Fa’aaoga taleni e fesoasoani ai i le mativa

By Vatapuia Maiava ma Ilia L Likou 10 September 2016, 12:00AM

Na fa’ailoa e le tamā i a  Pelepesite Uigaga i le Fofoga o Samoa i le aso ananafi o taleni ma agava’a ese’ese o se vaega o le olaga e ao ona fa’aaogāina ma le tatau i taimi uma.

O Pelepesite ua 56 le matua o lona soifua ma ua na’o ia ma le atali’i le aiga mai le afioaga o Vailele.

E le’o faigaluega i le taimi lenei, ma e pau le alagatupe mautinoa mo ia ma le atali’i o le fa’atauina atu lea o ata tusi i nisi o faleoloa i le taulaga ma meataulima i le tele o  vaiaso aua le aiga.

“O le taimi lenei e leai se isi o faigaluega i lo ma aiga, o mea lava ia o lo’o o’u tusitusia o lo’o fesoasoani, o meataulima, e pei ona i ai le taina o tama’i laumei, o mask  aua e i ai leai lava  isi tagata e le o’’o ai so latou iloa i le taina o vaega nei.

“O  lea ua ou tago fai mask a Samoa latou ia, o lea ituaiga meataulima e le ta’atele, ma o lo’o taina ma avatu  sa’o lava i poloka lae mana’omia.

 “E pei ona silasila mai, o galuega lava nei e faifai e maua ai galuega fa’apena, e fua lava i mea e galueaina, le tupe e mafai ona maua mai, pe a taulia le tele o meataulima.

O  manaoga o lo’o fa’ananau i ai le tamā e fa’atinoina pe a maua se tupe o le fa’alautele lea o lana taleni aemaise o se fa’aaliga e fa’ailoa ai le tele o ana galuega o lo’o tusitusia.

“Ia e le mafai ona fa’alautele pe a leai se tupe e fa’atino ai lea tulaga.

“O mea nei o lo’o ou galue ai e fa’atau, o lea ou te mana’omia se taimi  ma se tupe e fa’atino ai a’u mea  nei, ia pe  fai fo’i  se show e fa’ailoa ai ata.

“O la’u miti lena, ia fai se show.

“E le gata i lenā o le tulaga o le fa’aleleia o le aiga…o le fa’aleleiga lea o lo ma fale, e le’o lelei le tulaga i le taimi lenei.

Na ia ta’ua o le $100 o lo’o maua i le vaiaso mai i le fa’atauina o meataulima e le mafai ona lava ai le fa’asoa i vaiaso uma.

“E pei o le $100, ua na’o se mea’ai ma le totogi o le moli  ma mea fa’apena , a uma atu loa lava ia ua tau fa’asoasoa lava.

“Ia ana faapea o lea e iinei uma  la’u fanau e le taitai ona lava le fa’asoa.

“Ia ou te iloa lava e eseese tagata ma o latou lagona, leaga e fua i le tagata, e  i ai   nisi o aiga e to’afa, to’alima, ma ua le talafeagai lava (fa’asoa).

O lona talitonuga maumaututu o lo’o i ai le mativa i Samoa.

“O  lae lava e i ai (tamaoaiga) i isi aiga ae o isi aiga  e le’o i ai ona e ese’ese tamaoaiga.

“O isi aiga o lo’o lelei galuega a tagata o lo’o i ai, o lae lelei o latou aiga.

“Ae o nisi o aiga, o lo’o maua i fa’alavelave ona o lae o ta mai aufa’i a isi tagata ma mea fa’apena…sāsāla i le nu’u ona o le tele o le mativa, ia toe totogi atu ma sala (pe ā maua) ia ua atili ai le leai o se tupe.

 “E leai se tagata e alu e gaoi pe afai o lae maua le meaai, o le isi tagata ana va’ai atu lava ua leai se mea’ai, mafaufau loa i se mea e maua ai le meaai, ia ona te’i lava lea ua fa’asolo atu i le alu ta fua le aufa’i a le isi aiga.

Na ia ta’ua, e le’o mafai ona o’o le fesoasoani a le malo i aiga ta’itasi o le atunu’u.

“O lea e i ai le fesoasoani a le malo, e pei o le malo uma lava, ae le’o taumafai le malo e fai se faiga e lelei mo le lautele ma  faasafua i aiga ta’itasi.

“O lona uiga a’e fa’atamala lava oe i lou olaga, e le mafai ona maua se fa’amanuiaga a le malo.

By Vatapuia Maiava ma Ilia L Likou 10 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>