Foa’i ni meaalofa i se taimi talafeagai

Tusia Deidre Tautua-Fanene ,

37 Hits

Amapasa o Saina i Samoa Wang Xuefeng, lona faletua o Tong Xin ma lana aufaigaluega fa’atasi ai ma Gatoaitele Savea Sano Malifa ma nisi o sui o le afioaga o Afega sa mafai ona auai i lea fa’amoemoe.

Amapasa o Saina i Samoa Wang Xuefeng, lona faletua o Tong Xin ma lana aufaigaluega fa’atasi ai ma Gatoaitele Savea Sano Malifa ma nisi o sui o le afioaga o Afega sa mafai ona auai i lea fa’amoemoe. (Photo: Misiona Simo)

O le aoauli o le Aso Faraile a’o loma ai le a’afia o Samoa i le afā o Gita, fai meaalofa ai le Amapasa o Saina i le afioaga o Afega.

E 50 ni leitiō feavea’i sa mafai ona tu’uina atu e le Amapasa o Saina i Samoa, Wang Xuefeng i le afioga i a Gatoaitele Savea Sano Malifa.

Sa fa’ailoa e Xuefeng o nei meaalofa ua talafeagai lea ma le taimi lenei ona o le fa’aletonu o le tau.

“Lagona lava le fiafia ina ua mafai ona asiasi mai i le tou nu’u  aulelei,” o lana saunoaga lea.

“O lo’u taimi muamua lea ua asia ai le tou afioaga. Tele lava o taimi out te pasi mai ai e aga’i atu i le malaeva’alele ae le’i o’o mai lava i’inei.”

Sa ia fa’aalia fo’i le taua o le nofo mataala o tagata Samoa ona o le fa’aletonu o le tau ua iai nei.

“O lea ua tatou i ai i taimi fa’aletonu o le tau, ae o lo’o lapata’ia mai fo’i e le Ofisa o le Tau le mamalu o le atunu’u ina ia mataala ma sauniuni mo savili malolosi ma timuga.

“O lea la ua manatu ai e tatau i a’u pa’aga ona latou silafia ma nofo sauna i le tala o le tau.

“O le aso la lenei ua matou omai ai e momoli mai ni leitiō na aumai mai Saina e faimeaalofa ai i a’u uo o lo’o nonofo i Afega nei.

“Talosia ia ae o’o atu taeao ua le toe i ai se fa’aletonu o le tau, ae ia fa’aaogaina nei leitiō e fa’alogologo ai musika ma nisi o tala fou ae le o le fa’apopoleina o tatou i tala o le tau.

Sa ia fa’aalia fo’i lona agaga fiafia i matai ma le afioaga o Afega atoa ona o le tali leleia o latou.

Sa fa’afetaia e Gatoaitele le fesoaosani mai le Amapasa o Saina e ala i meaalofa ua foa’i mo le nu’u.

Na fa’ai’uina lea fa’amoemoe e ala ini fa’aaloaloga fa’asamoa sa fa’atautaia e le nu’u e fa’ailoa ai lo latou agaga  fa’afetai.

© Samoa Observer 2016

Developed by Samoa Observer in Apia