“O le silafaga a le Atua” (Kenese 4:3-10)

Tusia Petaia Setu ,

353 Hits

Rev. Petaia Setu

Rev. Petaia Setu

E leai se isi e sili atu lona iloa o le tagata nai lo Lē na ia faia le tagata atoa ma mea uma lava o i le lagi ma le lalolagi. Fai mai Tavita, ‘O le lalolagi ma mea ua tumu ai o ā Ieova ia’ (Salamo 24:1). O galuega mamana a le Atua.

O lona uiga, o le natura ma uiga o mea taitasi uma na faia, ua pei o le ao ia i le Atua. I le, e le mafai la ona lilo tatou i fofoga o Ieova. O le faaeaea a Tavita i lona Atua, “Ieova e, ua e silafia lava a’u. O la’u nofo ma la’u tu ma manatunatuga o lo’u loto ua silafia mamao mai lava e oe.

O la’u savali ma la’u tă’oto, ua e masani lava ma o’u ala uma”. (Salamo 139:1-3). Ua fasioti e Kaino lona uso o Apelu. Ona valaau mai lea o le Atua, “Kaino, se ā le mea ua e faia? O loo alaga mai ia te a’u mai le eleele le leo o le toto o lou uso”. E le mafai ona tatou lalafi i luma o Ieova. Tatou te le olegia foi le Silisili Ese. E manino mea uma i le silafaga a le Atua. 

O Kaino o le ulumatua a Atamu. O Apelu o le tama laitiiti o le fanau e toalua i le taimi lea. O fanau ua soifua mai i se olaga a’oa’oina lelei i totonu o le aiga, i le olaga tapuai ma le olaga faitaulaga i le Atua. O Kaino o le faifaatoaga o mea totō o laau ‘aina; a o Apelu e tausia le fāgaga, o le lafu o povi, mamoe ma ‘oti.

O le tō’aga ma le faapalapala, e silafia e le Atua. O le fai mea lelei ma le fai mea leaga, na te silafia uma lava. O manatu o le loto ma le amio  faaalia, e le mafai lava ona natia. O le Atua na te silafia. O le amataga, o le auaunaga a le tagata.O le taualuga, o le faasifoga mai le Atua. Ua tatou iloa le tala.

O le tausaafia ma fai mea fiafia, e talisapaia ma aloa’ia. (f.4). A o le manumanu ma le manatu faatauvaa, e āfua ai ona fuā ma puleesea e le agaga leaga. O le silafaga a le Atua e faapei ona molimauina e Tavita, e malamalama lelei i ō tatou tagata i totonu atoa foi ma fafo. Silasila foi, o fafo e mata fa’a’ū’ū, a o le loto ua tumu i le ita. O lagona ia pe a vaai atu ua ta’uleleia le kama a le isi loomakua. E alia’e pe ‘a pa’ū ma soloia lau nofo i lou faualuga.

E atagia ina ua maua e le isi e agavaa ma faamaoni le tulaga maualuga pe pule. E masani foi ona tupu pe ‘a lē ausia e le lima vaivai tusaga a le aiga poo saofaga a le ekalesia. E te muimui ai foi pe ‘a le amanaia lou malosi. O lagona faapea, ua faigofie ona tatou pu’ea ma iloa tino ai, e le fiafia le Atua i sea ituaiga loto. E faamaualuga, e faufau, e leaga, e palapalā, e ma’a’a. O aga ia a le amioleaga. E le maua ai la se olaga saoloto poo se fiafia. Auā o le fiafia, e fanau mai i le amio lelei (f.7). A leai se amiolelei, ua tatao mailei e faatupu ai māsei. 

Ua inoino Kaino i le olaga lelei o lona uso, ona mailei lea i le fanua, auā ua taoto i lona loto le oti o lona uso. Ua taugā le ita. O le fili ua malepe ai aiga. Samoa e, o le faaiuga vave lava, o le faaiuga a le ita. Peitai, e le o se faaiuga e filemu ai ma ola fealofani ai.

A o se faaiuga e toe faatietie atu ai ma isi leaga ma e lē iloa ai le va tapuia ma le Atua. O le fasioti tagata (f.8); o le pepelo, ma le lē faaaloalo i le  Atua (f.9), e sau i le loto o le fai mea leaga. Ua manatu le fai mea leaga i faiva o Fiti ia lililo, a o le Atua na faia le lagi ma le lalolagi, e ati lana silafaga i mea uma lava taitasi. 

E alu i fea le tagata agasala? E sola ifea ai luma o Ieova? (Salamo 139:7). Ta’u i le Atua ou leaga. Faailoa i lou toalua lau agasala. Tautala i fanau i lou sesē. Faatoese ia Iesu Keriso i lou olaga pepelo. Faamaulalo i lou uso i lou faufau leaga.

Tootuli i le Alii i lou le āva i ou matua. Ioe, ua oia mea uma ina ua tatou faiinaelo i Lē na faia i tatou. Ua oge i tatou ma le alofa e faia ai mea lelei. Ua mativa i tatou ma le faamaoni e auauna ma galulue ai. Ua e vaai lava oe i lou mănava, ma ou manatu faapito lava a’u ia te a’u, a ua le o le finagalo lea o le Atua. O loo tatou faapouluulu i le pogisā, a o le Atua, o le malamalama lava ia, e leai se mea e lilo i lana silafaga. E nanā e le tagata, ae alaga mai le eleele (f.10). 

Samoa e, o i le Atua Pule Aoao le pule e faagaganaina ai mea uma na ia faia. Ne’i e manatu e lilo oe i lou falesimā, poo lau taavale pogisā, poo lou ofisa maualugā. E tautala mai aso e pei o le igoā ipu a le Vaa i Malae. Atonu o le manatu o Kaino; e le o ia o se leoleo o lona uso. Ioe, ae o ia o le tino ma aano o Apelu. O ia o le toto o Apelu. O ia o le ola o Apelu. O fea? Alii, o fea lau avā? Tamaitai, o fea lau fanau? E le o oe o se leoleo o lau avā?

E le o oe o se ola o lou afafine? O ‘e faalogo i le alaga mai o le eleele? O ‘e lagona le oono o le Faaola? O ‘e iloa le silafaga a le Atua? Ua oia mea uma o le foafoaga i lau amioleaga! Ua oono mea uma lava na faia i lou le alofa. Ua e le alofa i lou aiga.

Ua e inoino i le tofi o faamanuiaga mai le Atua. Ua ‘e le alofa ia Iesu Keriso, o Lē na masaa fua lona toto i le eleele ina ia fai oe ma tagata saoloto; tagata fiafia; tagata manuia. Na fai mălie lana taulaga. Na fai fiafia lana foai. Na ia ofoina mai le lelei atoatoa mo oe Samoa. Ua ia le tuua mea silisili, ina ia fai oe ma afafine ma atalii o le Tupu Silisili. 

Lo’u atunuu e Samoa, e faapefea ona faamalieina le silafaga a le Atua i lou tagata? Se ā se mea tatou te fai e faafiafia atu ai i Lē na faia mea uma? Tatou te faia ea se taulaga mo le faamagaloga o a tatou amioleaga? E fofō lava e le alamea le alamea. Salamō ia, ma faamaulalo i luma o le Atua. Talia Iesu Keriso i lou olaga e fai ma ou amataga fou. O mea lelei e te faia e afua mai i le loto e lelei, e mamā, e alofa, e faamaoni. Ioe, e  femālamalamaa’i ai ulugalii. E mafanafana ai mafutaga a matua ma fanau. E maopoopo ai aiga ma nuu. E tapuai saoloto ai le Ekalesia. E mau ai faigā mālō. E manuia ai Samoa atoa. 

O le tau ‘alaga lenā a le talalelei. Ae maumau e, pe ana tatou femalamalamaa’i! Auā o le upu moni, ua na o le  Atua lava e sili lona silafia o oe. E malamalama i lou tagata i fafo atoa foi ma totonu. Ui i lea, e leai se mea e lilo i le silafaga a le Atua. E tua lava foi le Po i le Ao. 

 

Amene

E-mail: petaiasetu@gmail.com

7737063/7783782

© Samoa Observer 2016

Developed by Samoa Observer in Apia