O la’u tala fo’i

11 January 2016, 12:00AM

1. Matauina i Tala Fou se saunoaga a le Taitai o le Itu Agai poo le Tautua Samoa Party e faapea e faitau miliona ma miliona tupe ua maumau ma ona o lea itu-fai mai le Taitai o le Tautua Samoa Party le Afioga a Palusalue Faapo II e faigofie lava le fuafuaga a le Tautua Samoa Party- e faatupe ai folafolaga pe afai e manumalo i le Palota.

Fai mai Palusalue o le vaega autu lava e tino ai lea faamoemoe o le matua toe faaleleia lea o pūpū na fai e le Vaega e Puipuia Aia Tatau a Tagata-talu ai a latou faiga faatautala tau le faaaluina o tupe a le atunuu ma ua pogai ai ona o’o le aitalafu a Samoa i fafo i le sili atu i le $1 piliona. Mo se faataitaiga-na lafoa’i e le faigamalo a le HRPP le $20 miliona-ona o galuega tetele tau uafu i Satitoa lea sa le lelei ona faatino ma e leai se aoga.

Fai mai Palusalue toeitiiti lava atoa le miliona tala na alu i le faiga o le Ofisa o le Minisita muamua o Tupe ma o lea lava o loo tuufua e leai se mea o faia ai. O loo silasila foi le Tautua Samoa Party i le faitau miliona ma miliona -ia o loo faaalu i Minisita Lagolago-ma o ia tupe sa tatau ona tuuina atu mo se faaaogaina e sili ona lelei. Ia- afai la ua silafia e le Tautua Samoa Party lea tulaga ma ua finagalo e toe faaleleia-matou te matua talitonu-o se mea lea e sili ona aoga mo le atunuu atoa lea ua afaina talu ai ia faiga pi’opi’o a le faiga malo! O le a sou taofi? 

2. Ua matauina foi i Tala Fou se ulutala fai mai-“E le toe faia ni galuega i le Aso Sa”-ma o lea ulutala e faatatau lea i tagata fai konekarate mai fafo e faia galuega i Samoa nei-ia e o’o lava i Aso Sa-o fai lava a latou galuega! O se tulaga uiga ese lea ma le le migao ia Samoa lea o loo faavae i le Atua-ae a omai lava ia tagata e fai galuega tetele i Samoa nei- ona tuufau lava lea e fai mea e loto i ai-ae le taofia e le Malo.

A avane ‘ea le maua mai o tupe i atunuu mamao ma ala e soli pala ai le faavae o Samoa? Ua pei lava Samoa o se Malo o Tamaiti-e o mai lava tagata ese fai le mea e loto i ai-ae le ta’ua i ai le mea e tatau ona fai? E mafai ona o atu se kamupani Samoa fai se galuega i le Aso Sa e faamamalu e isi atunuu?

E le tioa lava a malaia ola le atunuu ona ua pule tagata ese mai fafo i le tulafono ma le aganuu a Samoa. Ia e momoli atu le faafetai tele i le Tautua Samoa Party pe afai e mafai ona latou taofia lenei luma o le o mai o tagata ese fai a latou galuega i le Aso Sa-o le aso ua faapa’iaina e le Alii e malolo uma ai le lalolagi mai fe’au ma galuega –ae o atu i tapuaiga! Faafetai tele lava i le Tautua Samoa Party pe afai o se tasi lea o a latou faamuamua pe a manuia le Palota! O le a sou taofi? 

3. Matauina i lenei vaitau le toatele o matai fou ua fai e nisi o aiga o le atunuu-ma o se tulaga lelei tele lea –ma o se tasi foi lea o ala e maopoopo ai mea nei o aiga. Ae paga lea-o nisi o suafa maualuluga o tamalii ua matauina foi ua faapea ona faasalafa-ma e peiseai o se vaega ese lea e le masani ai pe a pa’ia suafa o tamalii maualuga.

Ua matauina foi o isi o suafa matai sa faapito ona tuuina atu i alii- o lea foi ua faasafua atu i tamaitai-ma atonui o se tasi lea o faiga fou pe a? Ae ui lava i lea- o le itu taua lava pe afai e maopoopo ai se aiga! I se tasi faaupuga-o le tofu sao lea o ia matai fou uma i faalavelave ma mea fai a le aiga-ae le na o le matai -ae le vaaia i faalavelave fai o le aiga –nuu ma le itumalo! O le a sou taofi?

Matauina foi le tele o nisi o aiga ma latou lotu faamanatu faale-tausaga e pei ona masani ai-ae o lea lava e faaauau! Ia- e leai se tio i lea itu-talu ai o le matau i ia mafutaga-o le toatele lava e malaga mai vaega eseese o le lalolagi-ona o le alofa ma le fia auai i mea fai a le aiga.

Afai la o loo mafai ona faatino e nisi aiga ia ituaiga o mafutaga faale-tausaga i tausaga uma-ae le o faafiti ai lava o latou tagata-o lona uiga-o le faailoga vaaia lea o aiga maopoopo-ona o le lelei o le tausiga a matai o lea aiga.

A fua la i sui o le aiga mai fafo-o se avanoa lea e toe feiloa’i ai ma tagata pe afai e le o tagata uma o le aiga-sa masani ona soifua faatasi ma tiga faatasi! O lea e faafetaia ai le taumafaiga a ia aiga e pei ona faatino-ae maumau pea na faapea uma aiga o le atunuu-talu ai o le pine ola lea o le fealofani ma le nonofo faatasi -e finagalo i ai le Atua! O le a sou taofi? 

11 January 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>