TALATU’U O LE ITU O SALEFAO

Tusia Fuimaono Na’oia Faasavalu Touli F. Tupua ,

606 Hits

Fai mai faamaumauga a Misi Tana- o le Itu o Salefao- e mafua mai ia Tuiatua Lefao-lea fai mai Misi Tana na sau mai Tutuila- ma sa nofo i Lepa, ma avea ai lea nuu ma nofoaga autu o le “Itu Salefao”. O le tala o Lefaoseu o loo ta’ua ai lenei tagata.

O Lepa e aofia ai pitonuu o Saleapaga, Si’upapa, Lealatele, Lepa, Vaigalu ma A’ufaga. O Saleapaga pe na o se tolusefulu minute le mamao mai Lalomanu. O lenei vaega o le talafatai e fai si maualuga ae lē papa.

O le a’au- e ui ina va-apiapi, ae umi lona taualumaga, ma o nisi vaega o loo i ai ni nai faga laiti. Ma o tua tonu ane lava o lea nofoaga o loo tu ai se mauga lea e faasolosolo malie ona aga’i i lalo. Pe o ni nai minute i sisifo o Saleapaga o loo ta’oto ai Si’upapa-lea sa i ai se falesa Mamona; ae faasolo atu pea e tau i Lepa o loo i luga o se ogaeleele laugatasi.

O iinei e peiseai ua masofasofa ai le a’au ma e folga mai ua lua ona vaega; ma e latalata le matafaga i le fati mai o le a’au. O le itu i sisifo o lenei vaega laugatasi e peiseai o loo muta mai se ‘aupā papa ma si ona tolotolo itiiti o loo tafe mai ai i lalo se vai.

O tala atu o lenei nofoaga o se vaega maualuga ma amata ai se gataifale e tifa-to i lalo. A e savali i luga o lenei vaega maualuga, e te le toe vaaia ai se papa vagana ai se vaitafe itiiti o lona gutu tonu lava e i ai Aufaga ma e itiiti se laueleele o loo ta’oto ai.

A tuana’i lenei vaitafe ona e toe agai foi lea i se laufanua maualuga, ma e le umi a e taunuu i se nuu-a-uta o Lotofaga e igoa o Vavau. O le igoa o Lepa fai mai e afua mai se ‘pa-ma’a’ sa vaelua ai ni vaega se lua o Aleipata ae faamuta i Lepa.

O Lepa lea o loo lagomau ai le Tupu o Tupua. O Upu Taoto la o le Itu o Salefao e faapea:-“Tulouna Oe Salefao; Tulouna le Matua o Malielegaoi ma le Faleatua, Tulouna Tagata o le Tuiatua o Fatialofa ma Auelua; Tulouna Lau Afioga Faolotoi ma ou Ma’upu Taulagi; Afifio mai Alala Malae; Afio mai lau Afioga Po’alaga o le Alo o le Mataafa; Afio mai Lolofie o le Alo o le Tuiatua; Susu mai Tuilaepa o le Alo o Malietoa; Afio mai Lau Afioga Falanaipupu;

Afio mai lau Sa’otā o lau Afioga Sagapolutele; Afio mai Lau Afioga Puletiuatoa ma lou Sa’ota o Lau Afioga Tupua; Afio mai lau Afioga Pua’auli ma le Suafa o Sogimaletavai; Tulouna Satitoafaigā; Tulouna Lesa ma Lesa; Afio mai lau Afioga Taua’a ma ou Alo e to’afa; Afifio mai Salevalasi; Afio mai Tupuola; Tulouna le Aiga Sa Tagō ma le Matua o Tago.

© Samoa Observer 2016

Developed by Samoa Observer in Apia