O LA’U TALA FO’I

10 June 2016, 12:00AM

1. Matauina i Tala Fou fai mai ua falepuipui le Alii Saina lea o Jack Chen-lea na faa-suafa ia Tupa’i-talu ai ni faiga pi’opi’o na ia faia- e ‘faasese ai lana kamupani ma le faafesuiaiga o ana oloa.

O le faamasinoga la o lea alii Saina-na faamaonia ai lona nofosala i ni moliaga se lua na tuuina atu i le Faamasinoga- e tusa ai ma taupulepulega leaga-faatasi ai ma le faaaogaina o tupe leaga- e sili atu i le $85 miliona tupe Hong Kong!

A tatou toe tepa la i tua i lenei alii Saina-ona tatou manatua lea o le tulaga pagatia na aafia ai Samoa atoa-talu ai ana faiga tau faasese-lea na matua pogai ai ona liliu Samoa atoa e totō le laau o le nonu-fai mai e mafai ona la’u i fafo-ae o lea lava na tatou vaai tino i le matua faaseseina ai o le atunuu atoa e aofia ai Upolu ma Savaii!

O lona uiga la-o lea tagata o le matua Polofesa lava o faiga pi’opi’o-ae o lea ua mautinoa nei-e matua leai lava se malosi o le Polofesa e taofia ai le faatinoina o le Tulafono mo tagata uma lava!

A tatou tilotilo la i le faaseseina o le atunuu atoa e lenei alii Saina e ala i faiga pi’opi’o-ona tatou fesili lea-‘o le a le pogai ua tuai ai ona fai se fuafuaga faale-tulafono a le Faamasinoga-e tusa ai ma faiga pi’opi’o a le faigamalo a Samoa-lea e faitau miliona ma miliona tupe a le atunuu ua maumau ai?

I se tasi la faaupuga-“o ai e i luga atu o le Tulafono-ao ai e i lalo ifo o le Tulafono’? O le a le mea ua tupu i le ‘faimea tonu-‘mautali atu’-‘faigamalo lelei’? O lona uiga-e sa’oloto le Malo e soli le tulafono ae tapu tagata o le atunuu ona soli le tulafono? O le a sou taofi?

2. Matauina i Tala Fou o lea foi ua toe fai osofaiga a tupulaga talavou-lea ua tuua’ia i le osofa’ia o tagata e leai se latou sala- ma gaoi a latou taumafa ma isi mea! O le ata la ua aliali mai-o lea ua ataata mai faiga a tagata faatupu faalavelave i le lalolagi- ia ua faaigoaina o le ISIS!

Afai la o tupulaga talavou ia ua taulamua i nei faiga-o le fesili-O FEA O I AI O LATOU MATUA? Aisea ua tuufau ai nei tamaiti e fai nei uiga mataga ma le inosia? E faapefea la pe a liliu atu nei aiga o ia tagata ua osofa’ia-e fasi faamo’amo’a?

Afai la ua le mafai e matua o nei tamaiti ona vaai lelei a latou fanau-ua tatau loa la ile Ofisa o Leoleo ona fai se latou fuafuaga e taofia ai lenei faatautala! Afai la o ituaiga nei o tupulaga fai mai e faamoemoe i ai le lumana’i o Samoa-o le lumana’I la lea o le fasi tagata ma le gaoi o meatotino a isi tagata? O le a sou taofi?

3. Matauina ma le fiafia le toe vaaia o le toe taliu mai o tama matutua o le Manu Samoa e pei o Alafoti Faosiliva ma David Lemi ma isi- mo le taaloga ma Georgia i le faaiuga o lenei vaiaso.

O le manaia o le toe fo’i mai o ia alii-ia mafai ona latou faailoa atu i tama fou o le Manu Samoa-le faiga tonu o le taalo masani a le Manu Samoa-ma ia ‘aua ne’i fia faata’ita’i fua i faiga a tama o isi ‘au-lakapi!

O le toe foi mai foi o tama tuai o le Manu Samoa-o se una’i malosi lea i tama fou o le Manu Samoa-ina ia matua faasaga e fai le taaloga-lea ua lautogia ai i latou uma-e fai ma sui o le atunuu atoa! Ia-o le upu masani lava ia i mea nei o taaloga fai mai –o le ‘au e sili ona lelei-o le ‘au lena e manumalo’-ae fai mai le upu a le ‘au-matutua’-‘E gau lava le sila i le fa’i’. O le a sou taofi?

10 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>