E fa’amanuiaina pe a galue punoua’i

Tusia Vatapuia Maiava ma Ilia L Likou ,

149 Hits

O SE TAMĀ GALUE MALOSI: Mauga Atuatasi o Letogo. ATA/Misiona Simo

O SE TAMĀ GALUE MALOSI: Mauga Atuatasi o Letogo. ATA/Misiona Simo

O Mauga Atuatasi o Letogo o se tamā e to’avalu ona alo ma ua tolusefulu ma ona tupu fanau a lana fanau.

E taunu’u atu le Fofoga o Samoa i le aso ananafi o lo’o galue le tamā i lana fa’ato’aga i ga’uta o le afioaga.

O le 60 ai o tausaga o lona soifua, e le’o avea lea ma ala e solomuli ai  lona ola galue aua le tausiaina o lona aiga.  “O lenei ma’umaga e le pei o se ma’umaga o lo’o galulue ai ni tagata malolosi, e pei ona outou matau mai, ua na o nai tiapula tōtō solo ia ma nai fa’i,” Mauga Tasi.

“Ia o fa’aafu a toea’i’ina…e ta’itasi lava, ia mo le silafia e leai se vaila’au o fa’aaogaina.

“E sasa lava le putalo, o le tasi o le mea e le popole ai o le palapala, o le  fa’i o lo’o outou va’ai atu ai, o le talima, e  ese le ola lelei o le fa’i i o matou ele’ele.

O lona talitonuga i le olaga lenei – o tupe lava mea uma.

“E pau lava lena o le soifuaga nei, tatou te talanoa lava i le tupe.

“ Ia o fa’atoaga e fia masina e fa’atali ai se tupe po o se ‘ai, ia o galuega fanau (o lo’o tua i ai).

“O tupe e fa’aalu mo  le Ekalesia, o  le malo, o mea fa’alelotu, tamaiti aoga, aua o Samoa lava ia, ia o le tatou tama lava lea o le manava.

“O le tupe fa’aalu a le aiga i le vaiaso, a ‘ai le Samoa e ‘ai atu i le $30 i le aso, ae ese ai tama’i mea  e pei o lauti, suka ma mea fa’apena, ae e tago e fika ane le $30 i lea aso ma lea aso, e le taitai lava le fa’asoa.

“Aua tatou te o e faigaluega, e le mo ni fale po o ni ta’avale, ae o le manava lava, e o’o lava i le faigapalota…ia o le fa’amalieina lava o lea, manava.

O le a sou silafia i le tau o le soifuaga o lo’o i ai nei?

“O le tau o le soifuaga o lo’o alu lava i luga, ia o lae tu’u atu ai ma le GST, o mea faapena,  e leo alu la i lalo  o lo’o alu i luga.

“Ua matua’i taugata lava le soifuaga, ia silasila oe, mea le Ekalesia, e o’o i a outou tou te autalavou, toniga le aufaipese, toniga o le autalavou, e tatau ona lafo sau alofa le faifeau, o le sene, e tatau ona lafo le taulaga, o tupe uma mea.

“Aua e alu alu lava i isi taimi ta te ma e alu le lotu ona ua leai se alofa. “O lo’u lava ia taofi,  ave le fa’amuamua i le tausiaina o fanau, o le oloa taua a le Atua na aumai e tausi, a le tausia lau fanau e tasi lena agasala i le Atua.

“O le si’osi’omaga,o le ola lea o le fanau, o le mea e ao ona fa’amuamua.

Na ia fa’ailoa, ua i ai le suiga o Samoa.

 “Ia o aso la na napekini tamaiti, ia o aso nei, ua pamper tamaiti, aso la na o sina ieie lava e sapai ai le tamaiti, ae o aso nei, a leai se tupe i a e le pamper le tamaititi.

“Ou te talitonu e ala ona mativa ona ua e taumafai lava oe e faamativa oe. O le fa’atoaga o lo’o tua ai le aiga i le tele o taimi e utiuti ai le fa’asoa.

© Samoa Observer 2016

Developed by Samoa Observer in Apia