Agalelei se tasi o Samaria

Tusia Ioana Tupa'i ,

89 Hits

Le tama ia Matile ma lona toalua ia Neetia Faaeteete, o loo faatasi ma lela afafine ia Lupe.

Le tama ia Matile ma lona toalua ia Neetia Faaeteete, o loo faatasi ma lela afafine ia Lupe.

Ole agaga o le faafetai sa faaleoina e se tasi o aiga mai Tapatapao e tusa ai ma se foai a se tasi o Samaria.

O Neetia Faaeteete sa faatalatalanoaina e le Fofoga o Samoa i le Aso Faraile na sei mavae atu nei. O lea sa ia taua ai se tasi o faafitauli tele o loo feagai ma ia aemaise o si ana tama teine e lua tausaga le matua ia Lupe Faaeteete.

O le Aso Toanai  lava o le vaiaso na sei mavae atu nei na foai atu ai e se Samaria agalelei ni apa susu 900 Kala o le Golden Farley InFant Powered ma ni faguvai lapopoa se lua.

O lea foi e silia ma le $200 tala.

Sa ta’ua e le tama o Lupe, “Ina ua agai mai le Fofoga o Samoa ma faatalatalanoa foi maua sa lagona lava le matamuli e faasoa i vaega o loo moomia ai le fesoasoani ae peitai o le tina o le aiga sa faamatalaina vaega o loo moomia mo Lupe.”

“O le Aso Toanai lava lea na foai mai ai nei mealofa sa agai atu ai le tinā ma Lupe I le falemai ona ua alu le po ole Aso Faraile o tagi.”

“Sa tuua le aiga i le taeao ae taunuu mai le fale i le ono i le afiafi ma sa ou popole poo fea ua o iai. 

Ae peitai na matou fetaui ma lou toalua ma lou afafine I luma ole auala o loo agai mai.”

“Sa oó mai ma faailoa mai se tala fiafia e ala lea i se Samaria ua ia foai mai nei oloa e fesoasoani i le tausiga o Lupe.”

“Sa lē talitonu ona matou te lē aiga ma nei tagata ae o lea ua fesoasoani mai.”

“E faigata ona maua ituaiga tagata faapenei i lenei vaitau. E le gata i lea o le agai i le falemai ma omai faatasi ai ma lou toalua ma lou afafine e momoli mai lo matou aiga.”

“O le agaga o le faafetai ou te fia faailoa atu ma momoli i lea Samaria e tusa ai ma loto alofa ma le agaga fesoasoani mai i lo matou aiga.”

Sa taua e le tinā o le aiga o nei apasusu ma faguvai o le a mafai ona faaaogaina e Lupe mo le lua masina.

“O lau tatalo ia faamanuia le Atua i lē sa fesoasoani mai, ia faatutumu ele Atua mea ua faagaogaoina ona o lou agaga fia fesoasoani mai mo Lupe.”

Mo soo se tasi oloo fia fesoasoani mo pepe Lupe, vaalau le numera 7248074.

© Samoa Observer 2016

Developed by Samoa Observer in Apia