Tumau pea ona le-mautonu

265 Hits

O ai o le a filifilia? Fa’aulusau Rosa Duffy-Stowers o Gagaifomauga Numera 3 po’o Seuoti Sheryl, o Gagaemauga Numera 2?

O ai o le a filifilia? Fa’aulusau Rosa Duffy-Stowers o Gagaifomauga Numera 3 po’o Seuoti Sheryl, o Gagaemauga Numera 2?

Ripotia e Sarafina Sanerivi & Lanuola Tusani Tupufia

Fa’aliliu e Maiava

 

O ai o la’ua nei o le a filifilia? O le fesili tele lea o lo’o taula’i iai le silasila po’o ai o le a manumalo i le nofoa lona-50 o le a fa’amauina i tala-fa’asolopito,  mo le Palemene o Samoa.

O lea nofoa o le a nofoia e se sui-tauva tama’ita’i, talu ai, e na o le to’afa sui-tama’ita’i ua fa’amautuina o latou nofoa i Faiga Palota Lautele i le Aso Faraile talu ai. 

I teuteuga o le Fa’avae, ua mo’omia ai i le Palemene o Samoa, le iai o sui-tama’ita’i e le i lalo ifo o le to’alima e ‘ausia ai le sefulu-pasene (10%) o le Palemene.  

Ua toe o nai aso mae’a faitauga aloa’ia o palota, ae foliga mai o sui-tama’ita’i e to’alua e ono fai iai le filifiliga mulimuli, o Fa’aulusau Rosa Duff-Stowers o Gagaifomauga Numera 3 ma Seuoti Sheryl Muagututi’a o Gaga’emauga Numera 2. 

O ananafi na fesiliga ai se fa’amalamalamaga pe fa’apefea ona iloa le sui e manumalo, ae saunoa le Sui Komesina o Faiga Palota, Faimalomatumua Mathew Lemisio, e le o iloa i le taimi nei se’i vagana ua o’o i le Aso Gafua.  

Na ta’ua e Faimalo, o ai lava e maualuga pasene o ana palota na maua, o le sui lena e malo.

Ae fa’apei ona sa’ili lea tulaga? 

Na fa’amalamalama e Faimalo e fa’apea, o palota na maua e le sui-tama’ita’i, e vaevae i palota na maua i le itumalo, ona fa’atele lea i le selau.

“E fai le tulaga lea pe a mae’a le faitauga mulimuli,” o lana fa’aaliga lea.

A fa’aaoga le faiga lea, ona tula’i mai lea o Fa’aulusau e 34.6 pasene ma Seuoti e 23.6 pasene. 

I le po o le Aso Luan a ta’ua ai e Fa’aulusau – lea na finau ma le Fofoga Fetalai, o lo’o mafanafana lava, o ia e atoa iai le 50 o faipule. 

“O lea lava ‘ou te matua mafanafana lava i le taimi nei. ‘Ou te talitonu ma to’amalie fo’i ae ‘ou te iloa e sili lava ona fa’atali i le Aso Gafua e mautinoa ai le tagata tonu e malo.” 

Na ta’ua fo’i e le Ofisa Lagolago i le Pule Sili o le Faleoloa mo Fa’ato’aga, e matua tele lava lu’itau sa feagai ai ae malie lava.

“Ua tuai tele ona o’o mai le Aso Gafua, pe afai o le aso lea e iloa ai po’o ai le tagata-laki o le a iai, ma o lo’o tatalo i Le Atua ia vave maia le Aso Gafua.” 

Ae fa’apefea pe a le manuia? 

Saunoa Fa’aulusau, e tu’u pea i le Atua e ‘aumai ai le fa’ai’uga ma toe ta’ua ai, o tofiga uma nei e mai Le Atua. 

 “O tatou Lana fanau, e tu’u mea uma ia te Ia aua e sili atu lona silafia o mea mea lelei mo tatou. Pau lea o le talia o fa’ai’uga ua maua ma maua se a’oga aoga ma aga’i pea i luma. A le manuia fo’i, o le tulaga lava lena e iai, o Ana tofiga lava mo tatou.” 

O le toe tepa i tua i le taimi o tapenaga mo le palota, na ta’ua e Fa’aulusau, o se taimi faigata, e le faigofie. 

“Ua tele naunau lo’u taimi ua alu i tapenaga mo le palota ma ua tele fo’i tupe ua alu ai,” o lana fa’aaliga lea. 

A o le tulaga lelei e pei ona ia fa’aalia, ua fesoasoani tele ai ia te ia, ua maua ai lona lototele ma talitonu ai lava i meaalofa a Le Atua ua foa’ina mo ia.  

Vagana le lu’iga o ia e le Fofoga Fetalai i tulaga tau-agava’a, ae sa to’amalie lava ma finau fifilemu.

“’E le o a’u o se tagata matamuli ae iai lava a’u mafuaga ma talitonuga,” o lana fa’aaliga lea.

“Lea lava ‘ou te le o mautinoa ma e faigata fo’i ona talanoa iai i le taimi nei. Vagana ua ‘ou matua mautinoa lava, ona fa’atoa fa’ailoa fa’alaua’itele atu lea.” 

Mo le taimi nei, o lo’o matua fiafia ma fa’amalieina i le lagolago sa tu’uina atu. 

 “Seanao le lagolago malosi a lo’u aiga ma lo’u nu’u, e le o’o i se tulaga fa’apea. O o’u nu’u o A’opo ma Letiu sa matua lagolago malosi ia te a’u ma maualuga fo’i le fa’amoemoe e fai e le tulafono se vavega.” 

Na fesiliga se finagalo fa’aalia o Seuoti, ae le’i mana’o ai. 

© Samoa Observer 2016

Developed by Samoa Observer in Apia