TALATUU O TAUPOU MA AUALUMA O SAMOA NA FAAMAUMAU E PAPALAGI

963 Hits

Aso Lulu 09 Fepuari 2016-Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer.

 

Fai mai faamaumauga a Papalagi e manana’o nuu uma lava o Samoa ia i ai so latou Alii-o ia Alii- ia tusa ai ma tulaga o latou aiga, ma le toatele o alii o sea nuu. O ia la tamalii uma- e taumafai lava o latou aiga uma e saili se tasi o suli tau toto e suitulaga i sea tamalii.

I le faagasologa la o le soifua o sea matai Alii-o lona atalii e fiafia i ai -e faaigoa o le Manaia, ae leai sona igoa matai faapitoa; e ui foi ina fai mai nisi o lona igoa ‘Manaia o ‘Aloiafi’-lea e faasino ia Malietoa Laupepa, ae ua na o se faamanatu ia te ia -e faapea e o’o lava i le Sa’o o le aiga- sa faaigoa foi o ia o ‘Aloiafi’; talu ai e le tasi se igoa o se Manaia, leaga e le tasi se sauniga e auai-ma e le tasi foi sona aiga.

O le mea uiga ese la- e le faapea ona fai se afafine o se Tamalii-talu ai na faatulaga mai lava lona olaga ma ona tiute fai- a’o itiiti-ae mafuli lava i lona tulaga Taupou. O lona lelei ma ona uiga tausaafia e le tau filifilia ai o ia. Sa faapelepele ona faa-failele mai o ia-ma e tofia lava e avea ma taupou o le nuu a’o itiiti lava.

E pei foi o le Tupu Tamaitai o Holani- sa na o ia lava le pele a lona tamā i le faagasologa atoa o lana nofoaiga.

O le taupou la a se Tamalii-o ia lea e ave i ai taumafa e sili ona lelei-e auai i galuega uma a tamaitai o le nuu- e pei o Fale Lalaga ma le faiga o le siapo-ae seasea lava ona auai i ni galuega mamafa e pei o le salaina o tau o se suavai poo se fuagā-lau e su’i ai lau o le fale.

E le alu foi e fai alili, fugafuga ma isi lava figota uma. O le pogai lea e melomelo ai ma momosi lona tino i lo le lanu o isi teine, ma o le pogai lea e faaigoa ai tamaita’i aulelei ia Sina-ona o le pa’epa’e ma le melomelo o lona tino.

E lelei ona tausi lona tino i taimi uma ina foliga ai e pei o se veloveta.O le pogai foi lea a alu ai se Taupou i le vao e asi ona aiga ma aumai fugalaau manogi- e momoli mai lava e tamaitai matutua poo (soa-fafine) ia e tausi ia te ia ma tausia pea lona tulaga (faa-teine-muli) faa- Taupou. Poo le a lava le laititi o le Taupou- e faauumi lava lona foga- ae a faasolo loa ina matua-ona faatoa ‘oti ese lea o isi lauulu. A matua-ona saofai loa lea i lona nofoaga faa-Taupou i luma o tamaitai o lona nuu-ma ua avea ma ‘Taupou’. 

TAUPOU: O le Taupou a le Tuiaana o “So’oa’emalelagi”; o le Tuiatua o “:Sefaatauemaga”; o Satuala (Aana) o “Fuatino”; o Satuala i Savaii o “Falenaoti”; o le Taupou a Malietoa o “Tooa”; Tonumaipe’a o “Tilomai”; Toleafoa o “Tofoipupū”;  Asiata, Samoeleoi i Satupa’itea-o “Le Valasi” ; Salevalasi (Lotofaga) o “Tuitogama’atoe”; Tuimalealiifano o “Letelemalanuola”; o Su’a-o “Aliitasi”; o Afamasaga o “Punipuao”; o Leutele (Falefa) o “Fenunuivao”; Alai’asa (Falefa) o “Pafuti”; Sagapolutele o “Teuialilo”; o Asomua-o “Tapusalaia ma Talaepā;” o Faumuina i Faleata-o “Letelesā”; o Mata’utia o “Talaleomalie”; o Seiuli i Faleata o “Vevesimalo”; o Muagututi’a o “Seutatia”; o Tagaloa o “Iliganoa”; o Lilomaiava o “Samalaulu”; o Tuimanu’a o “Samalaulu”.

 

SAOAUALUMA: 

 O Saoaualuma e faapea-o Fasitoo-uta o le “Manutoga”. Falefa o le “Fua’ō poo le Togoula”; Falealili o le “Lagaali”; Safata o “Satali”; Palauli o le “Laifoni”; Matautu o le “Talaulelō”; Amaile o le “Paniula”; Fale’ula o le “Mati’ula”; Satupa’itea o le “Tipa’ula”; Siumu o le “Tuga’ula”; Pu’apu’a o le “Fala’ula”; Asau o le “Gata’ula”; Faleasi’u o le “Ise’ula”; Sasina o le “Gau’ula”; ma Sala’ilua o le “Apialua”.

O le taimi la e taupou ai se tamaitai, e le toe faapitoa o ia mo lona aiga, ona o lea ua na ‘ausia le tapulaa e auauna atu ai i lona nuu, lea e tautua ia te ia. O lona nofoaga autu e nofo ai e afua mai lena taimi- o se fale tele lea o le alii o le nuu. O iinei e momoe ai i le po ma le aualuma o le nuu. A o’o la ina tofafā le nuu, e matua tapu ona toe latalata i ai se tama tane pe fesootai ma i latou. E na o alo lava o nisi o tulafale e tautuaina le aualuma poo le “palepale-aualuma,” ae matua tapu i taimi uma ona latalata se tasi o i latou i lea fale.  

© Samoa Observer 2016

Developed by Samoa Observer in Apia