Confessions of St. Augustine-Immitation of Christ. 

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer

E UIGA I LE TAUAVEINA O TIGA-MA O AI EA E FAAPEA UA LAVA LONA ONOSA’I?“O le a lau e fai maina, Lo’u Atalii e? Aveese lou faitio; ae mafaufau i o’u puapuaga, ma le pagatia o La’u ‘Au-Paia.

E te le’i teena le masa’a o le toto. Ua na o se mea faatauvaa ua e pagatia ai pe a faatusatusa ia i latou na pagatia i le tele o mea tiga; sa matua faaosoosoina, sa matua faatigaina-ma le toatele o e atamamai na faamaonia ma faasalaina, sa matua faatigaina lava.

E tatau ona e manatua i lou mafaufau le toatele sa matua sauaina-ina ia faigofie ai ona e tali atu i mea faatiga iti-ina ia e iloa ai- e le o lo latou le onosa’i ua pogai ai nei mea faatiga. Ae peitai-pe faatauva’a pe mata’utia ia mea faatiga-ia e su’esu’e i ai ina ia mafai ai ona e faalogo ia i latou ma le onosa’i.

Lo’u Atalii e, na ‘ou sau ma le Lagi mo lou faaolataga; na ‘ou tauaveina o’u tiga uma-e le faapea ona e tatau ai-ae ona o le alofa ina ia mafai ai ona aoaoina oe i le onosa’i ma mafai ai ona e tali atu i mea faatiga e aunoa ma le muimui.

Mai le itula na ‘ou fanau ai e o’o i lo’u oti i luga o le Koluse- e le’i muta ona ‘ou tali atu i mea faatiga. Na ‘ou tauaveina ma le onosa’i mea faatiga ma upu mamafa; na ‘ou maua le leai o se loto faafetai mo faamanuiaga, sa tauemu i vavega na ‘ou faia-ma inoino i a’u aoaoga!