Manatu o le Fa’atonu - E na o polokiki lava uso. Ma ua na o se tasi lava o aso i le ofisa mo Leala

10 February 2016, 12:00AM

Tusia - Mata’afa Keni Lesa

Faaliliu e Seagaitumua Tupuola

 

O Samoa o se nofoaga itiiti ma ona o lea itu-o Faleata Sisifo o se mea lilo itiiti lea a le Sui Usufono o le Palemene-o se tasi lea o mea lilo e sili ona leaga o loo tausia i totonu o le taulaga ma atonu-o lea lava ua faamaonia i le taimi mulimuli. 

O lea mea na tupu i le Aso Faraile talu ai –ina ua liua lē sa avea muamua ma Fofoga o le Tautua Samoa Party, o Lealailepule Rimoni Aiafi, e avea ma se tasi o sui faatutu a le Vaega Faa-Upufai e Puipuia Aia Tatau a Tagata (H.R.P.P).ina ua fono le pati e faailoa ona sui faatutu mo le Faiga-Palota Lautele. 

O le mea moni e faapea ua uma ona tatou iloa le gaoioiga a Leala mo se taimi umi e o’o mai i le taimi nei. Ua na o se mataupu lea o le taimi ma le ituaiga o faiga o le a faatino ai e le Sui Usufono o le Palemene. 

Ma i le avea ma tagata amio lelei ma o le tagata o upu e pei ona tatou iloa ai o ia, e leai se mea faatiga ua faia e Leala. I le avea ma sui o ona tagata, fai mai Leala e tatau ona ia mulimuli i le mea e manana’o i ai tagata o le itumalo. Ma o le mea latou te manaomia-ia matua auai o ia i le atiina a’e o le atunuu. “Ua ‘ou faia lenei mea mo le faaleleia atili o lo’u itumalo,” o lana faaaliga lea. “Ua fautuaina a’e e i latou e lagolagoina a’u ina ia fai lenei faaiuga. Ou te talitonu o le faaiuga lea e sili ona lelei e le gata mo lo’u itumalo a’o a’u foi.” Ia, o ai a finau i lea tulaga? Mo le 10 tausaga ua mavae, fai mai Leala ua uma ona tuuina atu lona sao i le atiina a’e o Samoa e ala i le faailoa o pu i totonu o faiga faavae a le malo ma le faailoa atu o vaega e mafai ona toe faaleleia ai. 

Ae ui o lea, o lenei taimi ma pe afai e faamanuiaina pe a mavae Mati, o lona manao ia matua auai i le faiga o faaiuga, aemaise ai lava pe a fua i le taua o le nofoaga o Faleata Sisifo i fuafuaga a Samoa mo le lumana’i.

 “O lo’u itumalo ua avea i le taimi nei ma nofoaga autu o le tele o atiina a’e o i totonu o le atunuu. E fia tuuina atu so’u sao i le faiga o faaiuga o nei atiina a’e ma ia i ai se leo malosi i mea o loo fai,” o lana faaaliga lea. “Ou te talitonu e faapea o se Sui Usufono o le Palemene o se tasi lea e faalogo i mea e manana’o ai tagata ma mea e manaomia. O ia na te faaleoina i totonu o le Palemene ma o lo’u tiute fai lena i o’u tagata. E fai a’u ma o latou sui i totonu o le Palemene.” Ia, ua talafeagai foi lena fuafuaga,  Leala!

Ae peitai-a faapefea le Pati sa avea ai o ia ma vaega o le 10 tausaga ua mavae? E mafai faapefea e se tasi ona kolosi le fola  a’o avea ma Fofoga o le Itu Agai ma faamoemoe o le a tumau pea ona talitonu tagata ia te ia? 

 “Na ‘ou alu ma talanoa ia Palu ma sui auai o le Tautua Party ina ua uma la ma fono ma Tuilaepa,” o lana faaaliga lea. “Sa ‘ou talanoa ia te ia pe aisea e tatau ai ona sui la’u patia ma sa manino lelei o ia i a’u mafuaga. Na ia faamanuia mai ia te a’u.” E tumau pea le mau a Leala e leai se toto leaga i le va o ia ma le Tautua.

 “E le o suia la’u patia ona o soo se mea ua matou feeseesea’i ai ma sui auai o le Tautua ma a’u. Leai, o la’u faaiuga e faavae i luga o le mea ua ‘ou iloa e sili ona lelei mo a’u ma lo’u itumalo.” Na toe faaalia e Leala o lona talitonuga ua na faia le faaiuga sa’o. Ma a toe tilotilo i tua, e matua leai lava ni mea e le o fiafia i le taimi sa i ai e avea ma Faipule o le Itu Agai.

 “Sa fesoasoani tele ia te a’u e faatulaga ai galuega i le avea ma tagata polokiki,” o lana faaaliga lea. “O le itu e sili ona taua, o le auai i le itu agai ua fesoasoani lea ia te a’u e faaleleia ai lo’u loto talitonu.”

Ma o lana maua o loo avea pe i latou ma uo.

“O i latou uma lava o a’u uo ma o loo avea pea ma a’u uo. E le faapea ua sui la’u itu, ona faapea ai lea matou te le toe talatalanoa-o le tasi i le isi,” o lana faaaliga lea. Just. “E faapena lava Polokiki. Tatou te ono finau ma le malilie faatasi e uiga i le tele o mea, ae o i tatou lava o uo ma ua tatou taufai femalamalamaa’i le tasi i le isi.”

Ma ona o lea ua fesuia’i itu i le taimi nei, faamata e tatau ona ia toe foi mai e avea ma Faipule o le H.R.P.P.ma ona mafai ona avea ma Minisita o le Kapeneta, ua uma ona faalauiloa e Leaga lona matua lagolagoina atoa o le malo, tauto na te faia le mea sili na te mafaia i le avea ma Faipule o le malo.  “Mo le lumana’i afai e faasaga tau mai le itu agai ia te a’u, ia –e tatau lava ona ‘ou toe finau atu talu ai o faiga ia faa-polokiki,” o lana faaaliga lea.

 “Ma atonu e tatau ona matou finau e uiga i ni nai mea, ae o’o ane i le faaiuga o le aso, matou te faa-talofa, fai le kofe ma totoē faatasi.”  

Ioe uso e, e faapena lava ona faigofie. E leai ni mea tetelē. Ua na o polokiki lava. Ma o se tasi lea o aso i le ofisa mo Leala!

 

10 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>