Fa’amanatuina o le Aso Sa o Tina!

1105 Hits

O le Aso Sa na se’i mavae atu nei na fa’amamaluina lea mo tinā o Samoa ma nisi i atunu’u i fafo.

E pei ona i ai le Tusi Faitau Aso a le Ekalesia Fa’apotopotoga Kerisiano i Samoa, o le autu o le Aso , o le Tinā Kersisiano.

Sa tele ina fo’i ina fa’amamaluina i isi Ekalesia i ta’iala ma ‘autu lava mo Tinā.

E tele lava la ina fa’afiafia i latou i lo latou aso, e ala i solo, tauloto, tala fa’atino, ma le tele lava o vaega aemaise o le mau ese’ese mai Afioga Pa’ia a le Atua e fa’amalosi’au ai pea i tinā o le atunu’u.

O se upu fa’amalosi e pei ona tusiaina e Rev. Petaia Setu i le Aso Sa na se’i mavae atu nei na ia fa’ailoa mai ai le ta’ua o le fa’amaoni i lau tatalo.

“IA FAAMAONI I LAU TATALO”

“O le tatalo, o le ala sili lea ona faigofie ma tāūa e te talanoa ai i le Atua. E faamatalaina lou fiafia, lou faanoanoa, o ou moomooga, ma lou faamoemoe, e ui lava ina ua loa ona silafia mai e le Atua, a o lou loto o loo tulimata’i  e lona faamaoni.

“O le faamaoni, o le elemeni lea o le faatuatua. A leai se faamaoni, e le mafai ona ta’utonuina lou faatuatua. 

“E tāūa le ola tatalo; ae sili ona tāūa lou faamaoni i lau tatalo. E le o le faavasegaina o vaega o le tatalo, poo le tau faapaleniina o vaega ole tatalo – LEAI. E le o oe poo a’u o loo tatalo iai tagata – a o le Atua, o lē na te silafia loto o tagata uma. Ua tuanai atu matagi ma afa o lenei vaitau o le tausaga; ae o loo feagia’i solo pea matagaivale ma afa i loto o tagata. O la tatou malaga i lenei tausaga, teu le va o oe ma le Atua. Ta’ u sa’o i le Atua lou tagata; e le o lilo foi i le Atua lo’u loto. Ave le mea e aoga i le malaga. Se mea e fiafia iai le Atua.

“Ua uma ona momoli mai e le Atua lona faamaoni mo tatou Samoa – ua uma! O luga o le satauro! 

O nisi nei o ata o le Aso Sa o Tinā mai le E.F.K.S. i Vaitele-Uta.

© Samoa Observer 2016

Developed by Samoa Observer in Apia