Ofisa Sili fou a le Pulega o Auala ma Fela’uaiga o le laueleele

Tusia Deidre Tautua-Fanene ,

49 Hits

Ofisa Sili Fou o le Pulega o Auala ma Fela’uaiga o le Laueleele, Ta’atialeoitiiti Agnes Tutuvanu-Schwalger.

Ofisa Sili Fou o le Pulega o Auala ma Fela’uaiga o le Laueleele, Ta’atialeoitiiti Agnes Tutuvanu-Schwalger.

O lo’o ua i ai nei le Ofisa Sili fou a le Pulega o Auala ma Fela’uaiga o le Laueleele.

O le tama’ita’i o Ta’atialeoitiiti Agnes Tutuvanu-Schwalger ma o ia lea o le a suia nei i le ali’i o, Leasi John Galuvao, lea sa tauaveina le tofi mo le 9 tausaga.

I le fa’atalanoaga ale Sunday Samoan ma lea tama’ita’i sa ia ta’ua ai lona loto maualalo, aemaise le talitonuina o ia e le Kapeneta e nate tauaveina lea tofi.

“Ua fa’amanuiaina a’u e le Ali’i e ala lea i se fanau e to’atele ma se to’alua lelei,” o lana saunoaga lea.

“O lea fo’i ua toe fa’amanuiaina a’u e le Ali’i e ala i lenei tofiga ta’ua.

“O nei fa’amanuiaga uma e auala mai lea i ni matua lelei ma le fa’amaoni sa ou ola mai ai.

“E fa’afetai ai lo’u aiga ma lo’u to’alua ona le latou lagolagosua mo a’u pe a o’o i taimi e mana’omia ai le latou fesoasoani.”

O le ofisa sili fou ua fa’aipoipo atu i le ali’i o Fuimaono Dominic Schwalger. 

E to’atolu le la’ua fanau o D’Angelo John, Bernadette Tamasa’ilau ma Ignatius Wilhelm Schwalger. 

O le alo o John ma Lidwina (nee Sapolu) Tutuvanu, ma e sau mai i afioaga o Vaiala ma Amanave, American Samoa. 

Sa ia fa’afetaia ana pule muamua ona o lona sao i lona olaga galue.

O latou nei e aofia ai Leasi Galuvao, Seimaleula Sinapati Ulberg ma Seugamaalii Jammie Saena.

Sa ia fa’afetaia fo’i ana uo sa latou galulue fa’atasi i totonu o le matagaluega a le malo.

O Ta’atialeoitiiti, sa galue I totonu o le pulega.

O lo’o ia umiaina se fa’ailoga maualuga mai le Iunivesite o Kuiniselani i le tofiga tau inisinia.

Sa a’otauina i le aoga tulagalua a Sagata Maria, ma fa’aauauina atu ai i luga o le kolisi maualuga a le ekalesia.

Ina ua mae’a ai lana fa’ailoga o le B.A. sa galue o ia i totonu o le pulega mai le masina o Fepuari 2012.

© Samoa Observer 2016

Developed by Samoa Observer in Apia