A’apa mai A’ao-agalelei o Iapani

190 Hits

Le Amepasa o Iapani i Samoa, Tuimaugaoalii Kazumasa Shibuta ma le Taitaifono faapea sui o le komiti o le aoga tulagalua a Satalo, Falealili.

Le Amepasa o Iapani i Samoa, Tuimaugaoalii Kazumasa Shibuta ma le Taitaifono faapea sui o le komiti o le aoga tulagalua a Satalo, Falealili.

Fa’aliliu e Maiava

 

Ua fa’aloaloa mai a’ao-agalelei o le malo o Iapani, e fesoasoani i le toe fa’aleleia o le falea’oga o le A’oga Tulagalua a Satalo, i Falealili. 

O ananafi, na sainia ai e sui o le Malo o Iapani se fesoasoani e o’o atu i le selau-tolusefulu-fitu afe, selau-fasefulutasi tala Amerika (USD$137,141.00) mo lea poloketi.

O lea seleni e ‘auala mai lalo o le Fesoasoani a le Malo o Iapani mo Polokalame  Fa’aleleia o le Soifuaga i afio’aga ma alalafaga i tua. 

O le poloketi lea e aofia ai le fausia o potu-a’oga e valu, o se potu mo faia’oga, o se potu-tusi, ae fa’atupeina lava e le komiti a le a’oga nisi vaega fa’aopoopo e ‘ese mai ai.

Na toe fa’amautuina ai fo’i e le Amepasa o Iapani i Samoa nei, o Tuimaugaoali’i Kazumasa Shibuta, le fa’anaunau pea o Iapani e lagolagoina galuega ma le atina’eina o afio’aga ma alalafaga i tua, e ala i le polokalame lenei na amataina i le 1991. Mai lena taimi, ua silia i le 150 galuega ua mae’a ona fa’atinoina.

E fa’atauaina tele e le Malo o Iapani atina’e nei, aua le si’itia o vaega mo’omia mo le soifua manuia o fanau a Samoa, e ala i le fa’aleleia o le si’osi’omaga mo a’oa’oga, ma o-fa’atasi ai fo’i ma le manulauti a le Matagaluega o A’oga, Ta’aloga ma Aganu’u na amata fa’atinoina i le tausaga e 2010. 

O ia manulauti e aofia ai le si’itia o tulaga o le Si’osi’omaga o A’oga lea e mo’omia ai le mautu ma le saogalemu o falea’oga i nu’u uma o le atunu’u.

O le “Fesoasoani a Iapani mo le Fa’aleleia o le Soifua i Nu’u i tua, e tatala mo so’o se fa’alapotopotoga tu-ma’oti, o a’oga tulagalua, o falema’i ma isi fa’alapotopotoga o galulue mo le soifua manuia o afio’aga ma alalafaga i tua.

© Samoa Observer 2016

Developed by Samoa Observer in Apia