O la’u tala fo’i

10 January 2016, 12:00AM

1. Matauina i Tala Fou o lea ua maua le fesootaiga tau telefoni  i Uafato Fagaloa-ae o le 20 tausaga ua mavae-e leai se fesootaiga faapea sa mafai ona maua!

O le matau la i lea faamanuiaga- e peiseai o le Kamupani a le Bluesky na faatinoina! O lona uiga la-afai o Uafato o le nuu tupito lea o Fagaloa-atonu la e mafai ona faapea ua so’o Upolu i fesootaiga tau telefoni. 

Afai la ua o’o le telefoni i Uafato-ua tatau foi la ona o’o atu i ai ma isi lava auaunaga lautele e manaomia e tagata-aemaise ai lava o ni auala lelei!

Ia manatua foi-tasi lea vaega o Upolu nei e tatau lava ona lelei auala mo turisi e maimoa mai i Samoa-talu ai –o viiviiga o Samoa ma lona sami tioata ma ona laufanua lanu lauava-aemaise ai o lana aganuu- o nisi ia o oloa taua a Samoa e le o mafai ona faatau atu i tagata tafafao mai fafo-aemaise ai o tafaoga i nuu I tua-ae faafeiloa’i i se agatonu-taumamafa i taumafa Samoa –ona fai lea o faafiafiaga faale-aganuu taape ai-o se meaalofa uiga ese e oti lava le turisi e le mafai ona galo i lona mafaufau Samoa! O le a sou taofi? 

2. Matauina foi i Tala Fou fai mai ua lagolagoina e le Palemia le Komesina o Leoleo! Ia e ui lava ina tuai ona faalava le Palemia-ae o le mea sili-o lea lava ua tulai mai e lagolago le Komesina na ia tofia ma le faamoemoe-o le a na faia ni suiga fou ma le lelei mo le Matagaluega o Leoleo. 

O le mea lea ua tupu nei- e tiga lava sina sasi itiiti-ae nonofo lava le ‘au-fiapopoto ma faatele! O le itu la e sili ona le manuia-o le tete’e i le Komesina o Leoleo ma le lape o lana faaupuga-ae aliali mai ai le valea mafiafia o tagata fiailoa!

O le mea la e sili ona leaga-o le tausolomua i le Tuua o le Nuu ona toso le laau felefele ma lau le le tautua o le Komesina o Leoleo ma le le’i soifua faa-Samoa-ae o le isi matai iloga lea o Palauli lea e faifai upu I ai! O le fesili la- e maua ai se mamalu ma le taualoa o se afioaga pe a fetaua’i faapenei matai o se nuu ae o lea e faafofoaga Samoa? Faamata e le’i o’o i le taimi e tatau ai loa ona fai se fuafuaga a Palauli i lea mataupu?  O le a sou taofi? 

3. Matauina i Tala Fou se taumafaiga a le Ofisa o Turisi e faatosina mai turisi i Samoa! A toe faaupu la-ua tau leai ni turisi e fia o mai i Samoa!

O le fesili la-o le a le pogai? O le isi fesili- aisea ua le toe faia faalauiloa i fafo e pei ona masani ai lea sa masani ona fai e le Ofisa o Turisi a le Pasefika i Saute i Fiti-ae auai uma atumotu o le Pasefika? Afai la ua tau leai ni turisi e o mai I Samoa-o lona uiga-e leai ni faalauiloa o faia! Afai foi o fai ni faalauiloa-o fea maketi i fafo o fai ai?

O i ai pea pe leai ni sui o le tatou Ofisa o Turisi i fafo? Afai la o loo lava ma totoe fale talimalo i Samoa ae le o o mai lava ni turisi- ua tatau loa ona sui se isi faiga! E a pe a faaaoga nuu i tua e talimalo pe a finagalo i ai? A fia nonofo turisi i aiga Samoa-aisea e le mafai ai? 

A masani turisi i le olaga faa-Samoa- ona matua faafiafiaina lava lea o i latou! Faamasani turisi i aga ma faiga masani a nuu o Samoa-faamasani i le vavao i le afiafi-faiga-lotu i aiga-taumafataga-moe i le ta’inamu-taele i le vaitaele o le nuu faatasi ma tagata-poo le paipa-poo le o ma tagata Samoa ia latou faatoaga ma o e fagogota, fai le suavai talo la lu’au ma isi lava mea-ona foi lea i lona aiga ma le oso mai Samoa- e le mafai ona galo I lona olaga atoa!

O le a sou taofi?

10 January 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>