Tatala mae’a o le Laina o Fesoota’iga o le Tui Samoa

81 Hits

Palemia Tuilaepa Sailele Malielegaoi, Minisita o Fesootaiga Faamatalaga ma Fesootaiga Vavave Faaneionapo, Afamasaga Rico Tupa’i, Sui Minisita o Fesootaiga Faamatalaga ma Fesootaiga Vavave Faaneionapo, Lealailepule Rimoni Aiafi

Palemia Tuilaepa Sailele Malielegaoi, Minisita o Fesootaiga Faamatalaga ma Fesootaiga Vavave Faaneionapo, Afamasaga Rico Tupa’i, Sui Minisita o Fesootaiga Faamatalaga ma Fesootaiga Vavave Faaneionapo, Lealailepule Rimoni Aiafi

Lauga Autū a le Afioga i le Palemia, 

Susuga Hon Tuilaepa Dr Sa’ilele  Malielegaoi

 

Faailogaina o le Mae’a o le Laina o Fesoota’iga o le Tui-Samoa,

Maota Fono i le TATTE, Aso Faraile 9 Fepuari 2018, 5.00pm

 

E manatu o le a lelepa ia fa’ava’atiu o ā’auloloa pa’ia sautua fafafa o Samoa ma ona tuāoi. Ou te lē toe aufagaina fo’i le niuloa pe ou te toe paopaoina fa’atupemuli o taulafoga, auā o Samoa ma lona Sa mai le amataga, ua mae’a ona fa’atūte’e; o le vaofilifili, o le i’a ivi’ivia, e leai se vave ma se poto na te toe auiliiliina.

O paia ma mamalu ua uma ona ā’isa, mai lava i le oneone lē ufitia i le Matāsaua o le Tuimanu’a, se’ia pāia le maota o le tamaita’i o Nafanua o alamanū e lē ūia. O paia ma mamalu ua poto i le asō, o paia lava ia auā Aiga ma Tama, o Tama ma Aiga, le usoga Tumua ma Pule, Ituau ma Alataua, Aiga i le Tai ma le Va’a o Fonoti. 

Tainane foi le tapua’i mai a o tatou uso i Sasa’e; le paia auā Sua ma le Vaifanua, Saole ma le Launiusaelua, Fofo ma Aitulagi ma le Afioga i le Ma’opu, faapea le Faleagafulu. Tainane foi le afio i le Laau na Amotasi, le Faatui ma le Auvaa o To’oto’o ma upu ile Manu’atele.

Ae a le aufaigaluega paia a le Atua ma le latou tatalo i aso fai soo ma talosia se manuia mo Samoa.Tulou, tulou lava.

Ua faamalo faafetai i lau Susuga i le Ositaulaga, Rev Siaosi Salesulu. Ua logo i tino matagi lelei i le faafofogaaga, a’o e faaagi malie fisaga o le feau o le Tala Lelei i lenei afiafi. Talosia ia ia tiu faamatalāoa ma o’oo’o i finagalo ma loto le Upu ina ia ola pea, avea ma ta’ita’itama ile soifua galue i aso uma, ma ia fai ma ata faatonu o le faatinoga o nei auaunaga fou ua tatou maua.

O le matou tatalo, alofa le Atua maua pea le soifua manuia i lau Susuga ile Faafeagaiga auā feau o le Mālō o le Atua.

O le asō, ua fa’ailogaina ai se tasi o matati’a maoa’e i le tala faasolopito o auaunaga tau feso’otaiga i Samoa nei. O le faalauiloaina lea o le mae’a atoatoa o le atina‘e tele lenei  mo le fausia o le laina fou o fesootaiga i lalo o le alititai ma le moana sausau, lea e amata atu i Moataa ile Vaimauga, ona ui ane lea i Faga/Tuasivi i le Faasaleleaga, ma faasolo atu ai i Uea ma Futuna ae tini taunuu i Suva i Fiti.

O iinā o le a fesoota’i atu ai i isi laina tetele e aga’i i Amerika ma Ausetalia. O laina telefoni faavā-o-mālō e ala mai i lalo o le sami, sa matua faigatā ma lē mafai e Samoa ona maua i aso e tele ua mavae, a’o lenei ua tatou sapaia faatuaeleele, ma ua tuvaga ai nei i figota ae olioli livaliva  i lenei taeao na liugalua, auā ua lagona lava le fiafia i le Mālō ona o lenei atina’e tele ua mae’a.

O lenei laina o fesoota’iga o le a faalelei atili ai foi auaunaga tau initaneti i le va o Upolu ma Savaii.

Ao aga’i pea i luma le faaaogāina o tekonolosi vavave o fesoota’iga i atina’e faavā-o-mālō, ua tupu ai fo’i le lagona i le Malo ina ia matua faaleleia ma faamautuina vaega uma mo fesoota’iga autū, ina ia mafai e le lalolagi ona fesoota’i sa’o mai i soo se mataupu tau fefaataua’iga faapisinisi faapea foi i ni mataupu faa-le-Mālō.

O le ala lea o le fuafuaga mo lenei Laina Tele o Fesootaiga, e le gata ina ia faateleina ai avanoa mo fesoota’iga ma isi atunuui se saoasaoa maualuga toe taugofie, a ia mautū ma faamoemoeina pea fesootaiga i taimi uma e moomia ma faaaogāina ai.

Peita’i, e ao lava iai tatou uma ona mata’itūina faiga leaga ua lamatia ma aafia ai o tatou tagata aemaise fanau,mai aga ma uiga le mafaufau a nisi o loo faia i luga o le Initaneti. O le mea ia mautinoa, ia tatou tutū faatasi mo le puipuia lelei o fanau mai faamatalaga ma ata lē talafeagai i luga o le Initaneti, auālo latou saogalemu, ae ia mauafoi e tagata uma avanoa mo fesootaiga ma faamatalaga, atoa ma le faateleina o le iloa ma le faasoaina o tomai ma agavaa. 

E lē taumateina le telē o le aogā o lenei atina’e mo le fa’aleleia atili o: 

1. Feso’ota’iga – o le ā matuā tele ni ala o feso’ota’iga i le leo, faamatalaga, ma feso’ota’iga vavave faa’neionapo i ni tau maulalo;

2. O le ā matua si’itia auaunaga i le Vaega o feso’ota’iga Initaneti (Internet Service Providers);

O le a mafai ona ofo atu auaunaga tau-Initanei silisili ona saoasaoa i ni tau maulalo; 

3. A’oa’oga – o le a maua e le fanau a’oga avanoa tau-Initaneti i le saoasaoa fa’apea le tele o avanoa e faia ai su’esu’ega, e pei foi ona maua i A’oga i atunu’u tetele faapei o tamaiti o loo aooga i Niusila, Ausetalia ma Amerika.

4. Turisi – ua tatala foi le avanoa mo turisi e lelei lo latou tamao’aiga, e fa’aauau ai pea a latou pisinisi, a o fai-malologa mai i si o tatou atunu’u. 

O le a fa’ateleina pea avanoa e talimalo ai Samoa i ni fonotaga tetele a le Pasefika, ae fa’apea foi i fonotaga faava-o-Malo, auā ua toe siitia foi le lelei o auaunaga tau fesootaiga i lo tatou atunuu.

5. Faiga Fa’apisinisi Aotetele – o le a mafai ona fa’aaogaina foi le tekonolosi saoasaoa lenei o le broadband e maketi atu ai le tele o oloa a Samoa i le lalolagi i fafo, aua o le ā tele auala ma metotia fa’ale-maketi e maua i lenei feso’ota’iga saoasaoa.

O lenei atina’e sa faatupeina e le Faletupe o Atina’e a Asia ma le Faletupe o le Lalolagi, faapea le fesoasoani a le Malo o Ausetalia. Sa faapena foi ona ofoina mai ni tupe poo ni sao foi e nisi o kamupani e iai le Bluesky, Digicel, CSL, NPF, SLAC ma le UTOS, mo le faamautuina o le atina’e. O kamupani nei lea ua latou faafoeina le SSCC, lea sa feagai ma le faatinoga o le galuega.

O le tau aofa’i o le galuega e tusa ma le 34,405,606 Tala Amerika. E aofia ai le konekarate a le ASN, o le kamupani autu lea sa fausia ma faataoto le laina, faatasi ai ma konekarate sa fausia fale ma nofoaga e taunuu mai iai le laina i Moataa ma Vaivase-tai i Upolu ma Tuasivi i Savaii.

E fia faamauina le agaga fiafia ma le faamālō ia tatou paaga ma faalapotopotoga sa fesoasoani mai ile faatupeina o lenei atina’e. 

•  Faafetai i le Sui Peresetene o le Faletupe o Atina’e o Asia, Dr Bambang Susantono, ua malaga mamao mai e molimauina le faaiuina ma le manuia o lenei galuega tele.

•  Faafetai ile Sui o le Faletupe o le Lalolagi, Mr Michel Kerf ma le aumalaga ua tatou faatasi ai i lenei aso.

•  Faafetai foi i le Malo o Ausetalia tauala atu ia Susan Langford, mo le tuuina mai pea o lona tauau e fesoasoani mo Samoa.

Momoli foi le faafetai ile kamupani a le SSCC ma le Komiti Faatonu, aemaise lo latou sao e ala i tupe sa ofoina e fesoasoani mo le faatinoga o le atina’e. Ua faamalo mo le faatinoina o le galuega ma le vaaia lelei o itu uma ua vave ai na uma le pōlōketi.

Faafetai i konekarate uma e le gata mai fafo ae faapea tatou i Samoa nei sa gafa ma le fausia o le laina ma ona vaega uma.

Avatu la’u faamalo ma le faafetai ile Afioga ile Minisita o Fesootaiga, le Matagaluega ma le Komiti Faafoe o le Tui-Samoa Cable, mo le faagasologa o le poloketi ma le taumafaiga ina ia vave ona faatino le laina fou o fesootaiga. 

Ou te momoli atu foi le agaga fa’afetai a le Malo i Alii ma Faipule o Afioaga o Moataa ma Vaivase i Upolu nei, faapea Faga, Tuasivi ma Fogapoa i Savaii, ona o le latou lagolago ma le talisapaia o lenei atina’e, auā e taua lo tatou galulue faatasi ua faagasolo lelei ai ma faataunuuina ile manuia.

Ia manuia tele lenei aofia aemaise le faafofoga tapuai a Samoa, ma ia faamanuia mai le Atua i lenei aso.

Ou te fiafia lava e faasilasila atu, ua tatalaina aloaia nei le atina’e o le Laina o Fesootaiga ole Tui Samoa.

Soifua.

© Samoa Observer 2016

Developed by Samoa Observer in Apia