‘Āuai le Loia Sili i fuafuaga e tafi’esea ai faiga-pi’opi’o

Tusia Mathias Huckert ma Fa’aliliu e Maiava ,

218 Hits

LOIA SILI: Lemalu Herman Retzlaff

LOIA SILI: Lemalu Herman Retzlaff

 O se amataga lelei tele lea mo Samoa pe a ua tonu e sainia se Maliega a Malo ‘Aufa’atasi e Fa’asaga i Faiga-Pi’opi’o.

O le finagalo fa’aalia lea o le Loia Sili a le malo, o Lemalu Herman Retzlaff. 

“E matua to’atele tagata ua fa’apea mai, ua tatau ona topetope Samoa e sainia le Maliega lea,” o le fa’aaliga lea a Lemalu i le Samoa Observer. 

 “Pau lava la’u tala, e iai se mafuaga lelei e tatau ai ona sainia loa lea Maliega. Ua matua mamao lava le tulaga ua ta’amimilo ai tatou nei mo le fa’atinoga o tulafono fa’alotoifale. A o se fa’amalosi’Au mo a’u nei o le Loia Sili a le malo, ona ua iai tulafono nei.

 “E matua faigofie lava i le malo ona taga’i toto’a iai peita’i, e pule lava latou, e le o se fa’ai’uga fo’i e faia e se tagata-faufautua mo tulafono pei o a’u.” 

O Lemalu sa saunoa i se fono a sui-sinia o le malo sa faia i le vaiaso nei i le faletalimalo o le Millenia, i le mata’upu lava lea o faiga-pi’opi’o.  

O le Loia Sili, o se tasi o to’oto’o na vala’aulia e saunoa i le “Mafutaga fa’aleA’oa’oga mo Ofisa Sinia a le Malo”, lea sa tu’u-fa’atasia e le Poloketi a Malo ‘Aufa’atasi e Tete’e Ai Faiga Pi’opi’o i le Pasefika fa’apea le Ofisa o le Komisi o Galuega a le Malo (PSC).

“Ua tele na’ua tulafono a Samoa ua iai, e fa’asaga i tagata tonu o faia nei ‘auala ma faiga-pi’opi’o,” o le fa’aaliga lea a le Loia Sili. 

“E aofia ai faiga-fa’atosina matuia e o’o lava i le fa’aaogaina o tupe-faitele a le ‘aufailafoga e Ofisa Sili o Pulega.”

Sa una’ia e le mafutaga lea le taumafai lea o matagaluega ma fa’alapotopotoga a le malo e talia ma fa’amaonia Maliega ia a Malo ‘Aufa’atasi. 

O le Maliega lea a Malo ‘Aufa’atasi, o se maliega sa talanoaina fa’alaua’itele e sui-‘auai o Malo ‘Aufa’atasi,  ma o le ulua’i fuafuaga lea ua talia aloa’ia fa’ava-o-malo.  

E mo’omia ai malo ma atunu’u ‘auai, e fa’atinoina nisi o fuafuaga e fa’afeto’ai ai faiga-pi’opi’o e ono a’afia ai a latou tulafono, o fa’alapotopotoga ma fa’atinoga lelei. O ia fo’i fuafuaga e fa’amoemoe e puipuia ai faiga-pi’opi’o e aofia ai faiga-fa’atosina i le lotoifale ma atunu’u i fafo, o faiga-taufa’avalea, o fefa’ataua’iga tau-fa’asese ma tupe fa’agaoi.

I lana saunoaga, na fa’atusatusa ai e le Loia Sili le Fa’avae o le Malo o Samoa ma le Maliega lea a Malo ‘Aufa’atasi.

I le va’ai lava ia fa’aleTulafono, o le tele o maliega a Malo ‘Aufa’atasi, ua fa’amaonia le o-fa’atasi ma tu’utu’uga o lo’o aofia i le Fa’avae o le Atunu’u o iai nei.

O vaega ia e aofia ai tulafono i le fa’aaogaina ma le va’aia lelei o tupe-faitele ae maise o fuafua ua fa’ata’oto i le fa’amasinoga amiotonu ma ‘au’aunaga mo soligatulafono. 

O lo’o aofia fo’i i le Maliega lea, ‘auala e fa’atino ai ma fo’ia faiga-pi’opi’o i le vaega tuma’oti. I le taimi o fesili ma tali, na fa’aalia ai e nisi o ofisa sinia sa ‘auai, le leai o se mafuaga tatau e ono sainia ai fua e Samoa lea Maliega.

Ae saunoa Lemalu, mo le aga’i i luma, e ono manuia ai Samoa – o se sui o Malo ‘Aufa’atasoi pe a sainia lea Maliega.  “E iai lava nisi finagalo fa’aalia, e fa’apea e leai se taua e sainia ai e Samoa lea Maliega, ae le tatau ona iai o ni manatu fa’apea.    “Ua mae’a lava ona ‘ou fa’amalamalama atu, o le avea ma Loia Sili a le Malo, e le agava’a ai ona ‘ou fai atu i le malo e saini loa. 

© Samoa Observer 2016

Developed by Samoa Observer in Apia