Manatu O Le Fa’atonu - O se taimi ua faailogaina e le faanoanoa, mapu i tiga, ma le faalumaina e le mavae

By Mata'afa Keni Lesa 10 July 2016, 12:00AM

Fai mai latou o le Iunaite Setete o Amerika o le atunuu o le sa’olotoga ma o le aiga o e loto tetele. Ua moni lena i le tele lava o ala. Ae masalo ua galo ia i latou ona fai mai o se atunuu foi e tulaga uiga ese, ma le anoano o le faailoga tagata ma le tulaga uiga ese. I le faagasologa o nai masina ua mavae atu-sa tatou tuliloaina ma le gatete se vaega o atiina a’e-ia e mafai ona faamatalaina  e matua gatete ai le mafaufau ma e matua faatiga lava. 

O le tulaga afaina mai nei faalavelave ua matua manino mai lava i le faagasologa o nai aso ua mavae atu. O le Aso Tofi na tatala ai e le Matagaluega o Faamasinoga a le Iunaite Setete se suesuega i le tafanaina faamo’mo’a o se alii meauli e Leoleo o le Baton Rouge, La. E tusa ai ma le New York Times, e to’alua ni alii ofisa papa’e na saisaia Alton B.Sterling, 37, ina ua mae’a ona tali atu i se valaau e uiga i se tagata o loo faa-‘auupegaina. Na taofioifi e alii ofisa Mr. Sterling i le eleele ma o le taimi lea na fana ai o ia e se tasi o i latou. 

I le taimi nei, o se ata o le video o le fanaina o lea alii-ua aumai ai lenei mataupu-mo le silafia e le lalolagi atoa, ma faamanatu mai ai se faagasologa o isi na tafana e leoleo lea na aafia ai muamua se alii uliuli. Ma e matua tele lava gaoioiga faapenei a leoleo. Na tuufaatasia e le Washington Post se lisi ma e matua mata’utia.  E aoga ona silasila i ai: 

1. Gregory Gunn: Montgomery, Alabama, o le alii leoleo ofisa o Aaron Smith, o ia lea e pa’epa’e, na molia i le fasioti tagata ina ua uma ona ia fanaina se alii e 58-tausaga le matua o Gregory Gunn. Sa faa-auupegaina Gunn ma alu ese mai lona aiga i le taimi na fana ai. 

2. Akiel Denkins:   O se  mai North Carolina e gafa ma moliaga na maua lana faaiuga e faapea o lea gaoioiga a le alii ofisa –o le puipuia lea o ia i le taimi na ia fana ai lea alii uliuli a’o taumafai e saisai o ia i Raleigh.. 

3. Freddie Gray: E to’aono leoleo o Baltimore na feagai ma moliaga e afua mai le leaga o le amio i le tulaga lona lua i le fasioti tagata-i le oti o Freddie Gray. O Gray e  25 ma e uliuli, na oti ina ua gau lona ua i tua o le taavale a leoleo. Sa taofia o ia e ala i le saisai ona lima i le filifili ma ona vae, ae le o se fusipa’u o se nofoa.  O lea oti na lagalagā ai solo tete’e i totonu o Baltimore. 

4. Walter Scott:      Sa feagai Michael Slager ma le 30 tausaga i le falepuipui ia faasalaina i le fasioti tagata talu ai le oti o Walter Scott, o ia lea na fana ma fasiotia i a’o sola ese i se nofoaga e taofi ai taavale South Carolina ia Aperika 2015. Sa le faa-auupegaina Scott. 

5. Laquan McDonald:. Ua molia se Leoleo Ofisa o Chicago o Jason Van Dyke i le fasioti tagata tulaga muamua i le 2014-ona o le oti o se tagata talavou uliuli o Laquan McDonald. O se video na faaalia le fanaina  faa-16 o  McDonald.

6. Samuel Dubose: Ray Tensing, o se leoleo muamua o le Iunivesite o  Cincinnati, o loo faatali se faamasinoga ia Oketopa e uiga i lea fasioti tagata ma moliaga o le fasi tagata pa’i-valea i le tafanaina faamo’amo’a  o Samuel DuBose, 43, o ia lea sa le faa-auupegaina ina ua taofi o ia –ona o le leai o se numera o le laisene. 

7. Akai Gurley:   O Peter Liang, o se alii leoleo mai Saina o le New York City- sa fealua’i solo if ale maualuluga o le malo-ma lana fana ua aveese ma le faamoega i le  2014 –o le taimi lea na ia fana atu ai se pulu –ma toe fiti ese ina ua tau i se aupā-ma lavea ai Akai Gurley e 28 tausga le matua, o se alii uliuli lea. 

8. Jamar Clark: O Novema 15 na fana oti ai Jamar Clark e 24-tausaga le matua ma tulai mai ai ni vaiaso o solo tete’e  i Minneapolis. O Alii Ofisa o Mark Ringgenberg ma Dustin Schwarze sa taumafai e saisai Clark i le taimi na fana ai o ia faatasi i lona ulu 

9. Brendon Glenn: O le Pule o Leoleo o Los Angeles o Charlie Beck ia Ianuari na fautuaina ai ni moliaga tau solitulafono e faasaga i le Alii Ofisa o Clifford Proctor, lea na ia fana oti se tagata uliuli e le faa-‘auupegaina, o Brendo Glenn e 29 tausaga le matua, i lona tua.

10. Christian Taylor: O se alii taalo lakapi uliuli o le iunivesite na fana ma oti ai i le faagasologa o se gaoiga na masalomia i le fale faatau taavale i Arlington, o Christian Taylor, 19 na fana ina ua uma ona valau ma i le alii leoleo o Brad Miller,o ia lea e pa’epa’e. Na fana mai Miller mai totonu o le matagaluega.  Na tonu i se suesuega tele na fai ina ia fai se fuafuaga i lea alii ofisa.  

E matua leai se masalo e faapea o loo i ai se faiga i totonu o nei mataupu uma. E le manaomia le avea o oe ma saienesi tau roketi e te faatulagaina ai. A fua mai nisi o nei mea na tutupu, e te le talitonu ‘ea e faapea o le atunuu o le sa’oloto ma le atunuu o e totoa ua avea ma soo se mea ae peitai? O le mea moni e faapea mo nisi taimi i le taimi nei, o le toatele o i tatou ia e mulimuli i mea o tutupu i totonu o le Iunaite Setete-atonu ua faapea poo afea ‘ea o le a toe tali mai ai oti o nei tagata uli e toe faatiga i Leoleo. 

Ia, i le lua aso talu ai, na tulai mai se tagata sa i le Army muamua o ia lea ua matua le fiafia tele i le tafana o alii uli se to’alua ma ua faapea ai ona manao e fasioti tagata papa’e, “aemaise ai lava alii ofisa papa’e.

Na ia tafana ni alii ofisa e 12, ma fasiotia ai le to’alima o i latou e tusa ai ma le mea na ia faamatalaina o le “aso mata’utia mo le faamalosia o tulafono a le Iunaite Setete  talu mai le aso 11 o Setema 2001, osofaiga a le ‘au-faatupu faalavelave. O le faalavelave talu ai nei lea ua auina atu ai se faate’i ma faalogoina  e le lalolagi atoa e ala i le fefe e faapea atonu ua lamatia le Iunaite Setete i se taua a ona ia lava tagata. O Ananafi  na fetuu ai e le Peresetene o Barck Obama lea osofaiga e faapea o se “osofaiga mataga, ua fuafua lelei ma o se osofaiga inosia i le faamalosia o le tulafono. “E leai se ta’u amiotonuina mo nei ituaiga o osofaiga pe o soo se sauaga e faasaga i le faamalosia o le tulafono,” o le faaaliga lea a Obama. “O soo se tasi e aafia i nei faiga fasioti tagata faatautala o le a matua noatia ina ia tali mai. O le a faatino le Amiotonu.” 

E tatau ona aveese lena faiga, na faailoa foi e le Peresetene misi faaupuga ta’utino. 

Afai ua le faatuatuaina e tagata leoleo, o le a faigata lea mo le faamalosia o le tulafono o loo ofo atu ia o loo faatinoina se galuega tele, i latou ia o loo faia le mea sa’o, ma ua faigata lea mo latou ola,” o le faaaliga lea a Obama.”

 “A fai mai tagata  e ‘taua ola o tagata uli,’e le faapea ai e le taua ola o e lanumoana,” o le faaaliga lea a Obama e faasino i alii leoleo. Ae peitai, i le taimi nei, o faamatalaga ua faaalia ai e faapea o tagata uli e sili atu ona afaina i nei ituaiga o faalavelave. O loo i ai se avega faapitoa ua tuuina atu i luga o se vaega o tatou tagata sitiseni.” Tatou talanoa la i le tautala i le mea ua manino mai. O le mea moni o loo i ai lava se ituaiga o gasegase i totonu o le mafaufau o le Iunaite Setete-o loo sa’o. O fea o i ai le amiotonu? Faapefea le faimea tonu? O le a le mea ua tupu i le nuu o le sa’olotoga? Ona tatou taunuu mai ai le i lenei parataiso ua tatou faaigoaina o Samoa.

O i ai se faimea tonu ma le amiotonu i lenei atunuu?   Faamata e mafai ona tutupu nei faalavelave uiga ese ma le mata’utia  o loo tutupu i Amerika i iinei?  E ui lava ina o le tatou faafitauli e sesega pe a faatusa i faalavelave i totnu o le Iunaite Setete ua matou faailoa atu i luga, e anoano a tatou faafitauli uiga ese. O Tala e pei o le tala ia Suitupe Misa ma le faiga o ia e Leoleo i se taimi ua mavae atu-e taua ona iloiloina. Ae peitai-e le ona pau ai lena.

I totonu o foliga matagofie o le fale o le Matagaluega o Faamasinoga i Mulinuu, o alii, tamaitai ma tamaiti  o loo auina atu i le falepuipui i aso uma mo ituaiga uma o solitulafono matuiā. E ui lava i le aofai o faamasinoga tau gaoiga ma le faomea ua sasao e pei o se faama’i ua le mafai ona faafoe, toso tein ma solitulafono tau feusuaiga o ituaiga uma ua avea ma vaaiga maua pea e faalumaina ai. O amio faa-talitane ua matua maualuga. O teine talavou ua matua sauaina e ala i feusuaiga e o latou lava tamā poo tagata o latou aiga.. Ona soso’o ai lea ma sauaga e faasaga i fafine ma tamaiti e aafia ai. Ma o le mea moni-o loo faaauaupea ona avea le pule i le ola ma mataupu anoa i totonu o Samoa. 

Ia-o le a la le mea o loo tupu i totonu o le atunuu e “Faavae i le Atua”?

O le a le mea na te una’ia se alii e fai se faiga saua ona o le tetele o le ita, poo le isi o le faaaoga o lona afafine talavou ma faaleaga o ia i lona olaga atoa? O le a le mea na te una’ia se tagata talavou e fai se mea matuia o le faamuta lea o lona ola? 

Ua saua tele ‘ea lo tatou atunuu i le faafeagai ai ma nisi tagata? 

O fea le ekalesia? Faapefea ta’ita’i o le nuu, o le a le latou mea o fai i le mea o loo tupu i aso nei? 

Ae o fea o i ai le malo? O popona ‘ea i lenei mataupu? O afea ‘ea o le a ala mai ai ma fai se sootagata i le va o le mativa, leai o se galuega, faafitauli ma le tele lava o isi faafitauli lautele? 

E lelei ona faamanatu ia i tatou iinei o le tolu vaiaso talu ai, na maua ai se tasi o lenei atunuu ua oti ma o loo tautau mai se fale o se ekalesia i totonu o le taulaga?  O loo loma se suesuega pe faamata na pule lea tagata i lona ola pe na fasiotia ma faatautau ai. I totonu o le isi vaega o Samoa, o se alii onā na ia faatinoina se gaoioiga uiga ese-o le fana lea o le gutu o se tasi, ae o loo pupula atu. O le a ‘ea le mea o loo tupu ae o le a le fe’au o taumafai nei faalavelave e faailoa mai ia i tatou? 

.A’o tatou malolo la i lenei Aso Sa, o ni fesili ia ma ni mataupu e tatau ona mafaufau i ai. Ia faa-avanoa lou mafaufau mo aiga ua aafia ai, ma musumusu atu se tatalo mo le to’afilemu i totonu o Samoa ma le lalolagi atoa. 

Ma o le a ni mea e tutusa ai faalavelave i totonu o le Iunaite Setete o Amerika ma Samoa? Ia, o ni faalavelave ia e tutupu i se taimi o le a tatou manatua pea mo faanoanoaga e pogai mai ai, o mea faatiga ma le faalumaina e le muta. 

Ia outou maua Samoa se Aso Sa to’afimalie, ma ia faamanuia atu le Atua!  

By Mata'afa Keni Lesa 10 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>