Tausaga fou – Amataga fou

588 Hits

Ulugali'i fou: Seri Tagaloa ma Fareni Uili

Ulugali'i fou: Seri Tagaloa ma Fareni Uili

Ripotia e PaiMulitalo Ale

Fa’aliliu e Maiava

 

O se amataga fou mo lenei fo’i tausaga fou.

O le fa’amoemoe ‘autu lena na fa’amautuina i le aso ananafi, ina ua i-a fa’atasi Seri Tagaloa ma Fareni Uili, e fa’avae se amataga fou, o se ulugali’i ua tasi e soifua i le alofa fa’amaoni pei ona molimauina i le la fa’aipoipoga. 

Na ulua’i feiloa’i le tama ma le teine a’o a’o’oga i le A’oga Fa’aFailautusi a Tesese i Lalolavae, i le lima tausaga talu ai. 

Na maua a la galuega ma faigaluega fa’atasi ai i le Faletalimalo o le Tanoa Tusitala, ma fa’aauau ai pea le faiga-uo mai tausaga ua mavae, se’ia o’o i le taimi na tonu ai, o le a fa’ataunu’uina ai ona avea o se ulugali’i ma fa’atino ai loa ananafi le fa’aipoipoga. 

Sa faia le sauniga fa’apa’ia i le Ekalesia Metotisi i Sinamoga, lea na faia ai a la ta’utinoga a’o molimauina e aiga uma ma uo sa ‘auai. 

O Seri – ua 21 tausaga o lona soifua, o le alo Tagaloa Lama ma Na’otala Tufuga o Sinamoga. O ia o le lona tolu o le fanau e to’aono.

O Fareni – ua 25 tausaga o le soifua, o le alo o Toluono Folau ma Luafaleali’i o Lepuia’i i Manono-uta.

O le uo-sili a le ulugali’i-fa’aipoipo o Tina Prasda ma Frazer Taule’alo.

O ‘aumea-mamae e aofia ai Hazel Tufuga, Temukisa Lama, Waizu Ropeti ma Agela Tofilau.

O uo-sili a le tama fa’aipoipo e aofia ai Fa’aaliga Seumanutafa, Hinemoa Sefulutasi, Viliamu Folau ma Ulia Manoa Schwalger. 

Na mae’a sauniga masani, ona se’e atu loa lea i le Maota i le Malae Ta-polo i Faleata, mo se taumafaga tele ma alo ai loa i fa’afiafiaga masani sa tumutumu ai aiga uma o le ulugali’i-fou, o uo ma ‘aumea-mamae fa’apea le atunu’u sa vala’aulia fa’apitoa e molimauina le Aso Fa’apito o Seri ma Fareni.

© Samoa Observer 2016

Developed by Samoa Observer in Apia