Aloalo le Faletalimalo i Taumeasina mo le Aso tele e tatala aloa’ia ai

By Sarafina Sanerivi 10 June 2016, 12:00AM

Ua fuafua nei le tatalaga aloa’ia o le Faletalimalo i Taumeasina, e faia i le Aso 01 o Iulai, 2016.

Toe tolu lava vaiaso o totoe, ona tatala aloa’ia lea o lea galuega tele, ma ua aloalo atu nei iai le Pulega ma le ‘Aufaigaluega a le Faletalimalo ae maise fo’i le tulimata’ia e le atunu’u lautele o lea fa’amoemoe. 

O le afiafi o le Aso Lulu, na talimalo ai le faletalimalo lea, i se taumafataga mo le mamalu o le atunu’u, e fa’afiafia ai ma se’i tofo fo’i i le ituaiga taliga-malo o le a iai i le aso e tatalaina ai le Faletalimalo.

O le fa’aaloalo lea sa fa’atinoina lava i Taumeasina, na tofo ai le ‘auvala’aulia i ituaiga kuka ‘ese’ese ma so’o se ituaiga taumafa o le a maua i le faletalimalo.  

E le gata i lea, o le taumafataga lea, o se avanoa mo le ‘aufaigaluega e tapena lelei o latou tagata mo le tatalaga o le faletalimalo, o se fa’aaliga lea a Cecilia Frost-Nasau, le Pule o Fa’atauga ma Maketi a le Faletalimalo. 

“O se avanoa e a’oa’o lelei ai le matou ‘aufaigaluega, ma fesoasoani fo’i iai, ina ia atoatoa ma le-popole na’ua pe a tumu mai tagata i le aso e tatala ai ia Iulai,” o le fa’aaliga lea a Cecilia. 

“O le po la lenei, e gata o le avanoa mo a matou malo e fai ai sina tofo i mea o le a maua i Taumeasina nei, ae o se avanoa fo’i mo le matou ‘aufaigaluega e fa’amasani ai i le fa’afeiloa’iga o tagata ma ‘aua le popole pe fefefe fo’i.” 

Na ta’ua e Cecilia, o le to’atele o le ‘aufaigaluega, e o-mai lava ma a’oa’o mo le faletalimalo ma galuega e fa’atinoina, e le gata ia tauagafau, tausa’afia ma amio-pulea pe a feagai ma tagata ma o le taumafataga la i lea po, o se avanoa mo latou e a’oa’o ai ma fa’ata’ita’i ma sauniuni fo’i mo le tatalaga tele i le masina fou. 

Ua faia fo’i se ‘au-siva a le ‘aufaigaluega e saunia fa’afiafiaga mo malo ma le ‘auvala’aulia, ma o le po la o le Aso Lulu, sa fa’afiafiaina ai le ‘auvala’aulia i fa’afiafiaga ‘ese’ese na saunia e le matou ‘au-siva fou lea. 

“Sa mafaufau lava e ‘aumai se ‘ausiva maiu tua mo le faletalimalo peita’i, o le to’atele lava o le ‘aufaigaluega, o tagata e matua talenia lava ma manatu ai loa, e sili ona tu’u-fa’atasia o se ‘au-siva a le faletalimalo lava ia. O le po nei la, le ulua’i taimi o le a fa’afiafia ai le kegi lea i luma o ni malo to’atele ma e matou te manana’o ia matua lava tapena ma ia lelei ina ia o’o atu i le aso ‘autu, ua leai se isi e toe popole pe matamuli fo’i.”

E le’i mana’o Cecilia e fa’ailoa mai nisi o oloa teu-lililo a le faletalimalo, e aofia ai kuka ‘ese’ese ma taumafa fa’apitoa o le a maua i Taumeasina pe a mae’a ona tatala aloa’ia ae talitonu, e matua mata’utia lava ma tele mea fou o le a maua ai mo le mamalu o le atunu’u. 

Sa fa’ailoa mai fo’i e le Sifi Kuka o le Faletalimalo, le ali’i o Brad Martin, e leai lava nisi mea tele, ae na o mea-tutu’a o le a foufou ia mo vala’aulia ma le atunu’u aoao pe a o’o ina tatala le faletalimalo. 

“Ioe, o tulaga masani lava, o taumafa fa’aSamoa moni fa’atasi ma nai mea fou mai fafo, a o le a fa’ate’ia ai le to’atele,” o le fa’aaliga lea a Brad, o se ali’i mai Ausetalia. 

 “Ua aloalo atu nei i lena aso tele ma o lo’o galulue malosi lava i le taimi nei ina ia fa’ai’ila mea uma – o taumafa ma mea-inu mo tagata uma o le a ‘auai.” 

O le sifi-kuka o Brad, e lua tausaga o lana konekarate ma le Faletalimalo ma a’o iai i Samoa nei, o lo’o ia faia ni a’oa’oga mo le ‘aufaigaluega Samoa, i le feagai ai ma le vevesi o le a iai le umukuka ia Iulai pe a tatala.

“Fai si leva o matou galulue fa’atasi ma nisi o le ‘aufaigaluega i le faletalimalo nei ma ua fa’asoa fo’i iai se malamalama ma se iloa. O ni tagata galulue malolosi tele  ma e naunau lava ia iloa uma so’o se mea, e fia a’o’oga uma. Talosia ia uma lo’u lua tausaga i Samoa nei, a ua i se tulaga lelei e  va’aia ai ma ta’ita’ia le kegi-kuka  ma fa’aauau ai pea le ‘au’aunaga lelei mo le faletalimalo.

 “A’o nanei lava ia, ua matou ‘ou fiafia lava ona o le tulaga ua iai le ‘au’aunaga, le talia ma le va’aia lelei o malo ma ‘ou te iloa, o le taumafataga lenei o se avanoa aoga tele mo latou e fa’ata’ita’i ai ma tu’u-fa’atasia mea uma sa a’oa’oina ai muamua. Ua matou sauniuni fiafia mo le aso e tatala ai le matou faletalimalo.” 

By Sarafina Sanerivi 10 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>