Talatuu ma Tala o le Vavau na faamaumau e Papalagi

496 Hits

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer-Aso Sa 10 Ianuari 2016. 

O LE POGAI O LE AO O LE TONUMAIPE’A

E to’alua faletua  o Tuitoga Manaia, o le tasi o le Toga- a’o le isi o le Samoa. O le suafa o le tamaitai Samoa- o Leutogitupa’itea-o le afafine o Muliagalafai. Ua mavae nisi aso ona fanau lea o le fafine Toga-o le tama lana tama-ae o loo nofo pea Leutogi e leai sana tama.

Ona taufaalili lea o le fafine Toga ia Leutogi ma ua matua tiga ai lava lona loto-ma ua tonu ia te ia -o le a na fasiotia le tama a le fafine Toga. Ua o’o i le tasi aso -ona o faatasi ai lea o le latou ta’elega i le vai.

Ua latou taunuu i le vai ona faapea lea o le fafine Toga-‘Se’i o’u ta’ele muamua-ona e tago mai lea e tapo si a’u tama. Ona tago lea i ai o Leutogi ma ua faapea ifo i lona loto-o le taimi lea e faauma ai le taufaalili o le fafine Toga ia te ia.

Na lilo atu loa le fafine Toga-ona tago loa lea o le fafine Samoa i le tianiu-ua tatui i totonu o le fa’a’ī o le pepe. Na lagona mai e le fafine Toga le tagi faataiō o si ana tama e pei o le a oti-ona momo’e mai ai lea.Ua masalomia Leutogi -o ia lava lea ua na fasioti le pepe a le fafine Toga.

Sa su’esu’e ma saili se mea e faamaonia ai. Ona maua lea o le tianiu-ma ua faapea ona ta’u atu i le Tuitoga.

Ona to’atama’i tele ai lea o le Alii ma fai ai lana poloaiga -ia susunu Leutogi i se afi. Ona toso lea o Leutogi e tagata Toga ua feitai tele- i le vao ma faati’eti’e i luga o le maga o le laau o le Fetau. Ua la’u ane fafie ma faafaula’i i lalo ifo o Leutogi. Ona tutu lea o le afi-ae toe fo’i tagata i le aai, ona o le le fia falogo i le tagi a le fafine puapuagatia.

Ae peitai-ua tupu le mea ese e ofo ai-na amata loa ona mumū le afi-ona felelei ane lea o pe’a e faitau afe ma afe-ua afe ane ma titina le afi ia latou fe’au-vai.

Ona faasaoina ai lea o le ola o Leutogi ona o le galuega alofa a pe’a! Ua o’o ina iloa e le ‘au-tautua a le Tupu o loo ola pea le fafine Samoa-ona ua mate le afi-ona latou fefefe ai lea ma ofo.

Ae ua fai atu Leutogi ia i latou-“Ua tatou fetaia’i i le magā-fetau soifua. Ua ta’u atu nei mea uma i le Tupu-ona tonu ai lea ia te ia – e ave Leutogi e tuu i le motu tuufua. O le motu lea o loo i ai le aitu ulavale e igoa ia Losi-ma ua faapea le Tupu-e vave lava ona fasioti le fafine Samoa e Losi.

Ae peitai-e le’i tago Losi i le fafine-talu ai lona manatu-e le pine ona oti o ia i le fia’ai ma le fiainu.O le mea lea-e na o le nofonofo lava o Losi ma tilotilo i le fafine.

Ae o le mea na ofo tele ai Losi, o lona vaaia lea o le anoano o pe’a eseese-ua tofu ma le mea’ai e avatu mo Leutogi. O le mea lava lena e fai e pe’a i aso uma-ae vaavaai pea i ai Losi ma ofo ona o lenei mea uiga ese. Ua mavae nisi aso-ona folau ane lea o le Tuiuea i tafatafa o le motu.

Na faaafe e Leutogi ma ‘ai’oi i ai e avatu o ia la te o. Na talia ma le fiafia e Tuiuea-ona o le lalelei tele o le fafine. Ua faaipoipo Leutogi ma le Alii ma maua ai lana tama na faaigoa o Faasega. Ua matua le tama-ona auina lea e lona tina i Savaii-ma ua tuu ane i ai e le tamaitai suafa e tolu e sau ma ia i lona aiga.

(1) Tonumaipe’a-e faamanatu ai mea na fai e pe’a mo ia (2) Tilomai-e faamanatu ai le aitu sa na o le tilotilo mai- (3)Tauiliili-ona o ‘ili’ili sa faaaoga e fai ma tau o ana umu. O Suafa uma na o loo pule ai le Falefa o le Aiga Sa Toleafoā-o i latou ia e filifilia ma alagaina le Ao o le Tonumaipe’a!

© Samoa Observer 2016

Developed by Samoa Observer in Apia