Taumafai se tamā e sefeina mai ana meatotino

Tusia Deidre Tautua-Fanene ,

97 Hits

E ta ane le 3 i le vaveao o le aso ananafi e le’o malolo lava Luanne Mariner.

O le taimi lea o lo’o fealua’i solo lenei taule’ale’a ina ia fa’asaoina mai ana meatotino ua fa’aleagaina uma e lologa.

Sa fa’atei’a lenei taule’ale’a i le malosi o le matagu fa’apea ai le susū o lona tino ona ua o’o atu le vai i totonu o lona fale ae le gata i lea o le pe o le eletise i le taimi lea.

“Sa ou oso i totonu o la’u ta’avale ma ou aga’i loa i luga i a Hans Keil e paka ai la’u ta’avale, ae ina ua ou toe fo’i mai i lalo e avatu o’u lavalava, ua leai se aoga ua susū uma i le vai.

“O le TV, pusaaisa, o ulo, apa uaea, moega ma isi lava meatotino ua matua’i fa’aleagaina uma lava ma o le a tele fo’I tupe o le a toe fa’aaluina e toe fa’atau ai nisi meatotino ma toe fa’aleleia ai mea ni.”

Sa ia fa’ailoa i le Sunday Observer ua loa tausaga talu ona latou nofoia lea nofoaga ona o le fanua e patino i le latou aiga ae sa latou molimauina fo’i le a’afiaga tele sa iai le afā o Eveni i le tausaga e 2012.

“O le fale lenei a le aiga, ae to’aono e nonof ai ae o le taimi nei na’o a’u ona o lo’o i Savai’I uma lesi aiga.

“I le nonofo ai i Lelata e ese le faigofie ona e tulata i le taulaga i Apia ma le tele o isi nofoaga.”

Ina ua asia e le Sunday Samoan le nofoaga ua amata ona alu i lalo le vai.

“O lea ua tau feololo mai nei nai lo anapo ina ua fa’ateteleina le pa mai o le vaitafe.

“Ina ua ou ala ane ua o’o mai le vai i luga o o’u pui manava, ae ina ua tau maui atu sa tele lava le lapisi fa’apea ma le palapala sa so’o uma ai le fale atoa.”

Sa ia fa’aalia fo’i sa tatau ona i ai nisi lapataiga e fai mai e le ofisa o le va’ai tau ona pau le lapataiga sa fa’ailoa mai o matagi malolosi.

Sa ia talosagaina se fesoaosani a le malo mo i latou ua mafatia ona o lenei mafatiaga.

© Samoa Observer 2016

Developed by Samoa Observer in Apia