai fafo tupe e fai ai-ae o le atiina ae lava ia o le atunuu -i le itu tau le soifua o le tagata i aso fai pea ma le faateteleina o tamaiti i luga o ala tetele e faatau atu oloa ma aisi solo i tagata-ua lava ma totoe lena e faailoa atu ai i le lalolagi atoa le tulaga ua i ai nei Samoa! Faamata la e mafai e tamaitai faipule fou ia ua faamanuiaina mai le faiga-palota talu ai  nei- ona faalelei le tulaga o loo i ai nei le atunuu? O le a sou taofi? 

3. Matauina foi i Tala Fou se ulutala e faasino i le Tautua Samoa Party-fai mai o le “Three Musketeers”-ma o lona uiga la- ua lava ma totoe ia sui usufono e to’atolu e faia le taua e pei o le Three Musketeers moni. Afai la ua faaigoa ia sui e to’atolu o le Tautua Samoa Party o le “Three Musketeer”-o lona uiga la-e matua le mafai lava ona tutū mai le HRPP i le To’atolu lea –leaga e tele ma anoanoa’i auupega o loo i ai! Pe to’atasi foi pe to’alua ae leaga o matua tama sasa’o lava. Pe to’atasi foi- fai mai le upu e le atunuu _”E gau lava le sila i le fa’i” –o lona uiga la-poo le a lava le tele o fa’i- e gaui uma lava pe a sasa i le sila! O le a sou taofi?

4. Matauina i le Tala Fou-fai mai na tatala e le Palemia se FonotagaTau Turisi-ma o le faitau i lea fonotaga-o se taumafaiga lea ina ia una’ia le Alamanuia Tau Turisi a Samoa! Ma o lona uiga la-ua tau le o mai ni turisi i Samoa poo ua faaitiitia pea i lea tausaga ma lea tausaga. O lona uiga la- afai ua tau le o mai ni turisi i Samoa –o lona uiga-e leai nisi mea fou e mafai ona faapea e le’i vaaia muamua e Turisi- i Samoa nei. 

Poo fea foi e o’o i ai le lelei o le auaunga a Fale Talimalo o le atunuu-ae ia manatua-o na mea uma-e mafai foi ona maua e turisi nisi mea lelei e sili atu i isi atunuu i lo le tau o mai i Samoa! O lona uiga la- ua tatau ona fai se suiga e matua uiga ese-ona faatoa toe mafai lea ona faatosina mai turisi i Samoa nei.

E mafai ona avea ma se tasi o ia vaega le faaleleia o auaunaga a fale talimalo-ae ia manatua-foi e sili atu ona manaia fale talimalo i fafo-ma latou auaunaga-ma atonu foi e taugofie mo i latou ona o i ia atunuu i lo le o mai i Samoa nei! Ae tasi lava le faiga e mafai ai ona faatosina mai turisi e toatele iinei! Muamua- fai se tatou nofoaga o faafiafiaga poo se Cultural Centre e pei o Laie i le Eleele Fou- una’i turisi e nonofo i nuu i tua ina ia mafai ona malamalama i le tatou aganuu.

O lona uiga –a i ai ni turisi e fia nonofo i nuu i tua-ia fai lelei feutanaiga ma sea nuu. E tasi lava le po e moe ai le turisi i le ta’inamu i Samoa nei-ma auai i faafiafiaga ma taaloga i nuu i tua- e le mafai ona toe galo ia te ia lena tulaga. E le o se faatonuga la –ae o se taumafaiga ina ia tulaga ese lava Samoa i le Pasefika atoa- ona faatoa lolofi mai lea o turisi! O le a sou taofi?

11 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>