Manatu O Le Fa’atonu - O le Fe’au mai se alii aisi e 83 tausaga le matua

Tusia Mata'afa Keni Lesa ma Faaliliu e Seagaitumua Tupuola ,

150 Hits

O le tiga matuitui o le faitau atu i le olega a se alii aisi e 83 tausaga le matua i luga o ala tetele o Apia-lea na lomia faasalalau i luga o itulau o lenei nusipepa-i ni nai asu ua mavae atu- o se faailoilo lea o taimi. O lea tala na lomia i lalo o le ulutala “O le tagata aisi aupito i matua o Samoa,” i totonu o se lalolagi moni o le tala ia Isaia mai Alamagoto-sa le tatau ona tupu i totonu o le “parataiso.”

Ua matou fai atu faapena ona afai e moni ua matua faamanuiaina Samoa e tusa ai ma le mau a o tatou ta’ita’i, e le tatau la ona i ai ni a tatou tagata aisi. i soo se nofoaga .

Ae peitai- i lenei lava talutalu fou o le olaga lea o le a toatele ai tagata e nonofo i aiga ma tausi e i latou e pele ia i latou, o lea ua faamaonia e Isaia  e anoano galuega e ao ona fai e o tatou ta’ita’i-e aofia ai le faa-vasegaina o faafitauli e pei o le mativa ma le faatupula’ia pea o tulaga faigata i totonu o aiga-o loo matua afaina ai i latou.  Ua outou silasila la, i le tele o tausaga, o lea ua avea Isaia ma se tasi o foliga e vaaia pea i luga o tafā-ala o Apia lea o loo aisi ai e aunoa ma le ma mo se tupe e ola ai.

O lea la ua matou tuuina atu ai ni nai fesili ia te ia. “O le soifuaga ua matua faigata lava i aso nei ma ua taugata mea uma lava,” o lana faaaliga lea. “Afai e te le faigaluega-e i’u ina e mole.” Faigaluega? O anafea na avea ai le aisi ma galuega i totonu o Samoa? Ia-mo Isaia lava ia, e leai se isi avanoa o ia te ia ma o lea ua na matua lagona ai-o le faamoemoe lenei o lona olaga. Ina ua fesiligia pe na te le’i lagona lava ua o’o i le taimi e nofo ai i le fale ae tausi o ia, fai mai a ia- e leai.

 “Ou te le mana’o e avea a’u ma avega mamafa i la’u fanau. O lea ua ‘ou maua ai la’u lava faiga e maua ai tupe e fesoasoani ai i lo’u aiga. O le toatele lava o tagata e ula i le mea o loo o’u faia ma e leai ni tupe ou te maua mai tagata i le tele o taimi. O nisi o i latou e manatu o a’u e valea…”

O le Valea pe leai, o le mea moni e faapea- o le mana’o e leai sona muta’aga. Na te le faaeseeseina tagata, lo latou matua ma le nuu e o mai ai. O le lotolotoi i totonu o le faatiga e igoa o le mativa ma le mana’o, e fai ai e tagata soo se mea ina ia mafai ai ona faasaoina. O Isaia o se faataitaiga taua lea. .Ua outou silasila la-afai e vaai tagata i le aisi e avea ma ala e ola ai, ona tatau lea ona e popole. Aemaise ai lava i totonu o se atunuu lea e anoano tamaiti talavou ua tua i se olaga solitulafono ma le faatauina atu o oloa taugofie i luga o ala tetele ina ia mafai ai ona ola. E le o se tulaga lenei e masani ai. O se tulaga lea sa le tatau lava ona i ai. Ma o le tulaga lena e tatau ona tatou faamanatu ia i tatou lava i aso nei. O Tala e pei o le tala ia Isaia e le o ni tala ia e masani ai. E tatau ona avea ma valaau e fafagu ai i luga o tatou ta’ita’i. A tatou mafaufau i ai, o le pogai lenei ua tatou iloa ai le tulaga faaletonu o loo faaauau ai pea ona faamaumau e lenei faigamalo miliona ma miliona e totogi ai tofiga tau polokiki ae fulitua i le tau o le o le faaaoga sese ma faiga pi’opi’o. O le tau lenei e totogi e tagata. O le a faa-toateleina pea tagata o le a tua i le olaga aisi ina ia mafai ai ona ola.

O ata vaaia o tamaiti o loo avea ma faatiga i tagata ese i luga o ala tetele i ituaiga uma o itula ina ia mafai ai ona maua se tala-e leai se taimi na avea ai ma vaega o le laufanua o Samoa se’ia o’o mai i le taimi talu ai nei lava. O i latou o ata vaaia ia e faalumaina ai tatou. O ata vaaia ia mai atunuu o le lalolagi lona tolu ia e nonofo ai tagata i nofoaga faa-taufusi, ma ‘ai le pefu ma le eleele.  Ae o lea lava o loo tupu iinei i totonu o Samoa i aso nei. Alu la e malaga i Vaitele, Tausui ma Fugalei-ioe uso e-e te le tau alu mamao-o lena o loo nonofo mai i le totonuga-lemu o le Taulaga o Apia e peiseai ua ala ona nonofo mai iina- e faamanatu mai ai ia i tatou le mea moni. 

O se vaaiga la e matua eseese mamao, e te maua i le nofoaga e faatutῡ ai taavale i le fale o le malo ma isi lava fale o le malo, o le laina o taavale o loo faaaoga e alii ofisa o le malo e matua uiga ese lava ma e leai se mea e te mafaia vagana ai le ofo. A fua la mai sea vaaiga o mea lelei, faaaoga sese ma le soona faaalu o tupe, e le faigata ona e mateina le mea o faatῡtῡ i ai ma mea faamuamua a lenei faigamalo. E na o na mea uma ae le o aofia ai tagata.

Ua tatou iloa o lenei talanoaga faatiga e mo le Aso Faraile. Ua matou iloa ua uma ona matou faailoa atu nei mea i lea taimi ma lea taimi, ae o le mea tonu lenei o loo tupu i totonu o lenei atunuu ma e le mafai ona matou fulitua i ai. O le mau oloa ma le fai mea pi’opi’o o loo faagasolo pea i luma i se saoasaoa e te le talitonu i ai ae o le “tagata mativa” ma “vale” ua lafoa’i i tua e puipui i latou lava. O lo matua afaina i latou.

Ae aliali mai lava e peiseai e leai ni tagata faapea.I le taimi nei la, mafaufau i le tulaga maualuga ua siitia i ai Samoa e tusa ai ma itu e lua –o le tulaga faa-itulagi ma le tulaga faava-o malo Mafaufau i le tala o le manuia o le tamaoaiga o Samoa sa le mafai ona faatusaina i totonu o le Pasefika i ni nai tausaga ua mavae atu. O ni matati’a ausia ia e ao ina mitamita ai. Ae peitai-o le a le mea ua tupu? O fea na tatou sasi ai?

O le mea moni e faapea i totonu o nisi nuu i aso nei, o le tulaga o le soifuaga e matua le talia lava lona tulaga leaga. A fua i le itiiti o punavai o manuia e faigata i tagata ona faamalie faatasi ma mana’oga o aso uma o le olaga-ua tagi aue mai ai o latou loto, ma moomoo mo se tasi o i fafo se’i faalogo atu ia i latou.  Faamata ‘ea o faalogo mai le faigamalo silisili ese? Poo ua matua pupuni lelei o latou taliga ma o latou mata i le aioi atu a le tagata mativa? O se tagata aisi e 83 tausaga le matua -e le o se mea lea e mitamita ai. Ma afao e i ai sau fanau o loo faatau atu oloa i luga o ala tetele ae le o i le aoga, o lona uiga-e i ai lava se mea o loo matua faaletonu i se isi nofoaga.  O le fe’au mai ia Isaia e faapenei: Ala maia Samoa a’o le’i tuai na’uā!

© Samoa Observer 2016

Developed by Samoa Observer in Apia