38 miliona tala ua fa’amatu’u e le Faletupe o le Lalolagi mo le malo

Tusia Fa’aliliu e Maiava ,

237 Hits

WORK IN PROGRESS: The reconstruction of the Faleolo International Airport.

WORK IN PROGRESS: The reconstruction of the Faleolo International Airport.

Ua toe fa’aopoopo mai e le Faletupe a le Lalolagi, le isi sefuluono-tesi-onolua miliona tala Amerika (US$ 16.62 miliona) mo le malo.

O lea fa’ai’uga a le Komiti Fa’atonu o Pulega a le Faletupe na faia ananafi, o le a saofaga ai le faigamalo a le Palemia, Tuila’epa Sa’ilele Malielegaoi e fa’amae’a lelei ai le Poloketi o le Malae Va’alele o Samoa, e fa’aleleia atili ai ma si’itia tulaga tau-saoalemu ma le malu-puipuia o femalagaa’iga fa’ava-o-malo ma tulaga tau-fale e mo’omia. 

Talu ai lava le mamao-‘ese mai o Samoa ma le lalolagi ae maise le la’iitiiti o le faitau-aofa’i o ona tagata, e tumau ai pea ona fa’alagolago i femalagaa’iga i le ‘ea e feso’ota’i atu ai i maketi tetele i le lalolagi ma saofaga ai le atina’eina o vaega taua e pei o tagata-maimoa mai fafo.

I le tausaga e 2013, e silia i le 20 pasene o tupe-mama mai alamanuia tau-femalagaa’iga ma e taua ai lava le fa’aauau ai pea ona fa’aleleia o tulaga mo’omia uma mo femalagaa’iga.

O le seleni fa’aopoopo lea, o le a fesoasoani i galuega mo le poloketi ua ta’ua, e fa’atele atili ai ma fa’amalosi le ‘auala mo va’alele ma toe fa’atulaga ai vaega mo’omia - e aofia ai fale - mo penisini ma suau’u. O nei tulaga uma, o se vaega o fa’ai’uga a le Malo o Samoa, e fausia se fale-tele fou fa’atali-pasese, o se nofoaga mo ta’avale ma isi fale mo’omia i le Malae Va’alele Fa’ava-o-malo o Faleolo.

 “O femalagaa’iga i le ‘ea, o le olataga lea o atunu’u laiti e pei o Samoa, e feso’ota’i atu ai i maketi fa’ava-o-malo, e maua ai le tele o avanoa faigaluega ma ‘aumai ai le anoano o tagata-tafafao mai fafo,” o le saunoaga lea a Chris De Serio, le Ali’i-poto Fa’apitoa i Femalagaa’iga a le Faletupe o le Lalolagi. 

“O le poloketi lea mo le fa’aleleia o le malae-va’alele a Samoa, o lo’o sologa lelei lava i le taimi nei ma o le seleni fa’aopoopo lea, e lagolagoina ai le va’ai-mamao a le Malo mo le atina’eina o tamaoaiga tau-fefa’ataua’iga fa’apea tagata-maimoa.” 

O le lua lenei o tausaga o fa’atino le poloketi lea ma ua tele ‘ausaga lelei ua va’aia a’o aga’i atu i le taimi fa’atulaga e mae’a ai, i le 2019. 

O le amataina o le lafoga - Lafoga mo le Saogalemu ma le Malu Puipuia o pasese malaga-‘ese fa’ava-o-malo, o le a mafai ai ona fa’atupeina le tausia lelei o le saogalemu ma le lelei atoatoa o femalagaa’iga i le ‘ea; ua fa’aleleia mea-faigaluega fui-mu ma ua fa’aaogaina nei; ae maise le fa’aleleia o feso’ota’iga fa’aona-po-nei lea ua fuafua e mae’a i le fa’ai’uga o le tausaga. 

O le poloketi lenei fa’atasi ma le seleni fa’aopoopo ua maua nei, o nisi ia o vaega o poloketi fa’asolosolo i lalo o le polokalame mo le fa’aleleia o femalagaa’iga i le ‘ea mo le itulagi o le Pasefika, sa fuafua e si’itia ai tulaga o le saogalemu i le Pasefika atoa ae fa’a’autu i le fa’aleleia o fale-‘autu i malae-va’alele, ina ia ‘ausia le maualuga o femalagaa’iga fa’ava-o-malo.

© Samoa Observer 2016

Developed by Samoa Observer in Apia