Ua telē le suiga o Samoa

By Deidre Fanene 09 December 2016, 12:00AM

O le tamā i a Tui Toa 56 tausaga mai le afioaga o Tulaele o se ave taxi i le fale ta’avale o le Island Samoa i Tuana’imato.

Sa afea e le Fofoga o Samoa lea fale ta’avale po’o le a se suiga ua i ai nei vaitaimi i le galuega o le ave ta’avale pe a fa’atusatusa atu i aso ia ua mavae.

“O le vaitau lenei ua i ai ua le’o toe tutusa le tulaga i le tupe maua i aso nei ma aso la.

“E i ai le aso ua lelei ua maua nai seleni feololo mo ta’avale ta’itasi ae e i ai fo’i nisi aso ua le lelei.

“Ou te talitonu o aso la sa tau leai ni ta’avale lau pasese ae sa eseese foi ma le totogi o pasese ae sa tele foi tupe e maua ona e to’a laiti ma to’a gaogao ia ta’avale lau pasese.

“O aso nei a o’o lava ina lelei le aso e maua le $150 - $160 i le aso.

“Ae manatua fo’i e le o le tupe atoa lena o le a umia e le ave ta’avale ona a maua mai le tupe lena ona fa’aalu lea o lesi vaega e toe utu ai le ta’avale ma fai ai mea fai a le fanau i le aoga.

“O le tupe mama la e maua ona ave lea e teu lena tupe.

“O le eseesega lena o nei vaitau.”

O le isiitu na fa’aalia e Tui e i ai lava le eseesega o le ave ta’avale e tasi le ta’avale ma le ave ta’avale e tele ana ta’avale.

“O le taimi nei e lava a le tupe e maua i le ta’avale aemaise lava i latou e tele ta’avale la’u pasese e leai la se mea e popole ai.

“Ae o matou la nei e na o le taitasi taavale o le eseesega la lena.

“E pau le itu lea e feteenai i lou mafaufau o le taugata o le soifuaga.

“Aua o le taimi nei ua tele pisinisi ma faleoloa tetele ua amata ai foi la ona alu i lalo le tele o ooloa.

“E mo”i e i ai oloa o loo taugata ae o loo i ai foi oloa o lea ua taugofie.

“Ua tele lava le eseesega o le vaitau lenei ma ia aso ua te’a.

“Sa fai lava si mafamafa o tau o oloa i la vaitaimi ona sa tau leai ni faleoloa ma pisinisi tetele ae o lenei vaitaimi ua i ai lava si faamama avega i lenei vaitau ona ua tele pisinisi.

“O le omai foi a Saina lea ua omai ai ua faamama avega foi i le toatele o le atunuu aemaise lava i mea taumafa.

“Iā te a’u lava ia e ala ona oi isi aiga ona o le leai ose tupe maua.

“E le pei o matou e mo’i lava e i ai aso lelei  e i ai foi aso e le lelei ai ae o loo maua lava le tupe a’o nai isi aiga e leai ni tagata faigaluega ma e leai foi se alaga tupe o maua mai.

“Ia te au lava ia o lea e lelei lava le soifuaga e mo’i o loo taugata ae a faatusatusa atu la vaitaimi ua tele lava le eseesega.”

By Deidre Fanene 09 December 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>