O TAEAO FAITAUINA O SAMOA –O TAEAO O LE TALALELEI-Mai le Tusi o le Suaga a le Vaatele

10 July 2016, 12:00AM

O Taeao ua ta’ua i luga, fai mai upu o le tu’itu’ifafau o Samoa, o Taeao ia na suluia ai Samoa i ‘ave malolosi o le Talalelei-ma ua tu’u ai le fetaua’i ma le fefulituaa’i o le atunuu, ae alo mai e tautua i le Keriso Manumalo ma lona finagalo.

O ‘Ave ia o le Tala Lelei ua le toe manatu ai tama fanau a Samoa e fai o latou loto, ae ua tuuina atu o latou ola mo le Tala Lelei. Le na pogai ai ona o atu ae tu’u o latou aiga moni-e tala’i le Tala Lelei i le Vasa Pasefika-ma liu efuefua ai i Papua Niu Kini, Niu Eperiti, le Atu Solomona, Niue, Kilipati atoa ma le tele o isi lava motu ‘ainā o le Vasa Pasefika.

ai mai ua sui e le Atua taeao leaga e avea ma taeao lelei.  O taeao o le masesei ma le toto masa’a ua suia nei e avea ma taeao o le ‘aleaga aloalo faa-Kerisiano, ua mafai ai nei ona talatalanoa ma saili fofō mo faafitauli-ae ua leai se agaga o le faa-maligi-toto.

Taeao ia na tonu ai i tua’a ua mavae- ona pau lea o le auala e faavae a’i lona Malo sa tau su’e ina ia mausalī e le toe faagae’etia. Le faamoemoe lea ua faatu ai nei lona Malo e pei ona valo’ia e Nafafua ae velo’aso i ai le ‘aufai-tofā ma le ‘aufai-uta-se’i sema ai ni manuia mo fuaga o lalovaoa. E na o le tolu pe lava Ekalesia ua pine i upu taoto o Samoa o latou taeao faitauina-aua na sunu’i le alāfale i le faavae popo o afioaga ma alalafaga na taunuu i ai.

O le ala lea na finagalo ai Malietoa o le a faase’e-tuāfaiga-ae ave ona mamalu i “Ao o Faalupega.” Na tonu ai ia Tuala ma Salā o le a ‘ave o la mamalu i auauna a le Atua. Lea ua faalupe ai nei –“Faife’au”-o “Susuga”ma “Afioga.”

O le Taeao muamua lava o le Tala Lelei, o le Taeao lea na taunuu ai le Misionare o Ioane Viliamu i Sapapalii, Savaii i le 1830, O le ogaeleele na taunuu i ai o lona igoa o “Mataniu-feagai ma-le-ata.” O lenei Taeao- na taunuu ai ia Malietoa Vaiinupo le Tala Lelei ma suia ai lona suafa ia Malietoa Tavita. O le Taeao lea o le Ekalesia LMS i le 1830. 

O le Taeao lona lua-o le Taeao nai “Faleū ma Utuagiagi” i Manono. O le Taeao lea ma le aso na taunuu ai Misi Tana o le Ekalesia Metotisi ia Lei’ataua- ma faavae ai loa le Ekalesia e pei ona i ai i le 1835.

O le Taeao lona tolu, o le Taeao na i Malaeola ma Nafoaga i Lealatele i Savaii. O le Taeao lea na taunuu ai le Ekalesia Katoliko Roma ia Tuala ma Salā-na malaga mai ai Faife’au o Silipele ma Lutovi’o i le aso 25 o Aokuso 1845.

10 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>