Fa’amuamua le ola: Ia soifua maloloina

11 February 2016, 12:00AM

Tusia - ManameaApelu-Schwalger

Fa’aliliu e Maiava

 

Fa’afetai tele Mata’afa mo le fa’atauaina o lenei mata’upu i lou finagalo fa’aalia (Manatu o le Fa’atonu : Aso To’ona’i 06 Fepuari, 2016), lea sa matou naunau e matua fa’alauiloa fa’alaua’itele i le Aso Fa’amanatu o le Kanesa a le Lalolagi.

O le mea moni, ona o le ‘uti’uti o le fa’asoa i mea-mo’omia, e matua faigata ai lava i tagata-Samoa ona finau maua’i ma le fa’ama’i o le kanesa. 

O lo’o galulue pea le Matagaluega o le Soifua Maloloina i se Polokalame Fa’agasolo mo le Siakiina o ituaiga kanesa ‘ese’ese.

Mo le kanesa o le susu, ua iai nei ni masini fa’apitoa (mamamogram & ultrasound) fa’apea le su’esu’eina o le toto.

E taua ai tele, le vave fai o su’esu’ega ma fa’amautinoa, e tele ai fo’i soifua e mafai ona fa’asaoina. 

E tele polokalame fa’alauiloa ua leva ona iai a le Matagaluega o le Soifua Maloloina o lo’o galulue fa’atasi ai ma ana pa’aga e pei o le Sosaiete o le Kanesa.

Peita’i, e iloa loa e tagata ua maua i le kanesa (e to’atele e iloa ane ua i se tulaga faigata), e matua tele lava fa’afitauli mo le tau sa’ilia o ni togafitiga mo latou e naunau iai, po’o le fa’atinoina fo’i o togafitiga ae le-malamalama iai. 

A aunoa loa ma fesoasoani a le malo po’o aiga alolofa e gafatia totogi o togafitiga nei – pe iai fo’i o se lagolago fa’aInisiua – o togafitiga aupito lelei (le chemo ma isi) e mafai ona fa’asaoina ai le soifua pe fa’a’umi’umi ai fo’i le soifua, peita’i, e na o ni mo’omo’oga faivavale. 

‘Ou te le-fa’atauagavale i vai-fa’aleAganu’u aua o nisi o vaila’au o lo’o fa’aaoga nei i togafitiga a foma’i, o vaega e ‘oto mai la’au nei, ae ui i lea, o le a le o’o-o’o lava iai sa’u tala i le mea ‘ou te le malamalama iai. 

Ae mo se tasi pei o a’u, ‘ou te toe fa’apea atu, “e iai lava le fa’amoemoe” pe a lagona ua leai lava se isi ‘auala e maua ai se to’afilemu.

Ua ‘ou malamalama i le mafuaga ua toe fo’i ai le to’atele o le tatou atunu’u i fofo-Samoa.

Fa’amolemole ‘aua le fa’amasino mai, aua se’iloga ua e uia le ‘auala lea, i tiga ma faigata e feagai ai. Ae ‘aua ne’i mate ai le fa’amoemoe, a ia pei o le la e oso ane i taeao uma, ia tumau pea le fa’amoemoe.   

E mafai lava ona tatou amatamea, e ala i le togafitiga o mafuaga (lea o lo’o finau malosi ai le vasega o foma’i), ae o taumafa lava lea ua iloa nei, e tele le sao i le mafuaga o le kanesa – IA SOIFUA MALOLOINA, FA’ATAUA ‘AUALA SOIFUA MALOLOINA!

Ia te a’u lava ia, lea ua ‘ou o’o i le tulaga faigata o le kanesa, ua ‘ou aga’i nei e tulaga tau-mea’ai ma le fa’amoemoe, o le a mafai e lo’u tino ona tete’e atu i le fa’ama’i e pei fo’i ona momo’o iai le mafaufau.  

 ‘Ou te le-nofoa’i i a’u sa’iliga, mo se isi finagalo po’o se fautuaga ma o lo’o fa’alogologo solo lava i nisi ‘auala e mafai ona maua o so’o se ituaiga togafitiga mo lenei ma’i.

E tumau pea lo’u fa’atuatua ma ‘ou te fia fa’ailoa atu, talu ai o a’u o se tasi o tama-fanau a Samoa, sa ola ane lava ma le iloa, o mea uma e mai Le Atua pei ona fautua mai le tina-matua o Taupatupatu, ina ia fa’amuamua pea le Atua i mea uma – lea e fa’avae ai le atunu’u nei ma ‘ou iloa fo’i, o Ia fo’i o le foma’i o foma’i. Le Foma’i Sili.

E talosaga atu ai ma le agaga fa’aaloalo i uo ma aiga, fa’amolemole, ia taumamao mai se lagona fa’apea, o le kanesa, o se fa’asalaga mai Le Atua. ‘Ou te talitonu i le Atua e alofa, e feala ane i taeao uma i le malosi mai ia te Ia ma e fesoasoani mai ma fa’amalosi’au mai i taimi uma, ina ia tatou fa’aauau pea ona lagi Ona Vi’i i taimi uma e le aunoa a’o tatou iai i lenei lalolagi le-tuma.

O le mea moni, e matitiva si o tatou atunu’u nei ma ‘uti’uti le tamaoaiga, e le faigofie ai ona fai o se fa’atatau talafeagai mo le gasegase o le kanesa. 

Ae fa’afetaia ai pea Lona Alofa, ona o lo’o mafai lava ona tatou soifua fiafia pea aua, atonu lava e iai se ‘auala – a’o ai na iloa e ono avea la’u lauesi ma fofo po’o se isi fo’i faiga e fo’ia ai lea fa’ama’i. Ae fa’afetai tele Samoa mo tatalo, Fa’amanuia atu le Atua. Fa’afetai tele Mata’afa!

11 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>