MALIU FASIA SE TINA-PENISIONA

329 Hits

Le maota o Leuma Fesolai ua tu’ufua a ua vaavaaia nei e leoleo talu ona maliu i le masina talu ai.

Le maota o Leuma Fesolai ua tu’ufua a ua vaavaaia nei e leoleo talu ona maliu i le masina talu ai.

Ripotia e Lanuola Tusani Tupufia 

Fa’aliliu e Maiava

 

O le masina na te’a nei, na maua atu ai se tina matua ua maliu i lona aiga i Faleasi’u, e fa’apea na fa’amalosia muamua e se tasi fa’atoa fasiotia ai, ae fa’atoa maua mulimuli ai e lona uso, a ua mavae nai aso.

Na maua atu Leuma Fesola’i Lauesi – o se tina-penisiona ua 66 tausaga o lona soifua, o maliu e leai ni lavalava i lona fale. 

O lo’o faia nei su’esu’ega a Leoleo i lea fa’alavelave matuia.  

Na fa’amatala e Fesola’i Ulufale i le Samoa Observer ananafi e fa’apea, o Le’uma e nofo-to’atasi na o ia ona e i fafo uma lana fanau.

E lua fale e va-ai le laoa o Fesola’i ma le fale o le tina ua maliu nei.

O lo’o manatua e Fesola’i le taimi mulimuli na va’ai ai ia Le’uma, i se fono e uiga i se mata’upu tau-fanua sa la ‘auai fa’atasi. 

 “Ina ua mae’a le fono lena, na ‘ou fai iai po’o a ana fuafua o le aso,” o le fa’aaliga lea a Fesola’i. “Ae fai mai, e leai ni ana mea e faia ae o le a alu e tala i tua lana penisiona. O le taimi mulimuli lena na ‘ou va’ai iai.

“Ae fa (4) aso mulimuli ane, ae asiasi atu iai lona uso mai Vaitele, ma matou iloa ai le mea na tupu ia Leauma.”

Na ta’ua e Fesola’i – o le matai fo’i o le aiga lea, o le ulua’i taimi lea ua tupu ai se mea fa’apea i lona aiga.

 “Na matou lagona atu lava le manogi o lona tino i tua mai o le faitoto’a,” o lana to-manatu lea.

“O se tulaga mata’utia tele lea mea ua tupu…o le maua atu i lona moega ua maliu fa’atasi ma manu’a i lona ulu.” 

O le fa’amatalaga na o’o atu ia Fesola’i e uiga i lona ta’otoga-fa’apitoa, e fa’apea na afaina lona ua, e foliga na titina e se tagata fa’atasi ma manu’a i lona ulu.

Na fa’ailoa fo’i e le matai-tama’ita’i i Leoleo, fa’atoa uma lava ona tala i tua fa’amanuiaga tau-penisiona a Le’uma i le vaiaso lava lea na maua ai ua maliu. 

“’Ou te matua le-talitonu lava e faia e se tagata se mea fa’apea ia te ia,” o lana fa’aaliga lea ma le le-talitonu.

“E faigata ona talitonuina lea mea, aua e silafia uma e le nu’u nei o ia. O se tina galue malosi ma naunau lava e fa’amama ma matagofie lona fanua.

 “E te le-maua iai se otaota i lona fanua ma e fai fo’i lona lava ma’umaga… o se tina gaioi tele.” 

Na ta’ua fo’i, o lo’o ta’oto (tanu) o ia i luma tonu lava o lona fale i Faleasi’u. 

E o’o atu sui o le Samoa Observer i le fale o Le’uma ananafi, o lo’o fa’ata’amilo ai se lipine lanu-samasama a Leoleo e taofia ai le uia e nisi o le nofoaga na tupu ai lea fa’alavelave. 

Na fa’amatala fo’i e Fesola’i le aso o lona falelauasiga, sa ‘auai le vasega o Leoleo e taofia tagata mai lea fanua, vagana lava i latou sa tau’aveina le pusa-maliu i lona tu’ugamau.

E o’o lava i le afio’aga o Faleasi’u, sa tutu uma i ‘autafa o le ‘auala i le taimi o le maliu.

Na feso’ota’i atu ananafi i le So’o’Upu a le Matagaluega o Leoleo, o Su’a Muliaga Tiumalu, ma fa’amaonia ai le maliu lea ma ta’ua fo’i, o lo’o fa’aauau pea su’esu’ega a le Matagaluega. 

© Samoa Observer 2016

Developed by Samoa Observer in Apia