Fa’atama’ia le afi se faleaoga
Ole aso ananafi na fa’atama’ia ai e le afi le faleaoga tuai o le Kolisi o Palalaua i Siumu.
Pe tusa o le itula e 11 i le taeao na tula’i mai ai lea fa’alavelave.
O lo’o ua galulue pea lava le Matagaluega o Fuimu mo le su’esu’eina o lea tulaga.
E tusa ai ma ripoti, na tele se vaega o le faleaoga na fa’aleagaina ma e le tele se vaega o le fale o lo’o ua totoe nei.
I le fa’atalatalanoaga ma le Pule Aoga a le Kolisi o Palalaua, Leoloa Tuuu Mautofiga na ia fa’ailoa ai o lo’o taumafai pea ina ia maua se to’afilemu i le tula’i mai ai o lenei fa’alavelave.
“O se amataga le manaia lenei mo lenei tausaga i si o matou nei aoga,” o lana saunoaga lea i le aso ananafi.
“E pau le itu fa’afetai ai o lea ua i ai si o matou faleaoga fou e pei ona outou silasila atu i ai lea o lo’o ua tua ai nei.
“E leiloa se tulaga e o’o i ai pe ana leai lea tulaga.
“O le itu mautinoa e le mafai ona alo ese mai fa’alavelave nei pe a o’o le taimi e tutupu mai ai.
Na ia ta’ua o lo’o ua i ai masalosaloga na mafua mai lea fa’alavelave ona o se fa’aletonu i le itu tau eletise.
“Ae mo le taimi lenei ia ele’o manino lava mai se mafuaga o lea tulaga e pei ona ua outou silasila atu ai.
Na ia fa’afetaia foi le Matagaluega Fuimu ona o le vave o’o atu i le taimi na tula’i mai ai le mu i le faleaoga tuai a le Kolisi.