O tulaga lava ia o fa’aletonu o auala e le’o se mea fou i totonu o Samoa.

O le tala tu’usa’o lava ia, a tatou feoa’i ma tagataga’i auala o Samoa e tele o lo’o iai fa’afitauli i tagata ae maise totonu o auala i nu’u ma le gatai o le taulaga i Apia. 

O se manatu fa’alia foi lea ua afea e le Fofoga o Samoa le aso ananafi le auala o Moamoa ona o le tele lava o faitioga ua māua i lea tulaga. 

O lea sa maua ai le fa’atalatalanoaga a le Pulenu’u ia taua’e  Tavita Laki, 50 tausaga le matua le soifua ma le Fofoga o Samoa e uiga lava i lea vaega po le a se tulaga o iai nei le latou auala. 

Peitia sa fa’alia e Taua’e ua uma ona fa’atinoina lona tiute po lona tofi pulenu’u o le feso’otai i laotu faipule e uiga lava i auala.

“Ia mo le silafia, e sa’o lelei mataupu o lo’o faitio ai nei tagata e uiga i le auala, silasila foi o le auala sa talosagaina lava le fia fa’alelei ona e tele lava ni tulaga o lo’o aafia ai le nu’u. 

“O le vaega muamua, o le sefe lava o tagata ma tamaiti, tou tagatagaa’i atu i omo omo sei tulou le taeao ua maualālō, e toetiti lava se ta’avale a lavea ai ma fa’aletonu ai foi. 

“Lua o vaega, ua alo fia lava le auala nei e le tele o pasi ae maise ta’avale la’u pasese ona o le leaga faia le auala, e o’o mai le taimi nei ua le toe iai lava se ta’avale po se pasi ona toe uuia mai le auala, ua tele lava ina tu’u tagata i le auala tele i gatai ona savavali mai lea. 

O le isi o vaega o lo’o mafatia ai nei le nu’u o ta’avale a aiga o lo’o maitauina lava le tele o ta’avale o afaina i lenei auala. 

“Mo le silafia la ua uma ona uia lava auala e mafai ona maua ai se fesoasoani ma foia ai le fa’afitauli, o lea la sa feso’otai ai lava le matou faipule i nei mo se fesoasoani. Peitai na lapataia a’u ina ia faia se tusi e fa’asaini ai aiga ma ave i le matagaluega o galuega mo se fesoasoani.   

“Mo le taimi nei sa toe logoina mai  o le masina o Setema o le a faia ai le auala, o lea la ua nofo ma fa’atalitali ina ia aulia atu le ola ma le malosi ma ia maua ai foi se mapusaga o aiga ona o lē tonu o auala i nei. 

“O le taimi nei ua matua faigata lava ga sopoia le matou nu’u ona o tulaga i le auala. 

“O le tasi itu o lo’o matou tilotilo iai ona o auala nei e fa’astino i le ekalesia katoliko e talosagaina ai foi le ekalesia ina ia faia se fa’aiuga fa’astasi ma le malo aua le foia o nei fa’afitauli ua leva na feagai ma nai tagata.